Atlet Enggau Ubat Ari Herba

REKUTAI kitai udah dikenyitka enggau berita ke madahka pengari wushu Malaysia, Tai Cheau   Xuen udah bisi ditemu positif nguna dadah maya lumba Asia. Baka nya mega pemain badminton tebilang Malaysia mega nerima nasit ke sama. Berita ti baka tu mai empas negatif ngagai menua kitai. Ambika banding ukai semina Tai ti keterubah orang Malaysia bulih midul mas ba lumba nya tang hal nya ngujungka midul nya diambi pulai ari iya sereta ngujungka imej lumba enggau main menua Malaysia ba tikas berita ke enda manah.

Kelimpah ari tu bisi mega insiden ke bukai nyadi ba atlet bukai, iya nya bela ditemu positif dadah. Sida tu nyengkaum – pelumba angkat berat Sukma sereta penerima midul mas iya nya Jelinie Empera, pelumba ensikal Wilayah Persekutuan, Dhia Danial Kharil enggau pelumba angkat berat ari Perlis, Siti Fazera Ishak.

Dalam kes Tai tu, test udah tetemuka bisi kimia sibutramine ba tubuh iya. Kimia tu suah dikena nyaga pemerat tubuh. Nambahka mega kimia ke sama udah ditagang guna ba menua ke udah mansang laban iya tau ngasuh orang kena serang stroke. Ba kes Jelinie, pelumba asal ari Sarawak tu ditemu positif beambika anabolic steroids. Dalam kedua-dua kes tu bela atlet tu enda ngaku bisi ngambi dadah ke ditagang nya tang semina madahka diri bisi ngambi herba tambah dikena ngeregaska diri.

Tu mih pemun semua penanggul. Keterubah iya enti diperatika sigi pedis amai deka nemu orang nya udah bepakaika utai ti tau dikumbai rachun tauka enda. Tu mega ditambah enggau kurang penemu senentang empas beambika suplemen herba.

Laban kitai ke orang Asia, endang udah lama kitai tu bisi kaul enggau herba ari jeman aki ini kitai munya. Herba endang nyadi ubat enggau tauka suplemen. Mayuh ari kitai besai enggau pengarap ke madah herba nya sebansa utai tumbuh nya alai iya ukai rachun, likun diempa nyadika ubat enggau suplemen.

Kitai seruran makai sup herba, ngirup ai champur urat kayu, daun, buah enggau utai tumbuh ti dianchur nyadi tepung tauka digaga nyadi pil laban orang tuai madahka nya mih tauka ubat sereta manah ke pengerai tubuh. Kitai ke biak endang baka ubung nitihka jerumat, kelebih nembiak ke suba balat agi mending jaku orang tuai senentang penti pemali enggau utai ke tau diempa enggau iya ke enda.

Endang amat mih suplemen herba tu ke ngasuh tubuh berasai nyamai. Utai tumbuh endang ari kelia munya dikena ngubat mayuh bengkah penyakit. Indah pelajar sains bisi mega madahka utai tumbuh nya sigi ngundan mayuh macham kimia – iya ke tau diguna enggau iya ke berachun.

Nitihka ripot kemaya hari tu ubat moden bisi ngundan 25 persin ari utai tumbuh, ambika banding baka steroids. Steroids tu datai ari mayuh tukuh lalu sekeda ari tu bisi ditemu ba kulat, jelu enggau utai tumbuh. Steroids tu kimia ti dijaga guna iya reti nya enda tau dikena sengapa. Iya bisi atur ngena lalu mayuh bansa steroids dikena ngubat mayuh macham penyakit ari iya ke angkat bujang, penyakit gelata enggau penanggul kurang bingkul isi. Dalam artikel ‘Natural Steroid Plants’, Livestrong.com nerangka mayuh bengkah steroids bisi ditemu ba herba lalu dikena ngubat pesakit kanser kena ngurangka pemedis enggau mutarka penanggul kurang bingkul isi.

Sekeda ari ubat enggau suplemen ari herba nadai ditemu utai ke bisi dalam herba nya enti nadai diuji betul-betul ba makmal. Ketegal nya mayuh orang pechaya herba tu likun sereta enda berachun. Mayuh orang ngembuan penemu ke madah mayuh agi herba nya diempa manah agi iya ngagai pengerai tubuh. Tang iya ke suah nyadi nya tunsang ari penemu tu. Herba enti diempa mayuh sereta suah tau ngasuh tubuh berachun sereta ngasuh orang sakit.

Sidi sereta pansik pasal elemen kimia ti bisi dalam herba endang beguna amat sereta kekadang tau mega nganu mensia mengkang dipejalaika ba serata dunya. Mayuh ari pansik tu endang lungat amat dikereja laban begunaka mayuh eksperimen enggau verifikasyen ti patut digaga.

Besenutuk enggau nya mega anang mih kitai enda ingat orang ke beambi-ulih ngasilka suplemen herba ke berachun. Orang ke baka tu semina ngira untung diri aja. Ambika banding baka kes Tai. Laban ke atlet nya alai iya makai suplemen herba laban deka ngatur pemerat tubuh diri. Nya mih runding kemayuh ari kitai Malaysia, semua ngumbai nya ‘selamat’.

Tang enti kitai bisi hari mansik tentu kitai tetemuka ba sekeda kes nya sida ke ngaga suplemen herba tu udah ngubah produk sida ngambika dipeda semitan enggau chara nambahka kimia ngambika mensia mayuh terus meli sereta ngelakuka herba suplemen sida nya.

Dalam bulan May 2011,  Gerempung Europah (EU) bisi ngaga atur terit ti nagang mayuh bengkah suplemen enggau ubat ari herba ketegal pengerai tama ngagai menua sida. Ba menua EU, suplemen herba dikira ubat dadah tauka pharmaceutical drugs. Ketegal atur ti terit ba menua ke udah mansang dia mayuh produk tu dijual ba menua kitai kitu. Kitai balat diumbuk enggau iklan ke madahka pemanah produk herba tu ba online tauka ba network sosial.

Nyangka udah datai alai maya menua Malaysia neritka adat sida senentang produk herba ke tau nganu sereta suplemen ba maket ti nadai kala diuji enggau betul.   Kelimpah ari nya, sida ti betanggung pengawa mega patut meri penemu sereta pelajar ti betul ngagai raban atlet, sida sebilik, tukang latih sereta mega raban pengatur lumba enggau main senentang pemesai guna suplemen ti betul sereta herba ke patut diambi sida.  Inisiatif tu beguna amat sereta patut dipejalaika enggau lengkas ba Malaysia laban ditu mih palan alai suplemen herba bisi dijual enggau murah amat ukai semina dijual ba farmasi tang mega bisi dijual ba kedai kupi! Ukai kitai ngajih rangkang ngachuk mata laban suah agi munyi ku jaku tuai; udah pala tepantup baru engkadah...