Pengasai Ati Maya Tepagang Di Rumah

Kesekali tu aku nguji ngalihka ruas lalu berandau pasal pekara ti benung nyadi buah mulut mensia mayuh kemaya hari tu iya nya penyakit Covid 19 ke benung ngerekai serata dunya. Genap iku kitai ke bisi internet enggau telefon pintar semampai macha, bekunsi sereta meri komen ba media sosial senentang pekara tu.

Enda ulih ke enda, penyakit Covid-19 ti benung ngerekai serata dunya sereta enggau menua kitai munyi ku aku dulu tadi mega bisi mai empas ngagai mensia mayuh sereta individu lebuh betapi enggau pengidup sida besehari-sehari. Gaya ulah ti baka tu ulih diperatika kitai lalu nyau majak ngirauka ati lebuh perintah berengkah bejalaika atur mindah betagang (PKP). Tu mih ke nyekat pemindah mensia mayuh dikena nagang penyakit tu ari majak ngerekai. Gaya ti baka tu ulih mai empas ngagai psikologi mensia mayuh sereta mega ngagai individu.

Realiti nya, mensia mayuh betapi enggau mayuh macham isu emosional baka pengirau ati, kesal, baban sereta stres. Pekara tu tau ngasuh mensia mayuh berasai nangi ngujungka mayuh bala nya lalu tepejuh meli mayuh barang ketegal panik kelebih agi barang pemakai.

Pansik psikologi ari pandemik ti nyadi sebedau tu baka Severe Acute Respiratory Syndrome (SARS) ngeripotka dalam kandang PKP dipejalaika tauka maya kuarantin sepemanjai timpuh pandemik tu ngembuan kaul ti signifikan enggau isu psikologi baka stres.

Enti ditimpai ari sukut psikologi, individu nyangka betapi enggau tukuh runding ti negatif. Tu tau bendar ngasuh pengasai ati sida enda lantang sereta nyamai sepemanjai PKP nya dipejalaika perintah. 

Dalam karang aku kesekali aku jaku ke dikena aku suah besilih entara pengasai ati enggau emosyen. Kebuah pia, ngambika terang agi dibacha nitihka konteks ayat.

Emosyen negatif ditu mungkur semua runding negatif ti bekaul enggau diri empu, ambika banding baka enda puas ati ke pengidup jemah ila, pemedis ti diasai dalam kaul ruang bilik, penusah lebuh ngenataikai pengasai ati ti positif, asai ati baka pendiau bunsu bubut ti jauh kediri-diri ari diri sebilik enggau bala bakih.

Nya kebuah, genap iku individu enda tau enda berundingka akalchara ti positif dikena ngenanka emosyen diri empu ngambika stabil maya betapi enggau gaya pengidup tu.

Aspek nipakka diri enggau situasyen besai amat reti lebuh nentuka guna mental sereta pemaiulah siku-siku orang lebuh nyaga emosyen ngambika  stabil maya napi ubah dalam aktiviti besehari-sehari.

Ketegal tu mih aku nguji bekunsi enggau kitai sebuat senentang pekara ti ulih dikereja kitai dikena ngurangka stres ari sukut emosional kitai. Nitihka artikel ti udah dibacha aku bisi beberapa teknik psikologi ti ulih mantu individu napi stres ari sukut emosional sereta mantu sida awakka emosyen sida stabil. Aku nanduka baru, semua tips ke dibantai aku ditu nangkan tu endang bepelasarka bacha enggau penemu ari psikologist.

Ambika banding, nyaga pengangat tubuh. Nitihka lalau psikologist, kitai mesti semampai mechik mua enggau ai tauka megai kiub ais deka mantu kitai ngenyelapka diri kitai ari sukut fizikal enggau  emosyen.

Baka nya mega, kitai patut besenam aktiviti ti mudah laban iya ulih ngangkatka tikas hormon endorfin dikena ngelantangka runding kitai. Teknik ngasuh gumpal isi kitai relaks patut dikerejaka mega. Asuh kejung gumpal isi sepengelama 10 ngagai 15 second lalu udah nya  asuh gumpal isi nya ngetu belepa sepengelama 15 ngagai 20 second dikena mantu ngurangka stres.

Mensia mayuh patut meda ari aspek rasional baka ni penyakit Covid-19 nya ngerekai dikena sida mutarka pengasai ati ti selalu nangi nyau asai ke ngaluka pengabang sereta takut dijangkit virus nya. Isu pengasai ati ti takut baka tu ulih ditapi nengah pengelandik nerima penatai informasyen ti ulih dipechaya senentang penyakit Covid-19 tu.

Individu patut nerima realiti sereta ngemeranka runding ti positif. Runding enggau pikir ti rasional endang patut dikemeratka lebuh mutarka asai ati ti nangi sepemanjai krisis Covid-19 tu. Mati akal, ati ti asa sereta mudah leju nya mega entara isu emosyen ti nyangka ditapi siku-iku individu sepemanjai maya tu.

Pekara baka hal tekandang di rumah, ubah ba rutin besehari-sehari sereta pengurang kaul sosial tauka fizikal ulih mega ngasuh emosyen ti enda stabil. Nya alai, pengasai ati ti baka tu ulih diseliahka enti kitai ngaga sereta ngereja aktiviti ti ulih ngasuh minda kitai bepenemu ari ti ngembuan asai ati ti negatif.

Nambahka nya, tiap-tiap individu diperansang ngena teknik ngelatih minda nyerenih ati ti seruran asa ari perspektif ti bebida. Pindahka emosyen ti stres baka pengasai ati ti asa tauka berasai leju nya ngena chara ngereja aktiviti baka meda filem bungah ti ngasuh ketawa, macha bup ti meransang semengat sereta ngaga aktiviti kraf. Semua aktiviti tu ulih  mindahka runding ngagai adap ti positif sereta kreatif agi.

Ngelebihka fokus ngagai pekara ti positif dikena ngasaika pengelantang dalam ati mega  teknik mindahka runding ti efektif.

Nyaga pengerai, makai pemakai ti bepengerai enggau tinduk ti chukup nya faktor ti beguna bendar dikena mantu ngenanka emosyen ti stabil. Sediaka awak ti lantang dikena ngenataika pengasai ati diri dalam raban diri sebilik. Tu teknik ti pengabis badas dikena muai pengasai ati ti sinu sereta lelak. Teknik tu ulih nyaup ngenanka kaul ti manah sereta nempa sistem penyukung ti kuat dalam diri sebilik.

Enti diraupka sekali, emosyen ti stabil napi krisis Covid 19 tu endang patut dikemeratka dikena nentuka genap iku individu ti bejalaika rutin sida besehari-sehari enda stres ngapa. Emosyen ti stabil lebuh betapi enggau krisis Covid-19 tu besai amat reti dikena nentuka genap iku individu nya bejalaika rutin besehari-hari sida enggau nadai sebarang stres.

Nya kebuah, endang patut bendar nyadika tanggung pengawa genap iku rayat Malaysia enda ala-ala ngenanka emosyen ti  stabil nengah chara ngemeranka ulah ti positif ngambika dikena kitai sama-sama nyaga pengelantang mental, fizikal enggau sosial.

Sanding penemu
Lembaga Penduduk dan Pembangunan Keluarga Negara (LPPKN)