Ngeligan Ba Jalai Raya

NGELIGAN nya sama reti enggau jaku ngeransi ke mai reti ringat lalu ngerusak sebarang utai alai mantupka pengeringat nya. Jaku ngeligan tu asal ari menua Sebuyau. Pekara ke dikenang sekali tu bisi kaul enggau leka jaku ngeligan.

Enti ulih seliah ulah ke deka bendar bekelikuh ngambika pekara 'road bully' enda nyadi lebuh bisi penusah belantak tauka eksiden ba jalai raya. Kebuah pia, ngambika ulah kitai nya enda direkod sereta ditaburka orang ba dalam media sosial, ngujungka iya nyadi viral baka insiden ti empai lama udah nyadi di Kuantan, Pahang.

Pengawa 'road bully' tauka pembuli jalai raya tauka samseng jalai raya ukai sebengkah pekara baru di Malaysia. Kenyau ari taun 1995, pekara tu udah nyadi buah kenang lalu bisi diambi perati raban pengari rayat ngujungka pekara tu bisi dipejuraika ba sidang Parlimen.

Polis Kuala Lumpur dalam taun 1996 mega kala mantaika keretas sadang penemu ngagai Tuai Polis Menua (KPN) maya nya, iya nya Tan Sri Rahim Noor ngambika atur terit patut diletakka ngagai pesalah tu nyengkaum nginsil tauka narit pulai lisin deriba ke besalah ketegal nyadi samseng jalai raya.

Kebuah pia laban raban tu seruran ngeluarka senyata baka lungga, kayu hoki, kayu besbol, kayu golf enggau besi pengunchi stering kerita nyadika senyata sida. Sida tu kempang ngeligan  enggau enda tentu pasal enti sida enda puas ati ngagai pengguna jalai raya ke bukai.

Pekara ke apin lama nyadi di Kuantan ketegal siku indu biak ngamuk ngena besi pengunchi stering kerita udah kerita Peugeot 208 ti baru dibeli iya sebulan ti udah dilantak siku orang tuai lelaki. Berita tu semina siti ari 1,001 cherita pembuli jalai ba menua kitai tu.

Raban ke enda kala pupus tu terang bendar enda ulih nagang pengeringat sida sereta suah nitihka ati ti ringat. Sida tu enda tentu ulih bepikir enggau rasional taja pan kadang-kadang penusah nya semina hal mit. Tu ngujungka sida empu dipejal nanggung empas ari ulah 'setengah tiang'. Empas iya besai agi ari pengurask kerita sida laban menua tu ngembuan undang-undang ti enda kala ngelepaska sapa-sapa ke rindu ngatur adat nitih penemu diri.

Pekara nya mega enda ulih ke enda ditanggung Kiki tau nama amat iya, Siti Fairrah Asyikin Kamaruddin, 30, lebuh iya ditinggang ukum RM5,000 lalu diperintah ngereja pengawa sosial sepengelama 240 jam dalam timpuh tiga bulan. Ukum nya diputuska Kot Sesyen di Kuantan, empai lama ti udah.

Sebedau tu, iya empu udah dulu nerima ukum di 'mahkamah rama' lebuh mensia mayuh bela nyumpah sereta nganu iya sepengudah video iya nganu siku lelaki tuai ke bisi ngelantak kerita iya enggau enda senaja bisi ditabur ba media sosial.

Taja pan iya empu udah minta ampun ke penyalah diri lalu orang tuai nya mega udah ngampunka penyalah indu nya tang semua utai tu udah baka asi ke nyadi bubur. Diatu Kiki napi empas ari ulah ke digaga iya empu nya.

Sebedau tu, bisi sekeda kes pembuli jalai raya bisi diripotka media massa. Bisi sekeda ari mansa di dalam kes nya ukai semina bakal tang sekeda nya lalu ngujungka nyawa sida lesi. Peratika nangkanka tu berita kes-kes tauka evidens ke bisi diripot nyadi ba dalam enggau ba luar menua kitai:

MALAYSIA

* 30 September 2013 - Deriba teksi, Hiew Chen Guang, 66, mati udah ke koma sepengelama seminggu udah iya balat diinsah siku samseng jalai raya di Jalan Klang Lama udah iya dikumbai bisi ngelantak siku orang ke nepan motosikal ba mua kerita iya.

* 29 Jun 2012 – Ketegal masang trumpit kerita ketegal ke ngempang pejalai iya ba Jalan Kuching, Kuala Lumpur, ngujungka siku ini orang ke benama Yap Kim Fatt, 55, dibukut ulih  deriba nya .

* 26 Januari 2005 - Pemantu injinir komputer, Mohd. Nazri Ismail, 28, parai udah ke kira-kira 17 jam di Hospital Kuala Lumpur, ketegal dipalu tiga samseng jalai raya ngena objek kering udah ke kena penusah mit ngelantak kerita suspek ba Jalai Kewajipan, Subang Jaya, tumu pagi, sehari sebedau nya.

* 22 November 2004 – Siku anak tauke kedai ubat, Teo Kai Siang, 22, mati ditancham ngena lungga udah iya ke deka nemu kebuah kerita iya diapit sereta dilanggar ba kilometer 20 Jalai Johor Bahru-Pontian.

* 6 Julai 2004 – Siku deriba kerita ngegap siku pengguna jalai raya ngena duku lebuh mansa nya enggai meri jalai ba saka lampu trafik di Serdang, Selangor.

* 28 April 2004 – Siku indu, Young Chew Ha, 61, parai lebuh anak iya, Chew Saw Bee, 26, balat bakal udah kerita seduai tepawah lalu labuh ke dalam Sungai Kapar di Klang ketegal ngelarika diri ari samseng jalai raya.

* 15 Oktober 2003 - Siku lelaki, Selva Kumar Alagesu, 27, diserang empat lelaki besenyataka parang udah ke bisi belantak ba Jalan Bukit, Kajang. Mansa lalu nadai  ditemu sereta disangka dibunuh. Bangkai iya pan nadai ditemu.

* 26 September 2003 – Siku nembiak Universiti Teknologi Mara (UiTM) nyau deka parai lebuh siku lelaki dipechaya pembuli jalai raya  nanchum rekung iya ngena pisau di Seksyen 14, Shah Alam.

* 24 Januari 1995 – Sepasang melaki bini ari Singapura, Mohd. Rafi Mohd. Ibrahim, nadai agi  mata kanan ketegal dipalu, lalu bini iya, Khatijah Idoo maya nya benung betubuh bisi empat minggu diju siku deriba bas enggau kasar laban ringatka Mohd. Rafi meri tanda ngasuh iya neriba enggau bejimat.

BRUNEI

* 19 Mei 2014 – Ketegal ringat laban kerita digelih, siku lelaki orang menua tu empu, diukum jil dua bulan ulih Kot Majistret. Iya ti dituduh, Mohammad Hassanalhamizan Mohd. Ibrahim, 22, diripot bisi ngelantak kerita mansa tiga kali ngujungka kerita mansa balat bendar rusak. Kes tu nyadi di Jalan Jerudong kena 1 September 2011.

AMERIKA SYARIKAT

* 5 Disember 2005 - Dua iti waran bisi dikeluarka ngagai orang ke kala nyadi juara gusti dunya 16 kali, Ric Flair tauka nama amat iya Richard Morgan Fliehr, 56, ketegal nyerang sereta ngerusak reta siku lelaki udah kerita iya belantak ba Jalai I-485, Charlotte, North Carolina, kena 30 November 2005. Flair tauka nama gelara iya 'The Dirtiest Player In The Game' dituduh ngereja pengawa salah nya udah iya ke begedika ulah lelaki nya ti ngelubahaka kerita iya di jalai raya ti penuh dedat enggau kerita bukai maya nya.