KOMUNITI kitai
kemaya hari tu balat bendar ngemeratka maya kereja. Nya alai, mayuh ari sida tu
nyau tengelam dalam pengiruh pengawa sehari-sehari ngujungka sida milih jalai
mudah ngambi pemakai ti rumpas sereta mudah disediaka maya sida lapar.
Sekeda ari sida tu enda nemu pemakai ti baka tu berisiko
mai penyakit raya ti tau nganu enti iya diambi lebih ari patut.
Undan lanyih enggau garam ti tinggi dalam pemakai rumpas
disedia ulih ngasuh sida ke rindu bepakaika pemakai tu napi penanggul gemu
enggau obesiti kelimpah ari sekeda penyakit bukai.
Pansik Opis Menteri Pengerai dalam taun 2006 madahka 14
persin rayat menua tu napi penanggul obesiti lalu kes tu majak betambah genap taun.
Pansik tu mega ngayanka penambah
penyampau nembiak mit ti dinahka enggau pemakai rumpas sedia lalu sida tu mega
kurang makai pemakai ti bepengerai baka buah enggau sayur.
Sekeda pansik bukai mega madahka obesiti bisi mai empas ti enda manah ngagai pengerai seksual.
Asil pansik ti pengabis baru di Perancis enggau Britain ti dikeluarka British
Medical Journal ke dikembuan Gerempung
Perubat British madahka orang tuai ti obes kurang regas dalam pengawa beleman
tauka kaul seksual. Ambika banding, sida lelaki suah agi napi penanggul enda
ulih enchegi lalu sida ke indu nya nyangka napi penanggul kandung ti enda
diperambu.
Mensia mayuh patut nemu pemesai guna gaya pengidup
bepengerai sereta meretika empas ari makai pemakai ti rumpas disediaka nya.
Opis Menteri Pengerai mega patut nambahka pemayuh kimpin pengerai dikena meransang mensia mayuh nyaga
pengerai kelebih agi ba anak sida empu. Apai indai patut negmbuan pemereti ati
ti tinggi lalu semampai merati sereta nyaga pemakai sida sebilik ngambika ulih
nyeliahka sida sebilik ari risiko penanggul ba pengerai.
Tiada ulasan:
Catat Ulasan