Empas ari toksin dalam tubuh

Kenyau ari suba mayuh rayat ba menua tu balat bendar ngemeratka pengawa nganta enggau nyaga pengerai luar tubuh enti dibanding enggau nyaga pengerai dalam tubuh. Mayuh ari kitai enda tentu nemu ni bagi pekara ti patut dipilih lebuh deka dipeda memelan enggau bepengerai; patut bepun ari dalam lalu terus ngujungka iya nempa pemanah ari luar.

Pakar konsultan produk penganta enggau pengerai RF3 World, Dr. Zannat Begam Sawal Hamid, 33 ti kala gawa sepengelama tiga taun ba Bahagian Perubatan Tradisional enggau Komplimentari Opis Menteri Pengerai, madahka lelaki tauka indu bela sanggup ngeluarka duit ti mayuh dikena meli set penyaga kulit, tang enda mayuh ari sida terunding deka muai toksin dalam tubuh (Kosmo 28 March 2015).

Toksin nya bakteria ti begumpul ba dalam organ tubuh mensia baka ba dalam untak, tungkul atau, ati, pituitari, pankreas enggau organ peranak. Empas toksin ti begumpul tu enda ulih dipeda dalam timpuh maya ti pandak laban iya begunaka awak ungkup iya beranak betelesak lalu betukar nyadi penyakit. Nya alai, mensia mayuh jarang ibuh ke hal tu.

Enti nunda, pengawa nagang toksin nya begumpul dalam tubuh patut dipejalaika ari renggat keterubah sebedau toksin nya betukar  nyadi bakteria jai lalu nyerang bakteria-bakteria manah ngujungka iya ulih ngasuh sistem imun tubuh nyadi lemi. Toksin suah begumpul ba dalam tubuh orang ketegal sekeda faktor baka teda pemakai ti enda diproses enggau genap, ngisap, semampai ngayanka diri ngagai pengamah angin lalu ngemeranka chara pemakai ti enda bepengerai. Chara pemakai ti enda bepengerai tu mai reti pengawa sida ti rindu makai pemakai rumpas, seruran makai  pemakai ti diangat ngena oven lalu jarang makai buah sereta lauk ulam.

Kelimpah ari nya, sida ke kurang besenam lalu seruran ngena alat penganta ti ngundan kereban plumbum enggau logam mega ngelumu toksin. Pengawa ti begunaka kereban penganta suah enda dikibuhka raban sida ke indu. Sida jarang merati isi ba dalam kereban penganta ti dikena. Kereban penganta tauka set penyaga tubuh ulih mali enggau jampat. Iya enda manah dikena laban iya ngundan rachun ti kuat amat ke ulih ngeluyaka chura kulit enggau jampat.

Nya alai, manah agi mensia mayuh ke ngena produk-produk asal patut nentuka kereban penyaga ti diguna sida dibai ngagai opis menteri pengerai dikena nentuka taka empas kereban nya ngagai tubuh. Penyakit ti ulih diidap orang ti ngundan toksin dalam tubuh nya nyengkaum riman enggau penanggul hormon baka migrain, sakit urat, kemi manis, enda peridi, obesiti enggau tiroid.

Entara simptom ke tumu ditemu orang ke ngundan mayuh toksin dalam tubuh nyengkaum penanggul semampai ngantuk, pengelemi sistem imuniti tubuh, kulit besemua enggau isi ngelingi mata mali chelum. Kelimpah ari nya, tubuh mega berasai mayuh angin, alergik, berat tubuh niki, selulit, hormon enda stabil enggau kulit enda sama.

Kena mutar penanggul tu, sida ke tetemuka penanggul patut mayuh agi makai pemakai beralkali baka timun, jagung, brokoli enggau jus delima.

Pekara pengabis mudah ukai semina dikena sida ti ngembuan toksin tang semua orang patut ngirup ai mineral enggau mayuh laban iya ulih neutralka tubuh ti berasid. Enti agi enda gerai lalu penyakit terus ngungut, pesakit dilalau berubat ngagai doktor enggau lengkas. Enti enda berubat penyakit tau betambah serius ngujungka iya tau ngasuh profil asid deoksiribonukleik baru ti meri empas ngagai anak ti deka diadaka.

Kereban Sanding:

http://kosmo.com.my