LEBAS JAKU (LANGUAGE REGISTER)

Karang tu nguji nyaut pekara ke nanya nama utai ke dikumbai lebas jaku lalu ni maya lebas jaku tu dikena orang berandauka sesebengkah pekara.

Halliday (1968), mai kita ngelala konsep jaku beduduk ari guna jaku enggau orang ti ngena jaku nya. Kenang iya endang berindik ari pun penemu ke madahka jaku nya siti sistem kelai tauka lambang munyi arbitrari ke dikena mensia ba siti-siti genturung pendiau berandau enggau pangan diri.

KONTEKS MAYA /GAYA (Context of Situation)

Sesebengkah lebas jaku ditengkebang lalu dikena ba maya tauka nitihka konteks randau tauka buah kenang orang ke berandau nya. Pansik J.R. Firth (1956), endang udah dulu nempa konsep jaku ke beduduk ari konteks gaya enggau maya tauka context of situation kena nunjukka pemetul jaku ke dikena dalam sebengkah-sebengkah pekara. Nya alai Lebas Jaku endang berubah nitihka endur, gaya enggau maya. (berandau, betulis, formal,enda formal,sains&teknologi,sembiang,..)

Nya alai jaku ke dikena enggau nyemetak lebuh betungkap ke siti-siti pekara tauka bidang penemu nya meh ke dikumbai LEBAS JAKU. Ba jaku English, lebas jaku tu dikumbai language register.

NENTUKA LEBAS JAKU

Chara dikena nentuka sebengkah-sebengkah lebas jaku bepanggai bendar ba jalai jaku enggau leka jaku tauka vocabulary ke dikena. Nya alai, lebas jaku tau dikategorika beduduk ari tiga faktor baka ti disebut di baruh tu:

§ Batang Pekara (Field of Discourse)

§ Chara Mantaika Pekara (Mode of Discourse)

§ Gaya Batang Pekara (Manner of Discourse)

KEBUAH LEBAS JAKU BEGUNA

Nama kebuah lebas jaku tu beguna lebuh maya berandau? Lebas jaku dikena berandau dalam mayuh bengkah kaul sosial. Ngena mayuh bengkah lebas jaku dalam kaul sosial ke bebida endang beguna bendar.Berindik ari tukuh enggau mayuh bengkah lebas jaku dalam siti-siti jaku kelebih agi ba karang tu nguji ngenangka lebas jaku Iban. Lebas jaku tu ulih mandangka pemesai guna iya.

Lebas jaku baka lebas jaku Iban dikena mantaika penerang tauka informasyen ke nyemetak sereta terang. Sesebengkah pekara ti deka dikenataika patut terang sereta nyemetak didinga orang bukai ngambika sida ke ulih meretika pekara ti dikenataika orang ke empu jaku nya.

Kedua, lebas jaku mandangka latar penatai iya ke mansutka penemu. Enti sema orang ke bejaku nya pengajar, dia leka jaku ke dikena mayuh bendar ke bisi kaul enggau pengawa ngajar sereta belajar. Baka nya mega chunto bukai baka enti sema orang ke bejaku nya orang ke ngemeranka pengawa bumai tentu bendar pekara ke dikenataika iya nya bekaul enggau pengawa bumai.

Ketiga, lebas jaku mega ulih dikena nerenakka nilai ngatur diri bekempit enggau rampa endur diau.

Kelimpah ari nya lebas jaku ulih ngerapitka kaul sosial enggau diri empu. Lebas jaku ke dikena ulih maya nampil diri berandau enggau orang bukai ulih ngerapatka kaul sosial kitai enggau orang bukai. Leka jaku ke dikena kitai lebuh berandau enggau orang endang iya ke engkeman dikena maya berandau nya.

Kepenudi bendar lebas jaku dikena mandangka penerang isu ke dipetungkapka. Lebas jaku ke dikenataika nya endang ngundan leka jaku ke bisi kaul enggau isu ke dipetungkapka orang ke ngenataika penerang nya.

Belalauka kebuah ke udah dikenang nya tadi, aram meratika sekeda chunto lebas jaku ke dikena ba mayuh bengkah pampang penerang tauka randau.

LEBAS JAKU SAINS

Aram kitai meratika tukuh ke nyeratan dalam lebas jaku sains. Lebas jaku ngundan terma nyemetak. Jalai ngena leka jaku lebat agi ngundan kelas jaku ari jaku pengawa tang kurang leka jaku adjektif. Kelimpah ari nya pekara sains tu diterang ngena ayat enggau gaya nulis. Iya mega ngena jaku perintah enggau jaku tanya ke praktikal lalu ngemeratka akalchara (method). Peratika chunto ba genteran ke nangkanka tu.

Fibroid tu siti ari penyakit ti selalu bendar ditemu nyadi ba sida indu ti beumur dalam 30-40 taun, lebih agi ba sida ti enda beranak tauka mandul sereta indu ti kelalu gemu. Fibroid tu nyadi ketegal hormone estrogen ti bisi ba tiap iku orang indu, nya meh kebuah fibroid selalu bendar ditemu ba indu ti benung peridi. (Dr. Awi Idi)

LEBAS JAKU BERITA

Tukuh lebas jaku berita ulih diperatika belalauka sekeda pekara tu. Kesatu, lebas jaku berita ngembuan topik ke nyengala belalauka frasa topik tauka ayat topik. Teks berita mega ngembuan siti idea dalam siti ayat lalu iya suah ngelengkaka jaku penyambung, jaku tesa, & penambah. Kelimpah ari nya berita mai penerang randau (lisan) ari siku ngagai siku. Uji peratika chunto ba genteran ke nangkanka tu.

Sri Aman- Hari Empat ,22 Spt. Tiga puluh bakal lebuh bas ti ngundan nembiak sekula belantak enggau lori tangki di Jalai Sabu.

Sri Aman- kena Hari Empat,22 Spt.Tiga puluh iku orang bakal lebuh sebuah bas ti ngundan nembiak sekula belantak enggau sebuah lori tangki di Jalai Sabu.

Lebas jaku dalam berita tauka surat kabar ngundan tanda casual,cumulative and situated structure of conversation. Kelimpah ari nya leka jaku ke dikena nya jaku randau besehari-sehari.

Berita ke ngena rapat riport ngembuan leka jaku ke dikena baka ke dirintai ba baruh tu:

§ Nitihka penemu….
§ Iya madahka ….
§ Iya bejaku nambahka nya…
§ Bejaku lebuh ….iya madahka…..
§ Mr. Atan madah ngagai …..
§ En. Atan nyemetak ……
§ Lebuh ngenang pekara nya….
§ Mr. Atan nangkan…..
§ Bejaku dalam pengerami….
§ Lebuh baum/seminar ….

Lebas Jaku surat kabar sama ari siti surat kabar ngagai iya ke bukai tang tiap-tiap bengkah kompeni surat kabar suah ngena gaya ke dikedeka diri.

LEBAS JAKU AUM

Tu chunto format minit aum. Peratika lebas jaku ke dikena lebuh nulis minit aum.

Minit Aum Ke –

Haribulan: Hari:

Jam: Endur:

Penatai:

1. Nama : Penuduk

Mr.Jimbun Chairman

Mrs. Lenti Seketari

Mr. Ajun Tukang Wang

Agenda 1 ….

Nangkan nya Tangkup Pengawa

Aum ditangguhka

Direkod ………………….. Seketari

Dikemendarka………………...Chairman

Lebuh maya baum bala ke begelumu ngena leka randau baka ke dirintai di baruh tu:

• Kaban aum berandauka….
• Pekara tu udah dipejuraika enggau
• Kaban aum udah besetuju…..
• Bejuraika pekara tu enggau silik …..
• Betungkapka tuduh penemu tu enggau dalam ….
• Besetuju nimbang peminta tu…
• Ditimbang enggau bejimat…
• Pekara tu udah dibantaika …..

Panyun jaku aum mega ngena lebas jaku ke baka di baruh tu:

• Sebar Kenang

– Nitihka jaku penyanding penemu

– Bepanggai ba minit aum ke 2

• Matak Kaban

– Ngarapka kereja sama ari semua kaban…..

– Penurun semua kaban komiti endang diberi besai terima kasih….

• Gerah

– Tuan chairman madahka ….

– Ngambika temu bala mayuh…..

• Tanda kebuah

– Laban udah enda mujur nya alai tuduh penemu baru tu bakatu …..

• Tanda Perintah

– Semua kaban komiti dipinta ….

– Bala pengajar dipinta ……

• Tanda Terima kasih

– Semua pemutus tuan ba ….kami sambut enggau jaku terima kasih ….

– Ari kereja sama … diberi puji/ terima kasih

• Tanda Tuju

– Ngambika kaban sama-sama beratika..

– Ngambika temu semua kaban… tuju ..

• Tanda buah runding

– Endang dikarapka kami penemu….

– Buah runding/ penemu nya manah bendar

• Tanda sambung

– Nangkan tu …

– Nelusur pekara ke udah dikenang tadi …

• Tanda pemaiulah

– Terima kasih (positif)

– Berat amat asai ati deka nyebut (negatif)

• Tanda Ngetu

– Aum kitai tu ditangguhka …..

– Asaika udah silik randau kitai … nya alai aum dilanjarka ngagai maya dudi …..

• Tanda Wakil

– Ngarika kaban komiti …

– Mr. X ngarika ….

LEBAS JAKU INTELEKTUAL

Jaku intelektual nya jaku ke dikena mansutka buah penemu/runding enggau betul sereta nyemetak.

Havranek nyemetak bendar nyebut jaku intelektual nya lebas jaku saintifik ke bebendar ngasilka gaya jaku ke nyemetak lalu ngayanka penemu ke terang sereta logik. Peninggi intelektual jaku ulih dikerembai ngena dua chara.

Keterubah iya, tikas intelektual jaku ulih ditempa ari pengaya leka jaku,pun jaku (istilah),sereta jaku dalam.

Iya mega ngena chara nukar tukuh enggau empas leka jaku. Iya meri reti ke nyeratan ngagai siti-siti leka jaku dalam bidang ke tetap lalu bebida chara ngena kelimpah ari guna besehari-sehari. Leka jaku baru nya enda tau enda entap, spesifik sereta abstrak lalu betukuhka lebas jaku intelektual.

Lebas jaku intelektual ngembuan empas formal sereta objektif. Penerang ti dikenataika nya ngembuan fakta betul, kemas, teatur sereta terang. Objektif dalam lebas jaku intelektual nitihka fakta sereta pansik tang leka jaku pelaba tauka nyangka, enda dikena.

Kelimpah ari nya, lebas jaku intelektual ngena leman ayat pasif (neutral) lalu pekara ke ditekanka nya objek ayat ukai subjek ayat. Iya mega ngelipakka kaul personal dalam ayat. Ambika chunto; myomectomy suah dikereja ba indu ti agi biak, iya nya sida ti agi deka beranak.

Lebas jaku intelektual dikenataika ngena perening orang ketiga. Chara kena ngelipakka pekara personal mega dipasuk dalam karang. Ambika chunto; nitihka pansik aku, ….(personal), berindik ari pansik, …(perening orang ke tiga).

Ayat ke dikena ngenataika penerang lebuh ke ngena jaku intelektual ngundan ayat kompleks. Reti nya lebas jaku intelektual dikelala tauka ditanda ngena ayat kompleks. Peratika chunto ba genteran ke nangkanka tu.

Coca cola dalam butul keterubah iya digaga orang ke beempu kompeni Beidharn Candy dalam taun 1894 lalu butul iya mega digaga genting ba tengah laban sida pechaya enggau gaya butul ke nyelai ulih narit ati mayuh agi orang meli ai Coca cola.

EMPAS PENERANG PADAH

Penerang padah dikena laban lebas intelektual ngaraka buah runding sereta ilmu nitihka fakta enggau bukti. Ambika chunto; Insurans nya chara kena ngurungka risiko ke ninggang individu, kompeni tauka agensi perintah ngena chara mayar premium ngagai kompeni insurans. Kompeni insurans deka nanggung kos nitihka sempekat ke dipesetujuka dalam polisi.

Chunto Bukai dalam Lebas Intelektual

LEBAS EKONOMI

Nilai inventori tauka stok barang dagang ke dikeluarka ba timpuh ke sebedau nya enda ngayanka nilai ke bendar enti diitung nitihka rega ke diatu. Tu nyadi lebuh rega berubah dalam ekonomi. Nya alai, nilai inventori nya tadi deka diserataka nitihka ubah rega ke nyadi.

LEBAS UNDANG-UNDANG

Hal bekaul enggau Penyarut bisi disebut dalam pekara 150 Perlembagaan Malaysia. Nitihka pekara 1, penyarut nya endang penyarut besai ke mai pengerusak ngagai pengelikun menua tauka ekonomi menua tauka nengeri-nengeri di menua Malaysia.

LEBAS BETANAM BETUPI

Penyakit semakau ti dikumbai Layu Fusarium nyengkaum buruk urat ke dibai kulat Fusarium Solani sereta Layu Vasacular ke nyadi ari Fusarium Oxysporum. Pun semakau ke diserang penyakit deka rusak urat sereta layu.

LEBAS KIMIA

Lela Hidrogen Peroksid tulin lubah tebererak lebuh dalam bedang bilik tang lebuh dicampur enggau mangganum dioksid ia deka tebererak enggau aktif. Lela hidrogen peroksid ke selalu dikena nya ke bisi ngundan 3 % hidrogen peroksid.

LEBAS PSIKOLOGI

Sistem urat saraf autonomi dibagi ngagai dua bengkah ti besai iya nya simpathetik enggau parasimpathetik. Dua bengkah urat saraf tu bisi dalam semua rengka tubuh ke beguna ba tubuh siku-siku. Dua bengkah urat saraf tu befungsi ngena chara meali-ali kediri.

LEBAS ICT

Teknologi tu mai penguntung ngagai tiap-tiap iku mensia.Penguntung iya bakatu: Mindahka fail entara komputer ari opis siti ngagai opis siti ti bisi kaul dalam sistem ngena atur Fail Transfer Protokol (FTP).

LEBAS SURAT RASMI

Tukuh jaku dikena dalam surat rasmi neutral baka Chunto ke suah dikena iya nya, ‘Tuan’

Leka jaku Tuan dianggap neutral dikena nyebut semua gelar, pangkat, profesion etb.

Gelar enggau kangau basa ke suah amat dikena ba lebas surat rasmi nya baka ke dirintai ba baruh tu:

• D.Y.M.M. Yang Di pertuan Agong –

- Nitihka kangau basa Istana/ Raja

• Perdana Menteri/Sapit Perdana Menteri/Menteri Besar/Kepala Menteri (Besibil enggau RTM)

– Pemadu Di Pebasa/Ditangkan Nama

• Menteri/Sapit Menteri/Seketari Menua/Senator

– Di Pebasa .. Ditangkanka nama/bagi kementerian

– Di Pebasa Senator .. Ditangkan nama.

• Mufti – Yang Berbahagia
• Kadi – Yang Arif
• Ketuai Pengarah/ Pengarah – Dikemesaika Enggau Basa
• Tun/Toh Puan/Tuan Akim – Pemadu Dikemesai Enggau Basa
• Pegawai Pangkat Tinggi (nadai gelar)

– Tuan Sidi..Ditangkanka nama

• Pegawai Kanan – Di Keandalka Tuan.. Ditangkan nama
• Rayat Mayuh (Lelaki) – Tuan/Encik
• Rayat Mayuh (Indu) – Puan/Cik
• Tuai Rumah – Di Keandalka Aya.. Ditangkan Nama
• Pengulu – Dikeandalka Aya/Apai.. Ditangkanka nama.

(Di bali ari Hassan Mohd. Ali (1985:21)Panduan Menulis Surat Secara Moden)

Lebas jaku ke dikena ba baris pemuka surat nya nyengkaum:

• Minta pekara di atas diperatika …
• Enggau basa aku matak nuan beratika..
• Bekaul enggau peminta …enggau basa tuan dipinta beratika..

– (Sebar jaku tau ditengkebang nitihka penyiru sereta basa)

Lebas jaku ke dikena ba baris isi surat tu nyengkaum:

• Beduduk ari penerang ke ..
• Ngena tu tuan ditangkan ..
• Nya alai tuan dikarapka ..
• Tuan/Puan dipinta ngeripot diri ..
• Enggau andal sereta temegah tuan dipaduka ..
• Enggau pemendar tu tuan tau ..

Ba baris ujung surat, lebas jaku ke dikena nya baka;

• Ari kereja sama tuan .. kami meri besai terima kasih
• Nya aja, lalu tuan endang dikarapka datai bejadi pengerami tu.
• Ngarapka peminta tu ulih diperunding sereta disukung.

Tanda referens ulih diperatika ari rambai jaku ke di baruh tu.

• Bekaul enggau pekara ke disebut di atas
• Nitihka pekara ..
• Besenutuk enggau program ..
• Nitihka undang-undang ..
• Nitihka penerang ..

Ba tanda padah, dia lebas jaku surat rasmi dikelai enggau rambai jaku tu:

• Enggau tu.. digerah..
• Enggau andal sereta gaga..
• Enggau ati ti baruh.. ( kena madahka pekara ke enda manah/enda ngemuaska ati.
• Enggau tu ngambika.. sama-sama beratika

Jalai Ngena Struktur Ayat

Lebuh nulis surat rasmi, ayat pasif lebat agi dikena bebanding enggau ayat ke bukai. Ayat ke bakatu ulih dikena meri penerang tauka rampa ke jelan enti dibanding enggau ayat aktif. Dalam ayat pasif orang ke nulis enda nampak.

SIMPUL PENEMU

Dia tadi kitai udah meratika sekeda penerang ke bisi belalau enggau lebas jaku.