Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Sabtu, 18 Jun 2016

UNIT 11 AYAT TUNGGAL



11.1   Pun Jaku

Jalai beratika ayat bisi mayuh chara. Siti ari chara beratika tukuh ayat nya ngena jalai beratika pemayuh klausa ke bisi ditemu dalam sesebengkah ayat. Reti nya penyampau klausa ti bisi ditemu dalam sesebengkah ayat nya ulih nentuka bansa ayat.

Ayat ti semina ngundan siti klausa aja, iya dikumbai ayat tunggal. Enti ayat bisi ngundan lebih ari siti klausa, iya dikumbai ayat turu. Pekara ti deka diterangka ditu ia nya ari aspek:

(i)         Tukuh ayat tunggal
   (ii)        Tusun konstituen ayat tunggal
(iii)       Bengkah ayat tunggal
(iv)       Ayat aktif
(v)        Ayat pasif

11.2   Tukuh Ayat Tunggal

Ayat tunggal dibagi ngagai dua elemen ti dikumbai subjek enggau predikat. Subjek nya rambai jaku ti nyadi pugu ayat lalu predikat nya elemen ti nerangka subjek.

Chunto:

Subjek
Predikat
1. Majang
2. Sida nya
3. Nembiak nya
4. Anak mit nya
5. Sida menyanak
6. Ukir nya
7. Ugap
tuai rumah.
nembiak sekula.
meli kasut.
udah tinduk.
datai ari Miri.
manah amat.
ke Kuching.


11.3   Tukuh Subjek Ayat Tunggal

Subjek ayat tunggal tau digaga ari rambai jaku nama ti dipenyadi ari elemen tu:

  (i)         Jaku nama
   (ii)        Jaku ganti nama
(iii)       Jaku pengawa ti nyadi jaku nama
(iv)       Jaku adjektif ti nyadi jaku nama

11.3.1  Subjek Jaku Nama

Subjek jaku nama tau digaga ari jaku nama rama, jaku nama menyana tauka jaku nama tumbuh.

Chunto:

Subjek (Jaku Nama Rama)
Predikat
8.     Menyadi iya
9.     Buah limau nya
10.   Lubuk nya
polis.
ungkup indai.
dalam amat.


Subjek (Jaku Nama Tetap)
Predikat
11.  Galang
12.   Bukit Lanja
13.   Lang Ngelayang

lemambang beberita.
di menua Bagi Sri Aman.
jejuluk perau pelumba iya.

Subjek (Jaku Nama Tumbuh)
Predikat
14.  Penyalah nya
15.  Pengeraja
16.  Pengerindu iya ke Ita
17.  Pengeliat ati nya
18.  Pengaga ati iya

bepun ari penyilap iya empu.
enda alah giga sehari dua.
nadai bebagi.
kunchi ke pemujur iya.
bepanchar ba mua iya.

11.3.2  Subjek Jaku Ganti Nama

Subjek jaku ganti nama tau digaga ari jaku ganti nama orang tauka ganti nama penunjuk.
Chunto:

Subjek (Jaku Ganti Nama Orang)
Predikat
19. Aku
20. Sida
21. Nuan

kerani.
datai kemari.
bedau ngelala aku.

Subjek (Jaku Ganti Nama Penunjuk)
Predikat
22.  Tu
23.  Nyin
24.  Nya
kandang Taman Budaya.
perau kami.
kasut nuan.

11.3.3  Subjek Jaku Pengawa

Jaku pengawa mega tau dikena ngaga subjek ayat baka ba ayat ti di baruh tu:

Subjek (Jaku Pengawa)
Predikat
25.  Macha mayuh bup
26.  Nyemerai
27.  Ngarang nya
28.  Ngemulaka orang nya
29.  Nulung orang tusah nya
ulih nambahka penemu.
ngasuh tubuh gerai.
pengawa sambil iya.
perangai jai.
sigi pengawa dikerinduka iya.

11.3.4  Subjek Jaku Adjektif

Sekeda jaku adjektif tau mega dikena ngaga subjek ayat.

Chunto:

Subjek (Jaku Adjektif)
Predikat
30.  Banda nya
31.  Mit
32.  Bingking nya
33.  Seranta
34.  Berani nya
sigi chura asal pua kumbu Iban
enda mesti  lemi.
perangai jai.
ukai utai dikedeka iya.
sigi patut perangai pungka lelaki.


11.4  Tukuh Predikat

Predikat ayat tunggal tau digaga ari elemen ti baka tu:

  (i)         Rambai jaku nama
   (ii)        Rambai jaku pengawa
(iii)       Rambai jaku adjektif
(iv)       Rambai jaku penempat

11.4.1  Predikat Rambai Jaku Nama

Subjek
Predikat (Jaku Nama Tetap )
35.  Iya
36.  Rumah lama nyin
37.  Jematan baru nya

Penghulu.
Mijum Nengeri Sarawak.
Jematan Sungai Kayan.

Subjek
Predikat (Jaku Nama Rama )
38.  Nanang
39.  Nembiak nya
40.  Langkau mit nya
tukang kasut.
anak iru aku.
bansal injin padi aku.

Subjek
Predikat (Rambai Jaku Nama Tumbuh)
41.  Pekara ti nyadi nya
42.  Pemeresi nya
43.  Pengawa nya
pengerugi besai ba iya.
pengerai.
pengeribat ba iya.


11.4.2  Predikat Rambai Jaku Pengawa

Jaku pengawa ti dikena ngaga predikat sesebengkah ayat tau dipenyadi ari dua bansa elemen, iya nya:

  (i)          Jaku pengawa asal
   (ii)        Jaku pengawa tumbuh
(iii)       Jaku bantu
(iv)       Elemen penerang dalam predikat

(i)  Jaku pengawa asal

Jaku pengawa asal tu bisi dua bansa, iya nya:

(a) Jaku pengawa asal nadai bepenambah
(b) Jaku pengawa asal tumbuh

(a)  Jaku pengawa asal nadai bepenambah

Jaku pengawa asal nadai bepenambah ti baka tu endang berasal ari jaku pengawa ti nadai bepenambah. Iya tau jaku pengawa transitif tauka jaku pengawa intransitif. Sekeda jaku pengawa asal intransitif nya baka : datai, tinduk, terebai, ketawa, lenyau, pulai.

Chunto:

Subjek


Predikat (Jaku Pengawa Asal )
Jaku Pengawa Intransitif
Penerang
44.  Anak mayau nya
45.  Sida
46.  Bada
tinduk.
udah datai
mandi

kemari.
di sungai.

(b)  Jaku pengawa asal bepenambah

Jaku pengawa asal bepenambah nya leka jaku tumbuh ti sigi berasal ari jaku pengawa. Jaku pengawa nya tau jaku pengawa transitif tauka jaku pengawa intransitif. Sekeda jaku pengawa asal bepenambah baka: nirika, ngangau,  ngeransi.

Chunto:

Subjek
Predikat
47.  Kami
48.  Bala sida
49.  Igat
nindukka diri pukul sebelas malam.
ngangau inggar bendar.
ngeransi.

Sekeda jaku pengawa asal tumbuh nya baka ngirai, nyadung, ningaka.

Chunto:  


Subjek
Predikat
Jaku Pengawa  Transitif
Objek
50. Luga
51. Galang
52. Sida
ngirai
nyadung
ningaka
baur ginti iya.
surat kabar.
jaku pesan ari radio.

(ii)  Jaku pengawa tumbuh

Jaku pengawa tumbuh nya jaku pengawa ti dipenyadi ari meri penambah ngagai leka jaku ti ukai berasal ari jaku pengawa. Jaku pengawa tumbuh ti digaga baka tu nya jaku pengawa transitif lalu ulih nerima objek terus.

Chunto:

Subjek
Predikat
Jaku Pengawa Transitif
Objek

53.  Sangga
54.  Anak
55.  Jaku kasar Juna
56.  Iya
57.  Aban
ngeraga
patut mendingka
ngemediska
bejalaika
nyangkul
pun pisang iya.
jaku ajar apai indai.
ati apai iya.
pengawa perintah.
bakut sayur iya.
  
(iii)  Jaku bantu

Jaku bantu ti nyadi elemen rambai jaku pengawa nya leka jaku ti dikena sebedau jaku pengawa. Jaku bantu bisi dua bengkah:

(a)        Jaku bantu aspek
(b)        Jaku bantu gaya

(a)  Jaku bantu aspek

Jaku bantu ti bansa tu nya jaku bantu ti nerangka maya utai nyadi, baka:

deka         benung          tengan          udah           baru
apin          empai            kala              bedau          lama

*  Ba sekeda maya leka jaku apin, empai enggau bedau tu leka jaku ti sebaka reti ke nerangka pengawa ti bedau nyadi. Chunto jalai ngena jaku bantu aspek dalam ayat nya baka tu:

Subjek
Predikat
58.  Rumah nya
59.  Sida sebilik
60.  Aku
61.  Sida sebilik
62.  Iya
63.  Sida sebilik
64.  Kami
65.  Anak mit nya

bedau beatap.
benung makai.
kala nemuai ke Kuala Lumpur.
deka datai pagi ila.
udah nemu saut ke tanya nya.
baru deka makai lemai.
benung deka bekejang ari pengkalan.
bedau deka makai.

(b)   Jaku bantu gaya

Jaku bantu gaya nya jaku bantu ti nerangka gaya asai ati ti bekaul enggau pengawa. Sekeda ari jaku bantu gaya nya baka: aruh, mesti , ulih, deka, patut

Chunto:

Subjek
Predikat
66.   Apai Igat
67.  Jang
68.  Nuan
69.   Kita
deka ngalu ke pasar.
endang mandi di sungai.
mesti datai pagi ila.
patut nemu berita nya.


(iv)  Elemen penerang

Kedua-dua rambai jaku pengawa transitif enggau rambai jaku pengawa intransitif sama bela tau nerima elemen penerang. Elemen penerang nya nerangka jaku pengawa. Elemen penerang nya digaga ari rambai jaku penempat, baka: enggau jampat, di kedai, maya pagi hari, ke penguntung diri empu, enggau kerita diri empu, enggau sida sebilik, pasal pekara nya, baka orang kaya etb.

Chunto:

70. Sida mulaika diri maya ngalih hari.
71. Iya ngereja pengawa nya ke penguntung diri empu.
72. Iya ngusung orang ke rami ngena perau baluk.
73. Sida berandau pasal pekara nya.
74. Iya meli barang nya di kedai.

11.4.3  Predikat Rambai Jaku Adjektif

Rambai jaku adjektif ti dikena ngaga predikat ayat tau dipenyadi ari jaku adjektif rama tauka jaku adjektif betandu. Chunto jaku adjektif nya baka tu:


Jaku Adjektif Rama
Jaku Adjektif Betandu
Mit
besai
pandai
sedap
gemu
simpi
mit-mit
baruh-baruh
kurus-kurus
manah-manah
tinggi-tinggi
tebal-tebal

Chunto rambai jaku adjektif rama ti nyadi predikat ayat:

Subjek Rambai Jaku Nama
Predikat Rambai Jaku Adjektif Rama
75. Dandang kebun nyiur nya
76. Anak chauk nya
77. Dandang kebun kelapa sawit nya
78. Anak sapi nya
79. Nembiak nya
80. Ganya
besai.
gemu.
besai amat.
gemu amat.
pemadu pintar ba kelas sida.
tinggi agi ari Kedit.

  
Chunto rambai jaku adjektif betandu  ti nyadi predikat ayat:

Subjek Rambai Jaku Nama
Predikat Rambai Jaku Adjektif Betandu
81. Bala pemain nya
82. Duku nya
83. Semua kuli nya
ganggam-ganggam magang.
tumpul-tumpul magang.
rajin-rajin magang.


11.4.4  Predikat Rambai Jaku Penempat

Rambai jaku penempat ti nyadi predikat nya digaga bepun ari jaku penempat lalu ditangkanka jaku nama. Chunto jaku penempat:

di
ba
ari
ngagai
ungkup
ke
enggau
semak

Chunto rambai jaku penempat:

di rumah
ba bilik besai
ari menyadi iya
ngagai semua sida
ungkup indai
ke sekula
enggau apai iya

Chunto jalai ngena rambai jaku penempat ti nyadi predikat ayat nya baka tu:

Subjek
Predikat Rambai Jaku Nama
84. Aki aku
85. Rumah kami
86. Indai
87. Pesan tu
88. Pemeri nya
di rumah.
ba Jalai Arang.
ke pasar pagi tadi
ari kepala pengajar.
ungkup indai.

11.5   Tusun Konstituen Ayat Tunggal

Ayat tunggal digaga ari dua konstituen, iya nya subjek enggau predikat. Ayat tunggal bisi dua tukuh, iya nya:

(i)  Tusun Selama
(ii) Tusun Tunsang

11.5.1  Tusun Selama

Dalam tusun selama, konstituen subjek diengkah dulu ari konstituen predikat.

Chunto:

Subjek
Predikat
89. Tuai rumah kami
90. Semua peminta
91. Sida nya
landik ngatur penyarut nembiak iya.
deka diperatika magang.
udah nemu macha magang.

11.5.2  Tusun Tunsang

Ayat tusun tunsang bemuaka predikat. Proses mindahka predikat ngagai pun ayat dikumbai ngemuaka predikat. Proses ngemuaka predikat tau nyadi baka tu:

(i)         Ngemuaka sekayu predikat
(ii)        Ngemuaka sebagi ari predikat

(i) Ngemuaka sekayu predikat

Dalam proses ngemuaka sekayu predikat, sekayu konstituen predikat diengkah ari mua subjek. Peratika chunto ayat ti nangkan tu:

Ayat Selama
Ayat Tunsang
Subjek
Predikat
Predikat
Subjek
92. Perangai    
      nembiak nya        
manah amat.
93. Manah amat
perangai nembiak nya.
94. Ular nya
udah mati.
95. Udah mati
ular nya.
96. Kinyang
nemu nibarka jala.
97. Nemu nibarka
      jala
Kinyang.         
98. Orang tuai nya
rajin amat.
99. Rajin amat
orang tuai nya.
100. Nuan
betuah amat.
101. Betuah amat
nuan.

(ii)  Ngemuaka sebagi ari predikat

Dalam proses ngemuaka sebagi ari predikat, sebagi aja ari konstituen predikat diengkah ari mua subjek. Bagi rambai jaku ti patut diengkah ba mua subjek nya bisi tiga bengkah, iya nya:

      (a)        Ngemuaka rambai jaku pengawa
(b)        Ngemuaka rambai jaku adjektif
(c)        Ngemuaka rambai jaku penempat

(a)  Ngemuaka rambai jaku pengawa

Dalam proses ngemuaka rambai jaku pengawa, bisi tiga pekara tau nyadi, iya nya:

Semina leka jaku pengawa aja diengkah ari mua subjek
Leka jaku pengawa enggau objek diengkah ari mua subjek
Leka jaku bantu enggau leka jaku pengawa diengkah ari mua subjek

(a)        Ngemuaka jaku pengawa aja

Peratika chunto ayat dalam langkar tu.

Ayat Selama
Ayat Tunsang
Subjek
Predikat
Predikat
Subjek
102. Igat
     
ngarai  buah berangan di tanah.
103.  Ngarai
         buah    
         berangan      
        di tanah
Igat.
104. Kami  
        serumah
beduruk lebuh meresi kandang rumah.
105. Beduruk
kami serumah lebuh meresi kandang rumah.
106. Kami
begulai maya agi biak menya.
107. Begulai
kami maya agi biak menya.
108. Anak
        mayau
        nya
tinduk dalam sintung.
109. Tinduk
anak mayau nya dalam sintung.
110. Anak mit
       nya
nyabak tiap-tiap lemai.
111. Nyabak
anak mit nya tiap-tiap lemai.

   Ngemuaka jaku pengawa enggau objek

Ayat Selama
Ayat Tunsang
Subjek
Predikat
Predikat
Subjek
112. Anggat
ngaga kereja rumah di bilik.
113. Ngaga kereja
        Rumah
Anggat di bilik.

114. Girang
bekebun sayur taun tu.
115. Bekebun   
       Sayur
Girang taun tu.
116. Anggan
nunu uras di lubang kebung.
117. Nunu uras
Anggan di lubang kebung.

    Ngemuaka jaku bantu enggau jaku pengawa

Ayat Selama
Ayat Tunsang
Subjek
Predikat
Predikat
Subjek
118. Bala pengabang
bedau makai.
119. Bedau
        makai
bala pengabang.
120. Sida menyanak
udah datai di Kuching.
121. Udah
       datai
sida menyanak di Kuching.
122. Sida Kareb        
        Aran
deka nemuai ngagai Bario.
124. Deka 
        nemuai
ngagai Bario sida Kareb Aran.

(b)        Ngemuaka rambai jaku adjektif

Atur ngemuaka predikat rambai jaku adjektif nyau deka sebaka enggau atur ngemuaka predikat rambai jaku pengawa. Ba ayat selama, jaku adjektif dikena entudika subjek. Ba ayat tunsang, jaku adjektif diengkah ari mua subjek. Dalam proses ngemuaka rambai jaku adjektif, bisi dua pekara tau nyadi, ia nya:

Ngemuaka jaku adjektif aja
Ngemuaka jaku bantu enggau jaku adjektif

Ngemuaka jaku adjektif aja

Ayat Selama
Ayat Tunsang
Subjek
Predikat
Predikat
Subjek
124. Iya
kiruh maya nya.
125. Kiruh
iya maya nya.
126. Buah
        temedak
        nya
uping.
127. Uping
buah temedak nya.
128. Orang tuai nya
pilai.
129. Pilai
 orang tuai nya.

 Ngemuaka jaku bantu enggau jaku adjektif

Ayat Selama
Ayat Tunsang
Subjek
Predikat
Predikat
Subjek
130. Bubu nya
agi manah.
131. Agi manah
bubu nya.
132. Orang tuai
        nya
benung sakit
raya di hospital.
133. Benung sakit
        raya
 orang tuai
nya di hospital.
134. Anak
        penghulu nya
patut mereti.
135. Patut mereti
anak penghulu
nya.

(c)  Ngemuaka rambai jaku penempat

Dalam ayat selama, predikat rambai jaku penempat diengkah entudika subjek. Dalam ayat tunsang, rambai jaku penempat diengkah ari mua subjek. Dalam proses ngemuaka rambai jaku penempat, bisi dua pekara tau nyadi, iya nya:

Rambai jaku penempat nyadi predikat
Rambai jaku penempat nyadi penerang dalam predikat

Rambai jaku penempat nyadi subjek

Ayat Selama
Ayat Tunsang
Subjek
Predikat
Predikat
Subjek
136. Asi bungkus
        nya
ungkup indai.
137. Ungkup
        indai
asi bungkus nya.
138. Jaku pesan   
        nya
ari Laura.
139. Ari Laura
jaku pesan nya.
140. Surat nya
agi ba aku.
141. Agi ba aku
surat nya.
                                                                           
Rambai jaku penempat nyadi penerang dalam predikat

Ayat Selama
Ayat Tunsang
Subjek
Predikat
Predikat
Subjek
142. Kitai
        serumah
deka baum  ba ruai tuai rumah.
143. Ba ruai tuai
        rumah
kitai serumah deka baum.
144. Bala
        duruk
mulaika diri maya mata panas lindung lebak.
145. Maya mata
        panas  
       lindung  lebak
bala duruk mulaika diri.

11.6  Ayat Aktif enggau Ayat Pasif

Ayat aktif nya ayat ti ngundan jaku pengawa ke lebih ngemeratka subjek nyadi ke batang pekara ke diterangka. Ayat pasif nya ayat ti ngundan jaku pengawa ke lebih ngemeratka objek. Ayat aktif tau digaga ari ayat aktif transitif tauka ayat aktif intransitif.

Chunto:
Bansa ayat
Subjek
Predikat
Ayat aktif transitif
146. Ajang
147. Anak mayau nya
148. Ukui nya
149. Apai aku
nyipat buah empelam.
nangkap tichak.
nyalak landak.
ngeban perau nya.
Ayat aktif intransitif
150. Anak chauk nya
151. Bala nembiak nya
nusu ba indai iya.
mandi di sungai.

Chunto ayat pasif:

152. Buah empelam disipat Ajang.
153. Tichak ditangkap anak mayau nya.
154. Landak disalak ukui nya.
155. Perau nya diban apai aku.

** Ayat aktif intransitif enggai nyadi dipasifka laban pengawa dikereja ngagai diri empu.

11.7   Bagi Ayat Aktif

Ayat aktif tau dibagi ngagai dua bengkah, iya nya:
           
(i)         Ayat aktif transitif
(ii)        Ayat aktif intransitif

11.7.1  Ayat Aktif Transitif

Ayat aktif transitif tau digaga ari:

(i)         Ayat aktif transitif mai siti objek
(ii)        Ayat aktif transitif mai objek terus enggau objek sangking
(iii)       Ayat aktif transitif mai objek terus  enggau rambai jaku penempat nyadi  penerang

(i)  Ayat aktif transitif mai siti objek

Subjek
Predikat
Jaku Pengawa Transitif

Objek
156. Pengajar Bantan
157. Kami serumah
158. Kabut biau balai
159. Indu manyi
160. Ai bah nya
ngiga
ngupas
numbangka
ngaga
ngampuhka
nuan.
jalai umai.
pun tapang nya.
madu ari sepur bungai.
puchuk ensurai.

(ii) Ayat aktif transitif mai objek terus enggau objek sangking

Subjek
Predikat
Jaku Pengawa Transitif
Objek Terus
Objek Sangking
161. Indu nya
162. Nagi
163. Luma
meri
melika
nyaitka
aku
adi  
adi iya
sechangkir  kupi.
sepasang kasut.
baju.

(iii)  Ayat aktif transitif mai objek terus  enggau rambai jaku penempat nyadi penerang.

Subjek
Predikat
Jaku Pengawa Transitif
Objek Terus
Penerang
(Rambai Jaku Penempat)
164. Indu nya
165. Nagi
166. Luma
mai
meli
nganjung
sechangkir kupi
kasut
batu pengansah
ke aku.
ke adi iya.
ngagai apai iya.

11.7.2  Ayat Aktif Intransitif

Ayat aktif intransitif nya ayat ti ngundan jaku pengawa intransitif ti enda ulih nerima objek. Ayat aktif intransitif bisi dua bansa, iya nya:

(i)         Ayat aktif intransitif ngundan penerang ti tau ditingkilka
(ii)        Ayat aktif intransitif ngundan penerang ti enggai nyadi
ditingkilka

(i)  Ayat aktif intransitif ngundan penerang ti tau ditingkilka

167. (a) Bala nembiak benung bemain bol di padang.
        (b) Bala nembiak benung bemain bol.

168. (a) Panjuk nya nyintak pelanduk ba rekung.
        (b) Panjuk nya nyintak pelanduk.

(ii)  Ayat aktif intransitif ngundan penerang ti enggai nyadi ditingkilka

169. (a) Apai Igat belinsur gerai.
        (b) Apai Igat belinsur. (Salah)

170. (a) Orang nya berasal ari India.
        (b) Orang nya berasal. (Salah)

11.8   Bagi Ayat Pasif

Ayat pasif jaku Iban tau dibagi ngagai tiga raban, iya nya:

(i)         Ayat pasif enggau jaku pengawa bepenambah pasif
(ii)        Ayat pasif enggau jaku ganti nama orang kesatu enggau orang kedua
(iii)       Ayat pasif enggau jaku bantu pasif kena

11.8.1  Ayat Pasif enggau Jaku Pengawa Bepenambah Pasif

Dalam jaku Iban penambah pasif ke pemadu suah dikena nya penambah di-

Chunto:

Subjek
Jaku Pengawa Pasif
Rambai Jaku Nama
Penerang
171. Barang nya
172. Pagar chapi nya
173. Sungai nya
deka diambi
udah diseruri
diberesi
Minggat
sida
kami serumah
lusa.
dua hari lalu.
tadi.


11.8.2  Ayat Pasif enggau Jaku Ganti Nama Orang

Ayat pasif tu bisi dua bansa:

(i)         Ayat pasif ngundan jaku ganti nama orang kesatu
(ii)        Ayat pasif ngundan jaku ganti nama orang kedua

Ayat pasif ti baka tu ngundan jaku pengawa pasif ti diengkah nangkan urat jaku pengawa.

Chunto:

Subjek
Rambai Jaku Pengawa Pasif enggau Jaku Ganti Nama Orang Kedua
Penerang
177. Bup nya
178. Kereja nya
179. Ai perau nya
udah nuan bacha
patut kita tembu
udah  kua timba

kemari.
enggau jampat.
ngena gayung.

11.8.3  Ayat Pasif enggau Jaku Bantu Pasif Kena

Ayat pasif  ti bansa tu ngundan jaku bantu kena ti diengkah ba mua leka jaku pengawa.

Chunto:

Subjek
Kena
Urat Jaku Pengawa
Penerang
180. Barang nya
181. Sida
182. Penchuri nya
kena
kena
kena
jual
bayar
timbak
orang.
gaji lebih.
bala polis.

11.9   Elemen Pilih dalam Rambai Jaku Predikat

Kelimpah ari ti digaga ari rambai jaku nama, rambai jaku pengawa, rambai jaku adjektif enggau rambai jaku penempat, predikat ayat tunggal mega tau digaga ari elemen ti baka tu:

(i)         Jaku sangkal
(ii)        Jaku pemadah

11.9.1  Jaku Sangkal

Jaku sangkal nya leka jaku ti dikena nerangka pekara ti negatif. Jalai madahka pekara ti negatif bisi empat bengkah, iya nya ukai, nadai, enggai enggau enda.

Chunto:

183. Nya ukai pen aku.
184. Pengawa nya ukai pengawa aku.
185. Iya nadai mai bup nuan.
186. Nyin ukai rumah kami.
187. Iya nadai diau di rumah.

11.9.2 Jaku Pemadah

Jaku pemadah nya nerangka pekara ti nyadi bekait-kait. Jaku pemadah ke suah dikena nya baka, iya nya.

188.  Chura ti dikerinduka iya, iya nya banda.
189.  Tuju kurikulum pelajar iya nya dikena nempa nembiak nyadi mensia ti  menyana.
190.  Pengajar ti ngajar kami Jaku Iban iya nya Pengajar Lulong.

11.10   Simpul Penemu

Ayat tunggal jaku Iban nya ayat ti dipenyadi ari siti elemen subjek enggau siti elemen predikat. Ayat tunggal tau betusun selama ti alai subjek ditangkan predikat, tauka betusun tunsang ti alai predikat diengkah ba mua subjek. Kelimpah ari nya ayat tunggal mega tau digaga dalam tukuh aktif tauka pasif.

Tiada ulasan:

Catat Ulasan