Kereja ari rumah deka nyadi trend

-->

Tuduh penemu Opis Menteri Kereja Raya ke deka ngasuh bala pekerja iya bekereja ari rumah tauka dikumbai telekereja dipejalaika dalam bulan January 2010 tu. Bala pekereja ke udah dipilih masuk program tu nyengkaum 35 iku pelukis pelan. Projek perintis tu diatur ngambika ulih ngangkat produktiviti sereta ngurangka ungkus ke bekaul enggau pengangkut.

Chara bekereja ari rumah tu dikiraka entara inisiatif ke baru diperambuka JKR setipak enggau singkang ubah pemansang dunya bekereja.

Chara tu udah dipejalaika ba menua ke udah maju tang ba menua kitai chara pengawa ke baka tu agi baru. Kereja ari rumah tu siti ari beberapa jalai ke ngasuh orang bekereja nengah chara ke fleksibel.

Setipak enggau pemansang teknologi, kelebih agi Internet, beberapa bengkah kereja fleksibel udah dipejalaika ba sekeda menua maju, ambika chunto maya kereja ke enda tetap, opis virtual sereta bekunsika pengawa.

Laban program tu agi baru deka dipejalaika ba menua kitai, dia sekeda gerempung baka Kongres Kesatuan Sekerja Malaysia (MTUC) enggau Yayasan Kerjaya Malaysia (YKM) bisi bendar ngembuan pengirau ati. Pengirau dua buah gerempung tu enda bisi pematut enti dibelemati enggau silik.

Aspek-aspek baka disiplin kereja, pengasai ati bala pekereja ke nerima program tu, ubah gaya kereja sereta ungkus ngasilka program tu patut bendar diperatika enggau silik.

Komiti ti beratika program tu patut bendar ditumbuhka ngambika ulih ngemataka chara kereja ari rumah awakka ulih dipejalaika enggau manah.

Gerempung ke bisi ati deka bejalaika program kereja fleksibel baka bekereja ari rumah patut meretika tuju program tu dipejalaika lalu beratika baka ni ubah tu ulih mantu gerempung sereta naka ni iya ulih ngangkatka pemuas ati bekereja. Sida ke bekereja mega patut meretika tuju bekereja nengah chara fleksibel tu.

Sebedau pengawa tu ulih dipejalaika, tentu gerempung tu udah nyediaka kereban teknologi penerang enggau komunikasyen kelebih agi kereban Internet ngagai sida pekereja tu. Baka nya mega kereban bukai baka kereban dikena nulis sereta enggau sistem ke nyukung teknologi pemadah.

Program chara bekereja baru tu patut bendar belalauka prosedur ke terang ngambika tuju sesebengkah pengawa nya ulih dijapai enggau mujur.

Chara ke baka tu mega ngayanka opis Menteri Kereja Raya besedia ngembuan pengarap ati ngagai sekeda pekereja sida lalu tu tau nyadika teladan ngagai opis bukai.

Sekeda pekara ke berubah ke nyadi kemaya hari tu patut bendar ngasuh kitai besedia ngubah paradigma ke endang udah bisi. Engka dalam timpuh 10 ngagai 15 taun ila, kitai patut bendar besedia nerima penemu ke madahka komitmen enggau prestasi pekereja ukai agi bepanggai ba batang tubuh sida lebuh ke ba opis.

Program chara bekereja ari rumah ukai semina dikena nyaga rampa menua aja tang mega dikarapka ulih ngangkat tikas pengulih enggau pengeliat ati opis tauka gerempung sereta strategi dikena napika hal ke tau berubah jemah ila.

Sekeda penguji ke tau nyadika penanggul bala pekereja begunaka intervensyen ari gerempung tauka opis kelebih agi baka gaya kereja ke fleksibel tu dipejalaika. Entara penguji ke diadang tau nyadi baka konflik antara pengawa enggau diri sebilik lalu enggau penyampau bala pekereja ke nyengkaum indai tauka apai ke ud ah sarak enggau laki tauka bini sida. Sida tu ngembuan dua tanggung pengawa ke dikerejaka serentak iya nya begigaka duit enggau nyaga pendiau enggau pengelantang diri sebilik. Kelimpah ari nya, engka penyampau bala pekereja ke ngembuan pengelandik majak nambah tang sida enda ngemeranka komitmen ke tinggi ba tempat sida bekereja.

Ketegal semua pekara tu mayuh bendar ruang ke ulih alai ngubah chara bekereja ke konvensional ngagai kereja ke lebih fleksibel.

Nya alai sadang penemu JKR tu patut bendar diperatika ari aspek positif. Pemujur program ukai semina diperatika opis tauka gerempung bukai tang mega diengkila enggau serius ulih bala sida akademik.

Nitihka pansik akademik, bekereja nengah chara ke fleksibel tau bendar ngangkatka kualiti kereja, ngeninggika produktiviti sereta nambah pengangkun bala pekereja ngagai opis ke alai sida gawa. Ketegal tu mih engka ubah enggau penguji nya tadi tau nyadika trend jemah ila.

Nya alai, gerempung tauka opis patut besedia napi hal ke deka nyadi laban sesetengah kereja begunaka koordinasyen ke minimum. Bala pekereja mega ulih napi tugas rasmi sida taja pan batang tubuh sida nadai ba opis.

Utai ke patut dikemeratka sida nya ngembuan pengarap sereta prosedur ke terang ngambika objektif sesebengkah pengawa ukai semina ulih dijapai tang mega nyengkaum kualiti kereja ke tinggi agi.

Jemah ila gerempung tauka opis patut beratika kereja chara fleksibel tu nyadika strategi dikena napi penguji ke bisi kaul enggau sumber mensia.

Tu nyengkaum penyampau pekereja ke ngembuan pengelandik enggau pemandai ke enda chukup lalu mega nyengkaum penyampau pekereja ke ngeluarka asil enda chukup, penanggul brain drain sereta kurang pekereja ke ulih dichirika ba pengawa bedagang.

Opis tauka gerempung kemaya hari tu balat bendar napi pemasang ke jampat ngambika ulih narit sereta ngetanka bala pekereja sida ke manah. Bala ke minta pengawa ti ngembuan pengelandik ke tinggi endang mudah agi milih majikan tauka tauke ke ulih meri sida pakej gaji ke badas.

Taja pia, ukai semua opis tauka gerempung tu ulih meri gaji ke memanah. Opis mega nemu kebuah sekeda bala pekereja sida badu gawa. Ngenikika gaji enggau pangkat engka ulih nyekat bala pekereja ari badu gawa ngambika enda ngerugika sida tauke.

Taja pia, iya agi bedau ulih ngemuaska ati sekeda bala pekereja ke deka pekara tu setimbang entara pengawa enggau pengidup sida maya ba luar kereja.

Pekereja badu ketegal mayuh kebuah. Sekeda ari kebuah nya nyengkaum pengerindu, penguji, peluang, pemansang kerejaya enggau fleksibiliti. Pengulih opis tauka gerempung nengkebang gaya kereja nyangka tau ngasuh siku individu nya berasai setimbang entara kerejaya enggau gaya pengidup iya.

Chara ke mentas enggau bala pekereja ke deka dipejalaika JKR patut diperatika nyadi projek rintis ke patut ditunda nitihka pematut sesebengkah pengawa. Utai ke beguna amat nya bala 35 iku pelukis pelan tau nyadika tanda chara tu ulih dipejalaika bala pekereja sektor awam enggau mujur.

Kitai ngembuan pengarap ti tinggi ngagai semua prosedur ke udah disediaka lalu disetujuka kedua-dua piak kelebih agi ke bekaul enggau tagit kereja.

Polisi ke terang nyengkaum aspek baka kerahsiaan, aspek pengelikun, pengerai pekerja, belanja ungkus, tanggung pengawa nyaga kereban opis, endur bekereja sereta standard prestasi beguna dikena nentuka sistem baru tu mujur dipejalaika.

Pengirau ati baka ke udah diripot nyengkaum ungkus elektrik, gaya maya kereja ke bebida enggau tikas disiplin patut diputarka enggau manah ngambika juluk ati ulih dijapai.

Enti projek rintis JKR tu mujur, iya tentu deka muka runding bala sekeda ke bukai ke senurut nerima konsep kereja chara fleksibel.

Endang engkeman amat jaku ke dikenataika Menteri Besai, Datuk Seri Najib Tun Razak ke madah pemujur projek rintis tu patut diperati bepelasarka pemanah iya ngagai opis tauka gerempung sereta mega ngagai pengidup bala pekereja.

Konsep bekereja ke baka tu enti mujur sereta diterima, deka muka ruang kereja ngagai raban bukai baka sida ke timpang pendiau sereta bala indu ke udah sarak ke ulih bekereja tang nadai daya ari sukut mobiliti.