Enda ulih dikenggai jaku
Iban diatu napi pemar ari sukut ngerembaika penemu enggau penerang. Penemu tu
kala dikenatai Menteri Muda Main Asal enggau Adat Lama, Liwan Lagang. Iya madah
pemansang penemu dalam mayuh bengkah bidang kelebih agi baka teknologi pemadah
(IT) ngujungka jaku sebagi ari guna nya.
Enti jaku Iban deka nyadi
sebengkah jaku ke mayuh guna, dia kitai enda ulih ngelarika diri ari ngambu, nginjau
enggau ngauk jaku bansa bukai. Ba pengagit kitai ke ngambu, ngauk enggau nginjau
jaku bukai laban ke enda tau enda dikena, tentuka penulin enggau penalam jaku Iban
empu patut mega terus dijaga.
Menua Jipun, Korea,
Peranchis, Jerman enggau sekeda menua bukai udah mansang sereta maju
bepelasarka penau jaku sida ke nyadi jaku ke chukup kering sereta tegap dikena
dalam bidang pelajar. Sida udah mujur ngetanka penegap jaku diri empu lalu
nempa jaku sida nyadi jaku ke dikena dalam bidang Sains enggau Teknologi, jaku
ba librari enggau mayuh sukut penemu ke bukai. Nya kebuah, menua ti baka tu tau
nyadi peransang tauka chuan sereta teladan ngagai jaku Iban kena nyaga penulin
jaku diri empu lalu ukai nagang jaku Iban ari dikemansangka.
Nangkanka nya mega,
tanggung pengawa bala pengajar jaku Iban nyadi ijin pemansang nyaup ngerembaika
jaku Iban awakka mengkang diguna dalam bidang pelajar kelimpah ari besaup napi
pemar dudi hari enggau chara ti profesional.
Dikena ngerembai enggau
ngangkatka jaku Iban setipak sereta seraris enggau jaku bansa bukai dia pengawa nya patut dikereja besaup sereta
belabuh ari diatu. Ba pekara tu, sistem pelajar endang nyadi pelasar ti pemadu
manah dikena ngambuh serak ke diatu ngenegapka jaku Iban. Semua raban ti bisi kaul enggau jaku Iban baka
sekula, opis pelajar, RTM, opis pemadah, DBP, institut pelajar tinggi enggau NGO
Iban patut sedada sama seati sereta sepenemu bekerejasam mantu nyaga, ngetan,
ngemansang sereta ngerembaika jaku Iban ngambika enda mudah retai dipanchar
panas pemansang ubah dunya.
Tiada ulasan:
Catat Ulasan