Impak ngemaduka GST ngagai kos daya idup rayat

CHUKAI Barang enggau Servis (GST) ti dipejalaika di Malaysia kena 1 April 2015 ngembuan tuju ke deka ngemanah lalu nusun baru struktur chukai menua ngambika semitan agi, rentang, efisien sereta ludas.

Kelimpah ari nya, iya mega ngembuan tuju ke deka napi pengelemi dalam sistem Chukai Jual enggau Servis (SST) ti dikena ngelama tu kenyau ari taun 1970-an kelimpah ari cukai bukai ke belunjak tauka betingkat, pemindah rega enggau nilai, nadai pengurang chukai ti genap baka barang ti dieksport, isu-isu klasifikasyen enggau pekara bukai.

SST ti diletakka perintah mungkur chukai jual nitihka kadar 5 persin, 10 persin enggau spesifik agi chukai servis 10 persin lalu kadar standard 6 persin diletak ungkup GST ba barang sereta servis.

Belalulauka GST ti udah dipejalaika kenyau ari bulan April 2015 dia perintah bisi madahka RM27 bilion udah mujur dikumpul dalam taun 2015, RM41.2 bilion (2016) enggau RM44 bilion (2017).

Taja pia, baru-baru tu perintah ke baru udah madahka GST nya ila deka diletakka ba kadar sifar tauka kusung lalu atur tu deka dikena ba serata menua Malaysia berengkah ari 1 Jun tu ila.

Nitihka Pengelicha Kanan Fakulti Ekonomi enggau Manajemen Universiti Putra Malaysia, madahka, langkah rapat nya diperatika ari chara teknikal. Reti nya GST udah dikemaduka lalu deka diganti enggau SST. Mensia mayuh ngelama tu pechaya GST nya ke pun rega barang niki. Sida ngasaika nyau lebih ari peniki gaji sida ngujungka gasa meli sida mega nurun lalu nekan pengidup sida.

Taja pia nitihka pengelicha tu mega, kos daya idup enda nyadi penanggul di Malaysia enti kadar pemansang penatai pemisi tinggi agi bebanding enggau pemansang rega barang. Besenutuk enggau nya, iya madahka faktor GST enda meri empas ti signifikan ngagai kos daya idup laban ku iya rega barang niki ukai semina ketegal sistem chukai aja.

Nitihka prinsip ekonomi, kos GST ti dibayar raban ke bejalaika pengawa dagang nya baruh agi bebanding SST laban iya nya chukai ke diletak ke atas nilai ditambah ti diulih ari genap rintai raban ke mekal barang. Lebuh kos ngeluarka barang nya baruh agi, rega barang deka nurun tang hal tu enda nyadi sepengudah tiga taun GST dipejalaika.

Pansik ngayanka bisi empat faktor ke ngasuh rega barang majak niki sepengudah GST dipejalaika.

Keterubah iya, tikas penyampau raban orang dagang ke nitihka sistem GST agi baruh. Nitihka pansik, enda datai 50 persin ari firma ngerejistaka diri. Enti nitihka sida patut nitihka atur nya ba tikas 100 persin.

Kedua, raban penerit adat enda bebendar bejalaika pengawa sida ngujungka orang dagang manipulat rega barang di makit.

Faktor ketiga mungkur pemereti penemu orang dagang ke agi baruh lalu baka nya mega  raban pengguna enggau sida ke patut ba pengawa tu senentang sistem chukai pengguna nya.

Faktor keempat iya nya rega barang niki ketegal pengelemi nilai ringgit ke ngasuh import nyadi mar agi, upah minimum ti nikika kos pekereja lalu disempulang enggau struktur makit ti betukuh monopoli.

Faktor keterubah ngagai ketiga enda relevan agi enti GST nya dikemaduka ila tang  faktor keempat agi relevan.

Impak ke atas rega barang ketegal GST dikemaduka nyangka enda mai empas tauka semina mai empas ti minimum aja ketegal pengeluar agi nanggung kos pengeluar ti niki ketegal ari kos import kereban mata (raw material) enggau kos pekereja.

Kelimpah ari nya mega, makit ke betukuh monopoli mega nekanka raban orang bedagang mit enggau jelan pemesai lebuh sida dipejal besemekih kompetitif agi enggau orang bukai.

Besenutuk enggau nya, Pengelicha ba Pusat Pengajian Pembangunan Sosial enggau Ekonomi Universiti Malaysia Terengganu, madahka, lebuh ke deka mutarka penanggul  kos daya idup ti nanggulka rayat kemaya hari tu dia perintah patut meri perati ngagai pugu komponen ke ngasuh mensia mayuh bebelanja besai.

Bepelasarka sidi Penyiasatan Perbelanjaan Isi Rumah 2016 ti dikeluarka Opis Statistik madahka  belanja pengguna isi rumah bulan-bulan di Malaysia pukul rata udah niki ari RM3,578 dalam taun 2014 ngagai RM4,033 dalam taun 2016.

Rumah, bil ai, lektrik, gas enggau kereban api nya begunaka belanja ti besai iya nya kira-kira 24 persin ari semua belanja raban pengguna. Tu ditangkan enggau pemakai enggau ai irup iya nya 18 persin, kereban pengangkut (13.7 persin) sereta restoran, kulau enggau hotel (13.4 persin).

Kelimpah ari restoran enggau hotel ti dikiraka sebengkah ari belanja gaya idup, tiga komponen bukai ke nyadi pelasar belanja patut bendar diperatika perintah enggau silik.

Mayuh bengkah faktor ti ngasuh rega barang niki. Mayuh agi nya ketegal faktor rega minyak ke meri empas ngagai kos pengangkut, tol enggau ti bukai. Taja pia, rega minyak ke nurun sebedau tu nadai mega ngasuh rega barang nurun.

Kelimpah ari nya, barang mega bekos tinggi ketegal peminta ke tinggi bebanding ari iya ke ulih dikeluarka maya musin hari besai, empas pengelemi mata wang lokal bebanding mata wang menua bukai ti meri impak ngagai kos ngimport barang sereta ditambah enggau ulah orang dagang ke nadai betanggung pengawa nikika rega barang sepeneka ati sida.

Perintah patut mega meri timbang penemu ti engkeman sebedau ngemaduka GST, meratika iya enggau silik agi ngambika iya ulih nyadi sebengkah chukai ti betukuh progresif bebanding tukuh regrasif sebedau tu ke ngujungka iya meri empas negatif ngagai raban ke bepenatai pemisi ti baruh. GST udah ngayanka evidens ke nambahka penatai pemisi menua enti dibandingka enggau SST tang GST ke bisi diatu balat agi betukuh regresif. Enti GST deka diteruska dia mekanisme ti baru patut diperindingka ngambika iya amat-amat meri pemanah ngagai rayat.