Bepun ari pengurang akses internet ari raban ibu bapa enggau
nembiak dia aktiviti belajar ngena chara online maya atur perintah nagang
mindah tauka dikumbai dalam jaku Melayu nya Perintah Kawalan Pergerakan (PKP)
terang bendar nyadika tanda raban pengajar balat betapi enggau pekara tu dikena
sida nentuka aktiviti kelas semampai dipejalaika taja pan krisis pandemik
Covid-19 benung ngerekai ba menua kitai.
Di sekula perintah aja, kira-kira 4.7 juta nembiak sekula
primari enggau sekondari benung kemisi sepengelama sebulan ketegal PKP
disambung sampai 14 April. Enti nitih PKP nya diperambuka naka 31 March aja.
Opis Menteri Pelajar apin lama ti udah bisi nyediakan malin
dikena penguasa sekula, pengajar, apai indai enggau nembiak bejalaika aktiviti belajar online maya atur perintah betagang
mindah tu. Malin tu bisi disediaka nengah portal pelajar. Platform nya nyediaka
penyambung ngagai kereban komunikasyen baka Google Classroom enggau Microsoft
Team ungkup dikena ngajar enggau belajar di rumah.
Taja pan opis menteri tu nadai udah nyediaka data
penyampau bala pengajar enggau nembiak ti ngena portal tu tang ari randau jaku
sida pengarang berita enggau sekeda pengajar ngayanka akses internet agi nyadi
penanggul besai lebuh sida deka ngaturka aktiviti belajar nengah chara online
tu.
Nitihka sekeda pengajar madahka enda semua nembiak
ngembuan WiFi tauka tablet di rumah – kelebih agi sida ke ari ruang bilik ti
bepenatai pemisi ti baruh. Nya kebuah bala pengajar enda ulih meratika semua nembiak
sida.
Raban pengajar ngena aplikasyen WhatsApp enggau
nama-nama chara ke ulih dikena bekomunikasyen enggau nembiak sida. Tang taja
pia bisi sekeda nembiak enda ngembuan telefon pintar. Agi mega apai indai sida
kelalu gagau enggau pengawa sida empu ngujungka sida mega nadai hari nampil
diri ba ruai WhatsApp.
Kelimpah ari nya, bisi mega pengajar madahka bala nembiak
sida enda tentu meri kerejasama ba hal tu. Sekeda ari sida nya enda nyaut tauka
malas utai ke diberi pengajar sida. Nama agi dih enti sekeda nembiak nya nadai akses
internet ti penuh. Reti nya enda mayuh ulih digaga bala pengajar dikena sida
ngetanka kaul sida enggau bala nembiak. Nyangka bisi ke ulih nya tang semina
berandau ruai dalam raban ngena Telegram.
Pengawa ke ulih digaga nembiak nya baka nganjung
gambar kereja sekula ke benung digaga sida. Gambar nya ulih dianjung nengah WhatsApp.
Bisi mega milih ngaga kereja sekula ngena Google Classroom ke alai sida munggah
dokumen ari internet, nembuka sereta munggah pulai ngagai platform ti udah
disediaka pengajar sida.
Penanggul bukai ke bisi nyadi kelimpah ari pengurang akses
internet enggau data nya baka penyilap teknikal ambika chunto baka penanggul
arus internet enggau isu-isu bunyi.
Taja pan atur bisi ditendurka Opis Menteri
Pelajar senentang chara ngajar ti patut
dikena bala pengajar tang utai ti balat nekulka opis nya iya nya penanggul
nganjung enggau nerima kereban ngajar ti dichelak.
Opis Menteri Pelajar enggau raban pengajar patut bekerejasama
ngerahka aplikasyen pesan mesej ngagai bala apai indai enggau nembiak. Raban
apai indai ke nadai ngembuan telefon pintar tauka akses internet enda ulih nentuka
kereja sekula ti diberi pengajar sebedau kemisi sekula patut ditembu lalu
diserahka ngagai pengajar sepengudah abis perintah mindah betagang. Apai indai
tauka nembiak ke bisi telefon pintar lalu ulih meli data patut diperansang ngerejista
lumur telefon sida ba raban WhatsApp tauka Telegram ngambika sida ulih nerima
kereban belajar ninting hari ari pengajar sida lalu apai indai ulih nganjung saut
anak sida ngagai raban tu awakka ulih diperesa enggau jampat.
Tiada ulasan:
Catat Ulasan