Sapa Mih Pengajar

Sapa Mih Pengajar

16 May genap taun rayat Malaysia kelebih agi bala nembiak enggau raban pengajar ngintu hari besai dikena ngingatka bala pengajar; hari ke dikumbai Hari Pengajar tauka Hari Guru dalam jaku Melayu sereta Teachers Day dalam jaku English. Ninting taun aku mega baka bala bukai ngenataika basa aku ngagai bala pengajar nengah chara aku empu ba blog aku tu. Bisi maya aku ngenataika leka jaku berambai dikena aku meri puji ngagai pengajar lalu bisi mega maya aku nulis artikel bekaul enggau pengidup pengajar. 

Kitai sama bela nemu semua kitai tu berutang basa ngagai bala pengajar kelebih agi ketegal penyadi kitai sepengudah ninggalka sekula. Enti kitai diasuh nerangka sapa pengajar pelabaka aku ukai pekara ti mudah dikereja. Tang cherita wayang baka To Sir with Love enggau drama Malaysia empu, Adiwiraku tentu ulih mantu kitai meri sekeda idea sapa ke patut digela pengajar. Enti kitai meda ari sukut rama, sida tu mih orang ke meri impak ngagai kitai sereta enggau pengidup kitai. Nya mih ngujungka sida nyadi orang ke ditambun kitai puji tauka digela kitai hero tauka ikon. Pengajar tau mega dikumbai kitai malaikat bepanggai ba peneleba ke dikeingatka maya kitai diajar sida suba. 

Enti munyi ku hal iya, reti nya “pengajar” nya ukai semina sida ke ngajar ba institusyen belajar baka sekula enggau universiti. Apai indai kitai empu mega tau dikumbai kitai pengajar lalu sida mega patut dikenangka kitai baka kitai ke ngingatka pengajar kitai. Laban enti sida nadai tentu kitai enda nemu nama penyadi enggau kitai empu. Tang taja pia, kitai selalu nganggap pekara tu baka selama aja. Bisi maya kitai balat agi “perchayaka” pengajar sekula ari iya ke ba “rumah” taja pan pekara ti disebutka sida nyau deka sama.

Taja pia, pengajar sekula balat agi dipebasaka ketegal sida bisi “pelajar” ti bisi kaul enggau pengawa sida. Nyangka ditu mih pengelemi pekara tu ke alai seraka dikotomi nyadi besai agi deka dikemanahka agi ngujungka sekula balat agi bekuasa. Nambahka nya mega, kitai nyau tekelalu obses ngagai peresa enggau gred ngujungka kitai balat bendar bepanggai ba pengajar. Lalu besenutuk enggau nya, pengajar endang ulih mai penyelai ngagai kitai ke nembiak. Sida ulih ngasuh kitai mujur tauka enda. Tu mih ke mida pengajar enggau raban apai indai. 

Tang anang beguai kitai ngaga simpul penemu dulu. Pengawa belajar tu ke bendar ulih dipejalaika kitai ba dini-dini endur, munyi ku orang kemaya hari tu, belajar nya pengawa sepemanjai idup tauka dalam jaku English nya munyi tu; learning is a lifelong process. Bisi mega orang madah, sida ulih belajar barang maya sereta ba sebarang endur kelebih agi enti bisi orang besedia deka “ngajar”. Dalam komuniti nya empu bisi sedia pengajar enggau orang ke sanggup deka ngajar. Munyi ku jaku orang tuai, “segenturung menua (komuniti pemacha) ngajar siku nembiak”. Tu bisi bendar pengamat kelebih agi ba genturung pendiau ke kaul iya rapit amat enggau pangan diri ngujungka aris entara diri sebilik nyadi enda tentu terang. Tu tau disemaka baka siti famili ke besai ti ngerembai nyadi sebuah komuniti. Setiap raban dalam komuniti nya ngembuan tanggung pengawa ngagai pangan diri – siti konsep ke agi dikemeranka orang di menua Timur ke alai kaul enggau pangan diri bepelasarka orientasyen komuniti agi balat dikemeranka ari ke ngatika diri tauka individualistik baka ba menua ke udah mansang sereta belatarka raban elit. 

Taja pia, runding komuniti nya mega udah berubah lebuh penatai teknologi. Utai ti deka dijapai nyau besai agi sereta mungkur tikas geopolitical. ‎

Bah, enti baka nya dini mih penuduk pengajar baka kediatu? Bisi orang madahka pengajar nya tauka dikumbai Mr Google, Dr tauka Ustaz Google (tauka nama-nama ke rindu dibrowseka siku-siku).

Ketegal segang pemansang, kitai diatu enda ibuh betunga mua agi baka kitai dulu menya. Enti bisi pan iya nyau udah dipegulaika sama. Tang dalam dunya reality virtual, “depresyen”  enggau hal munuh diri udah mayuh amat nyadi. Tu mih ke nyadi trend ba serata dunya sereta balat ngirauka ati mensia mayuh. Ba sekeda kes, iya nyau bekalih nyadi penanggul ulah baka pengawa beduan tauka ngayahka orang etb. Hal tu ke belaban enggau utai ke diajar nengah pelajar enggau penemu.

Enggai enda enggai pan utai ke nyadi nya pulai ngagai individu nya empu. Reti nya pengajar ke “amat” nya bepelasarka Empat Rukun Pelajar ti dilanggurka Unesco. Empat rukun tu nyengkaum “Belajar Nyadi Nama (Learning to be)” baka ke dipejuraika Jacques Delors ba ripot iya ngagai UNESCO pasal Pelajar ba Abadi ke-21. Rukun ke bukai nya nyengkaum “Belajar Idup Segulai sejalai (Learning to live together)”, “Belajar Deka Nemu (Learning to know)” enggau “Belajar Ngaga (Learning to create)”.

Dua rukun ke dudi nya udah tebalan dikereja maya di sekula lalu dua iti ke dulu nya enda tentu dikeibuhka orang. Tu mih maya ke begunaka Filosofi Pelajar Bansa laban iya ulih ngemansangka konsep diri ti kritikal, ulah enggau pemansang kapasiti. Semua pekara tu dipegulaika enggau setimbang sereta harmoni. Rukun pendiau tu mih nyadika definisyen “kesejahteraan diri” tauka pengelantang diri. Tu nempa timpai dunya tauka worldview ti ulih tan lama ba semua ringkat ngena chara kitai empu meda iya ba rampa komuniti ke besai agi enti sem iya enda dipeda ari sukut humaniti.

Reti nya, “Belajar Nyadi Nama” enda ulih enda diterenak sereta ditempa ngagai nembiak nengah chara ti regas agi ngambika sida ulih “ngajar” diri empu kelebih agi maya sida betapi enggau mayuh macham penanggul dalam bidang pelajar.  

Tu ngujungka simpul penemu ari aku. Ba hal tu kitai ukai agi nanya sapa pengajar tang kitai patut nanya nama penyadi pengajar. Tau mega ditanya pengajar nya nama? Tu mih ke patut diperundingka kitai lebuh kitai nyingkang ngagai abad ke-21 ngambika nembiak kitai ukai semina ngemeratka pekara “ngaga” enggau “nemu” aja tang pekara ti fundamental agi nya “penyadi” enggau “pengidup” sida jemah ila. Enggau tu aku mega ngena peluang tu meri Selamat Hari Pengajar mega ngagai bala pengajar.