Pelasar Atur Sepil Jaku Iban

Jaku Iban tu siti ari jaku bansa asal di Malaysia. Iya udah dikena dalam pengawa betulis kenyau ari menua tu mula diperintah Rajah Brooke kelia. Taja pan iya udah jelan pengelama dikena dalam pengawa betulis, tang atur sepil iya lalu nadai kala udah digaga sebaka tauka standard. Sekeda orang ke udah nguji nusun dictionari enggau atur jalai jaku Iban (Iban Grammar) sigi udah nguji enggau naka ulih nengkebang atur sepil jaku Iban ti pemadu manah nitihka penemu sida iya empu.

Ambika banding, baka dalam A Sea Dayak Dictionary (D.J.S. Bailey enggau William Howell, The American Mission Press, Singapore, 1900). A Dictionary of Sea Dayak (N.C. Scott, School of Oriental and African Studies, University of London, 1956). The Iban Language of Sarawak, A Grammatical Description (Professor Dato Asmah Haji Omar, DBP, 1981). An Iban-English Dictionary (Anthony Richards, Oxford University Press, 1981). Kamus Bahasa Iban – Bahasa Malaysia (Hussien bin Jamil enggau Henry Gana Ngadi, DBP, 1989), Handy Reference Dictionary Of Iban and English (Vinson and Joanne Sutlive, Ampang Press Sdn. Bhd. 1994) enggau sekeda asil pengawa orang bukai ke bakanya.

Bepun ari sepil ti enda sebaka, dia pengawa ngemansangka jaku Iban bisi penyekat. Mayuh penulis ti deka nulis ngena jaku Iban nyau kapat. Sida enda nemu bagi atur sepil ti patut dititihka.

Nya alai enti jaku deka dikemansangka beserimbai enggau pengeran ati kitai ti deka ngemansangka bansa Iban, dia atur jalai nyepil jaku Iban ti lebih menyana sereta standard enda tau enda ditusun. Pelasar ti tegap dikena mutarka penyarut sepil jaku Iban enda tau enda digaga. Perkara tu pemadu beguna laban iya nyemakaka tauka 'pelaras' semua pengawa ngemansangka jaku Iban.

Tang mih pengawa milih lalau netapka perkara ti deka digaga nyadi pelaras lebuh nusun atur sepil jaku Iban nya ukai utai ti mudah dikereja. Nyangka nya mih kebuah pekara tu lalu agi mengkang majak diputarka sampaika sehari tu. Kebuah pengawa nya mar dikereja laban mayuh macham perkara ti mesti diperundingka dulu sebedau batang runding ulih ditetapka. Sekeda ari perkara ti patut diperundingka enti kitai deka ngaga atur sepil ti manah ke Jaku Iban nya baka tu:

1.   Atur Sepil jaku Iban nya patut nithka prinsip linguistik (linguistic prinsiples) ti betul ngambika atur sepil nya bisi penegap lalu ulih kena semua orang ke rindu nulis ngena jaku Iban. Reti nya, iya patut ngira mayuh macham hal pasal jaku nya baikka nya ari segi sistem enggau struktur munyi iya nya (fonologi) sekalika ari segi struktur jalai jaku, (grammar) ba jaku Iban.

2.    Atur Sepil jaku Iban nya patut ngembuan pengamat (authenticity) ti tinggi. Reti nya iya patut ngembuan chuan kediri. Iaya enda patut kena sekat tauka kena kuasa atur sepil jaku bansa bukai. Iya patut ulih bediri kediri sereta ulih nepatka nama iya ti dikumbai Atur Sepil jaku Iban.

3.    Atur Sepil jaku Iban nya patut ngembuan penyedang (simplicity). Reti nya iya patut ngira pasal atur jalai begunaka lambang ti patut, dikena nambahka urup ti endang udah sedia. Kelimpah ari nya, iya mega patut mudah, enda bebalut tauka enda mar dititihka semua orang.

4.    Atur Sepi jaku Iban nya patut ngembuan pengelentur (flexibility). Reti nya iya patut mudah dikena sereta ulih nangkup pemansang jaku Iban kedudi hari. Disebut ngena jalai sebengkah, atur sepil ti dipilih nya patut dinamik ngambika iya ulih dikena nipakka pemansang jaku Iban Era Wawasan 2020, baka dikena nyepil jaku injau kelebih agi dikena nyepil jaku ti dikena dalam penemu sains enggau teknologi. Reti nya atur sepil nya enda patut tekelalu ngemeratka penulin asal jaku Iban sampaika iya nyau tau nyekat pemansang jaku nya empu.

5.    Atur Sepil jaku Iban nya patut ngembuan pemudah dikena ti tinggi (practicality). Reti nya iya patut mudah diguna baikka nya mudah dipelajarka dalam sekula tauka mudah diguna be endur bukai. Iya patut ulih nyeliahka penyarut jalai nyepil leka jaku ti sebaka sepil tang enda. Sebaka jalai nyabut iya. Nambahka nya, atur sepil nya mega patut enda nanggul pemansang pelajar membiak dalam mata pelajar bukai.