Bansa ti meruan, maju enggau mansang bisi nyimpan juluk ati ti deka nyadika menua sida iya maju sereta mansang agi lalu ulih besemekih enggau menua bansa bukai di dunya. Ambika chunto kitai di menua Malaysia ti dipegaika Menteri Besai iya ti bebasaka YAB Dato' Seri Dr. Mahathir Mohammad bisi nyimpan juluk ati ti deka nyadika menua kitai tu maju dalam taun 2020 ti dikumbai iya Tinjau Pemansang 2020. Bansa enggau menua ti nadai nyimpan juluk ati ti baka tu indah enda salah-salah baka buah apung balu rarat kili, anyut kulu ngiga jerangku alai tepanggai.
Nitihka jaku Menteri Besai dalam keretas kereja "Malaysia Nyingkang Mansang Ke mua"(1994) dia iya nyemetak bendar madahka lebuh taun 2020 tu ila menua Malaysia deka nyadi menua ti beserakup sereta ngembuan raban bansa ti bisi pengarap ke diri empu, ulah ti manah, idup begulai ngena adat demokrasi enggau besambi runding, bela ba atur bedua penatai pemisi, mujur sereta lantang, lalu bisi kuasa ti chukup ba penatai pemisi ti balat besemekih enggau orang bukai.
1. Ngaga bansa Malaysia ti beserakup
2. Ngaga raban bansa ke likun sereta mansang runding enggau bisi pengarap ba diri empu
3. Bekempit sereta nyungkak raban bansa ti belalauka adat demokrasi
4. Mansutka raban bansa ti ngembuan ulah enggau runding ti manah
5. Mansutka raban bansa ti dalam runding, liat ati sereta besambi penemu
6. Mansutka raban bansa ti mansang sereta mujur ba penemu sains
7. Mansutka raban bansa ti bisi pengibuh enggau penyiru ke pangan diri
8. Nentuka raban bansa ti bela bagi ba ungkup penatai pemisi
9 Mansutka raban bansa ti lantang senang sereta mujur
Nya alai sida ke nyadi tuai patut ngaris sereta ngerintis lalu ngerandangka jalai ngambika Tinjau Pemansang 2020 tu ila ulih dijapai kitai mayuh enggau mujur sereta enggau nadai penanggul. Laban sida ke nyadi ketuai menua enggau bansa deka mansang tuai maya taun 2020, dia pengawa ti bejulukka Tinjau Pemansang 2020 bepanggai ba jari sida ke agi biak lalu chergas ngereja pengawa. Sida tu mih nembiak rebak baru ke berumur antara kurang lebih sepuluh taun ke atas.Kebuah pia laban sida tu ila mih pugu orang ti deka megai sereta ngemaju enggau ngemansangka menua kitai Malaysia tu ila. Nya alai tiap iku nembiak kediatu patut bendar diberi peluang enggau ngeruhka ai ngambika bisi dikena napika pemansang ti deka datai.
Dalam Tinjau Pemansang 2020 tu ila, menua kitai Malaysia deka nyadi sebengkah agi menua ti maju kelebih agi dalam pengawa industri sereta enggau pengawa teknologi tinggi. Menua kitai bisi endar peluang nyapai juluk ati tu laban naka kediatu kelebih agi baka menua Sarawak kaya enggau pengeraja asal baka minyak mata, gas asal, kayu ramu, batu arang, batu berega enggau asil ari pengawa betanam betupi. Enti pengawa ngangkat sereta ngemansangka asil pengereja asal tu mujur, kitai rayat Malaysia patut temegah ati laban menua kitai deka diterima nyadi siti ari menua maju.
Nya mih alai nembiak rebak baru enda tau enda besedia napi sereta nanggung pengawa kena nentuka Tinjau Pemansang tu ulih di japaika kitai rayat Malaysia. Sekeda ari nembiak ke nyadi tuai tuai jemah ila , patut bendar bisi ngembuan penemu enggau pengelandik ba mayuh bengkah pekara, ngambika ulih matak sereta ngiring menua Malaysia nuju pemujur ke lebih agi.
Kelimpah ari sida nembiak ke berumur sepuluh taun ke atas nya tadi dia kitai mega patut ngasuh nembiak ke berebak maya tu ila bisi ngembuan penemu ti chukup . Utai ti patut ditanya bala kitai ke tuai maya tu iya nya sapa ti dikumbai kitai nembiak ti bepenemu lalu nama penemu ti patut dikembuan nembiak kitai tu ila.
Enti kitai beratika siti-siti menua ti enda maju dalam dunya tu dia kitai meda menua tu kurang tauka nadai orang ti bisi penemu kelebih agi dalam pengawa sains, teknologi sereta enggau engineering.
Keterubah iya kitai meratika nembiak ti dikumbai kitai bepenemu. Nyadi nembiak ke bepenemu tu patut nembiak ke bisi ngembuan beberapa iti pekara baka dalam bidang pelajar tauka akademik, teknologi, ulah enggau daya idup ti manah ti udah diterima raban bansa sereta bala mayuh.
Kesatu, sida patut bendar bisi ngembuan pelajar ti chukup tinggi sereta diterima bala mayuh. Nembiak ti bisi ngembuan pelajar tinggi enda salah baka orang kelia ke bisi pengaruh begembar tubuh ti dikena sida bejalai ke menua bukai lebuh maya nya kelia. Pelajar tinggi ti patut dikembuan ke sida iya nya ila iya nya sekurang-kurang iya enti ba pengawa belajar tauka akademik utai ti dikumbai tinggi tu sekurang-kurang iya ba peringkat universiti ukai agi ba peringkat form lima tauka enam baka kediatu. Kebuah pia laban orang ti ngembuan pelajar tinggi tu udah bisi penemu ti dalam agi dalam pekara ti besangkut-paut enggau utai ti dipelajar sida baka pengawa politik, ekonomi enggau pengawa rama tauka sosial.
Enggau penemu ti tinggi bakanya sida ulih nyendiaka menua tu napi ubah pemansang baru sereta ulih ngaturka pemansang ti patut dikerejaka dikena kitai ngemujurka Tinjau Pemansang 2020 tu. Pia mega sida ulih ngaga langgur penemu ti silik dikena ngemajuka menua kitai lalu dalam jam ke sama sida ulih ngemutarka penusah ti bisi ditemu deka nuntongka menua kitai dudi ari ila. Pia mega enggau pelajar ti tinggi tu sida ulih besemekih enggau orang bansa bukai ari menua bukai.
Dikena kitai napi tinjau pemansang tu, sida universiti patut bendar ulih ngeluarka nembiak ti pandai dalam pelajar sains, teknologi sereta enggau engineering. Ambika banding, dalam menua ti udah maju penyampau sida ke nyadi engineer nya siku ngagai tiap 100 iku rayat dalam menua nya enda nyengkaum sida ke nyadi saintis enggau teknologis. Enti di Sarawak penyampau engineer nya bisi siku aja ke napi tiap seribu iku orang rayat. Nya alai enggau tu nembiak rabak baru patut bendar diperangsang ngambi pelajar ke bansa tu dikena betulungka ke perintah ngangkat sereta ngemajuka menua.
Nitihka pansik, menua kitai deka begunaka kurang lebih 21 peratus pelajar ba institusi pelajar tinggi. Pansik tu mega madahka dalam taun 1993, bisi 74,986 iku pelajar belajar ba universiti perintah ti bisi ba menua tu lalu penyampau tu deka betambah tiga kali ganda. Kelimpah ari unversiti ti ditubuhka perintah menua kitai bisi kurang lebih 200 buah institut pelajar tinggi ngatika diri ti ulih nampung kira-kira 55,000 pelajar. Tu nunjukka menua kitai beguna bendar ke nembiak ti bisi penemu.
Pansik opis pengitung tubuh bisi mega madahka di Sarawak naka ke taun 1997 bisi 7,851 iku orang udah diambi mangku pengawa baka lawyer,engineer, pengira wang, arkitek, lutur, lutur gigi enggau lutur jelu enti di bandingka enggau penyampau sida ke bisi diambi dalam taun 1989, iya nya semina 4,388 iku orang. Ari chunto ti mimit tu nerangka kitai nya dalam taun 2020 mayuh agi orang ti bisi penemu sereta pelajar ti tinggi deka diambi mangku sekeda pengawa ti bisi puang lalu ti besangkutpaut enggau penemu sereta pemandai sida.
Nembiak ti bepenemu mega patut datai ari sida ke bisi ngembuan penemu teknikal enggau teknologi pemadah. Penemu ti bansa tu beguna bendar dalam Tinjau Pemansang 2020 laban siti ari juluk ati dalam tinjau iya nya deka ngeyadika menua kitai Malaysia tu maju sereta mansang dalam pengawa industri Mayuh agi pengawa ti besangkut-paut enggau pengawa industri deka dipejalaika baka pengawa ba kilang ti berat, begagaka kereta, lori, van sereta asil eletrik.Pia mega penemu sains ulih dikena ngerejaka pengawa enggau teratur sereta sistematik. Enggau penemu sains, pendiau sereta pengalantang pengidup kitai mansang belinsur manah enti dibanding enggau dulu kelia. Nya alai nembiak ti sanggup tulihka penemu sains deka mantu menua kitai Malaysia ngubahka pemansang lalu besedia bekenaka penemu ti baru dalam ngereja sebarang pengawa.
Siti agi chara dikena nembiak ngemujurka Tinjau Pemansang 2020 enggau masuk mayuh bengkah pemansang enggau program latih pengawa perintah, ngambika bisi pengelandik enggau penemu kena ngereja pengawa.
Ambika teladan, dalam penemu teknologi pemadah, dia kitai beguna bendar ke nembiak ke bisi penemu IT tauka teknologi pemadah dikena ngeyalai komputer sereta pengawa ti bisi bekait enggau teknologi pemadah. Nembiak ke bisi ngemeranka penemu dalam pengawa teknologi pemadah ulih nerima ubah ke deka nyadi rambau pengawa ke bekena ke teknologi pemadah tu ila.Kebuah pia laban penemu dalam pengawa teknologi pemadah deka dikena dalam genap bengkah jalai pengidup jemah ila.
Ba opis perintah penemu dalam pengawa teknologi pemadah udah ditemu beguna bendar dalam begagaka paspot enggau mudah sereta lengkas agi dikereja. Bank mega bisi bekenaka komputer enggau sistem tali penyambung diserata menua ngambika ulih nangkup pemayuh orang ke begunaka bank. Indah ke diatu orang mayuh ulih ngambi duit sida nengah ATM siang malam. Pos Opis udah nyadi siti palan alai bebayarka bil api, ai, talipaun, pupu pintu, ngidupka baru lisin TV, lisin dagang lalu pia mega ngadaka bantu pengawa ke bekaul enggau ASN, ASB, ASW, Tabung Haji enggau utai bukai ke bansa nya.
Penemu dalam pengawa teknologi pemadah mega beguna dikena ngulihka berita enggau penerang. Pengawa teknologi pemadah ulih nyaup kitai ngulihka berita enggau penerang naka penyampat.Penerang ari internet tau diulihka ari serata dunya ngena chara ti mudah.
Iya ke disebut diatas nya tadi semua pasal pengawa teknologi pemadah ke bisi udah digunaka kitai naka kediatu. Dudi ari ila dalam taun 2020 program sereta penemu tu deka betambah. Iya ulih dikena dalam atur berubat . Dalam atur tu kitai deka begunaka saup lutur bukai ti landik ba menua bukai ngambika meresa penyakit orang ti sakit ba menua Malaysia.Perintah deka bekenaka pengawa ti dikumbai perintah letronik baka ba perambu atur ti deka dipejalaika ba palan opis perintah besai di Putrajaya. Enggau perintah eletronik, rayat deka bisi peluang bebayar sereta beridupka lisin sida nengah komputer. Nya alai nembiak munyi ke disebut ari pun tadi patut bendar bisi penemu teknologi pemadah ngambika enggau penemu ti dikembuanka sida ulih ngemujurka Tinjau Pemasang 2020.
Dalam pelajar teknikal dia kitai mulaika pengingat dulu suba iya nya beberapa taun udah merdeka . Menua kitai Malaysia begunaka mayuh nembiak rebak baru maya nya ti bisi penemu dalam pengawa teknikal dikena ngemansangka menua. Nitihka "Razak Report" bisi dua bansa sekula teknik, iya nya palan latih teknik tauka "Maktab Teknik" enggau Sekula Teknik ti ngambi pelajar ti udah apus form tiga. Pengawa ti ngambi nembiak ngagai mata pelajar teknikal tu lalu di teruska maya "Laporan Rahman Talib" sampai kediatu. Maya tu pengawa ti ngemansangka pelajar teknikal engau vokasional dipejalai enggau silik dikena napi guna pengawa . Nya alai dalam taun 1980 , kitai berati siti agi bansa sekula bisi dibuka, iya nya politeknik. Nitihka pansik dalam taun 1991 bisi sembilan buah sekula teknik enggau 57 buah sekula vokasional udah bisi didirika ba menua kitai, Malaysia. Reti nya mayuh agi nembiak ti deka dikeluarka dalam taun 2000 nya nembiak ti bisi penemu dalam pengawa teknikal.
Baka ba menua Sarawak, kitai utai bisi enam buah sekula vokasional enggau teknik baka ba Kuching , Matang, Sibu, Miri, Bintulu enggau Betong. Ari enam buah iti sekula tu bisi 2,228 iku pelajar udah diambi belajar dalam taun 1997. Mata pelajar ti bisi ngambi mayuh agi pelajar nya baka mata pelajar dagang, elektronik, engineering, automatif enggau amalan bengkel mesin. Taja pan penyampau sida tu naka diatu agi kurang enti dibanding enggau pelajar ba sekula biasa tang peluang sida tulihka peluang kereja mayuh agi.
Enggau penemu ti tinggi ti bansa tu, nembiak kitai bisi bendar peluang nyungkakka pengelandik ngereja pengawa. Ari ti bisi ngembuan penemu ti tinggi sereta diterima raban bansa, dia sida ke nembiak tu ila deka mujur agi berubah nitihka ubah pemansang dunya lalu ulih nulung perintah ngangkatka pemanah penatai pemisi menua tu ila.
Ari nya perintah begunaka pengelandik sereta penyikar nembiak kitai ila dikena ngemansangka menua lalu kelebih agi genturung pendiau nembiak tu empu. Enggau tu mega genturung ti bisi nembiak ti bisi penemu ti chukup tu ila deka sama enggau perintah enggau chara ti enda sengaja ngangkatka penatai pemisi raban bansa sida.
Nembiak ke datai ari menua pesisir patut bendar ngambi peluang ti bisi ayan dikena nyikap kediri nuju ubah pemansang ti deka datai. Ambika banding, sida patut ngulihka penemu ti bisi bekait asil enggau jalai pengidup sida di menua pesisir baka tulihka penemu pasal jalai ngereja pengawa betanam betupi ngambika sida ulih mujur agi ngemansangka tanah temuda sida nyadi dandang kebun ti mansutka asil. Nya alai tuju perintah ti bisi bejalaika program Gerakan Desa Wawasan ba sekeda genturung pendiau di serata menua tu endang patut bendar disukung laban tuju perintah deka ngemansangka kandang menua pesisir ngambika senutuk enggau Tinjau Pemansang 2020.
Pemujur Tinjau Pemansang Taun 2020 bisi mega bekait enggau Polisi Pelajar Bansa. Nitihka Polisi Pelajar Bansa , nembiak ti deka pansut ari sekula deka bisi tulihka penemu ti ulih mai pengelantang ukai mina ke sida empu tang mantu pengelantang mensia mayuh enggau menua kitai Malaysia.
Diperati ke ari juluk kedua Tinjau Pemansang taun 2020 nyemetak bendar ngerintai ngagai kitai awakka ulih ngangkat runding mensia mayuh enggau nempa semengat rayat dikena niri sereta negika menua ti mansang. Nya alai nembiak ti dikumbai kitai penemu ukai semina ba pengawa pelajar tauka akademik tang mega bisi ngembuan penemu ke tebuka. Nitihka penerang ari bup "9 Bengkah Pekara Ti Dijuluk Tinjau Pemansang 2020"(1998,17) madahka penemu ke tebuka iya nya penemu ke enda dikungkung sebengkah penemu ti bukai ti ngujungka orang nulak ubah pemansang. Penemu ke tebuka beguna bendar ngambika kitai enda mudah diperintahka menua barat baka ke dulu suba.
Kitai enda sanggup agi dipegaika perintah menua barat di udah naka ulih ngambi sekeda penatai pemisi enggau pengeraja asal dikena ngemansangka menua sida empu. Enggau penemu ti tikas sereta rapas nembiak kitai mudah dikelimpangka penemu sida ari barat kelebih agi baka ulah ti enda ngasuh kitai bekereja enggau bebendar. Nya alai enti nembiak kediatu ngelusu begigaka penemu tau ngujungka dudi ari sida iya merinsa sereta begantung enggau orang bukai. Pemagas sereta penyanggup kitai pedis diatu deka nentuka kitai tulih ke penyamai dudi ari ila enda ilah baka sempama jaku tuai bisi nyebut dulu sedu, dudi pegari.
Ari nya mega nembiak ti bepenemu mega patut ngembuan ulah ti manah ngambika sida ulih nunjuk ngagai menua bukai raban bansa Malaysia ti meruan sereta meyana ulah enggau moral ti tinggi . Enggau ulah ti manah sekeda nembiak tu ila deka nyadi tuai ti lurus dalam ngereja semua macham pengawa ti dipegaika sida.Enggau penemu sereta ulah ti dikembuan ke sida nembiak tu ila sida ke bisi bepeluang megai menua ulih mai ubah ke mai pemanah ngagai rayat sereta menua Malaysia. Kebuah pia laban ulah ti enda manah deka bendar ngujungka penyarut nyadi lalu menua enda tegap. Sida tau bendar diparit ka orang ti enda betanggungpengawa ngereja pengawa ti enda manah baka makai suap enggau ukai ti bukai. Kelebih agi baka kediatu menua bukai nadai agi ngena chara perang dikena sida merintah menua ti enda kuat.
Ambika banding, naka kediatu siti ari chara sida iya, iya nya enggau nyatuhka mata wang menua-menua ti mit. Ngena chara tu penatai pemisi menua deka nyadi kurang lalu suntuk. Menua ti ditinggang penusah ti bansa tu baka menua Thailand nyadi merinsa sereta naka ulih nginjau duit ari Tabung Duit Antarabangsa tauka "IMF". Menua kitai Malaysia pan bisi teparit enggau penusah penusut penatai pemisi.
Penatai pemisi menua datai ari penegap sereta pengelikun menua. Pengelikun menua datai ari penegap politik . Penegap politik enggau penegap ekonomi tauka penatai pemisi bekait bendar enggau diri sama diri. Lalu penegap kedua-dua iti pekara tu data ari sida ti bepenemu. Enti bakatu dalam taun 2020 ila nembiak ke rebak baru patut nyikap diri enggau naka iya ulih dikena napi ke arus pemansang.
Ambika banding, penusah rama ke udah bisi nyadi ba menua ti udah mansang patut bendar nyadika teladan kitai ti deka nuju menua maju dalam taun 2020. Ulah ke enda manah baka ke enggai nurun sekula, gian dadah , ulah ti segau-segau enggau pengawa ti bukai patut diperatika sereta diputar ngambika ulih dikurangka. Kebuah pia, laban semua tuju sereta niat menua tu deka puntan baka menasan jalai jani enti kitai enda ulih mutar sereta munaska semua penusah ke bekaul enggau mayuh macham ulah ke enda manah ke bisi nuntung pendiau rayat lebih agi ba raban nembiak. Ulah ti manah datai ari penemu, pengelandik enggau peneka siku-siku mensia. Nya alai pengarap patut nyadika sukung dikena nembiak tulihka penemu laban pengarap ulih ngubah ulah sereta perangai kitai mensia. Semua pengarap di dunya tu bisi ngajar orang ngemeran pengelurus ati enggau pemanah ulah. Enggau ulah ti manah tentu bendar nembiak kitai dudi ari bisi ngembuan pengelurus enggau penggeliat ati ti dikena besemekih enggau orang bukai.
Enggau ulah ti manah mega dia menua kitai deka nyadika chunto ngagai menua bukai ti udah maju tauka menua bukai ti bisi beniat deka nyadi menua ti maju. Pemaju sereta pemansang rayat Malaysia begantung bendar enggau pemanah ulah laban menua kitai tu menua pupu raban bansa. Naka kediatu menua bukai ti bisi pupu raban bansa nadai bisi pengelikun sereta penegap politik.
Nya alai pekara ti patut bendar ditanya naka kediatu iya nya sapa kitai ke ulih meri penemu ngagai nembiak ke rabak baru tu ila dikena sida napi tinjau pemansang 2020. Pulai ngagai adat enggau chara ke biasa ditelebaka kitai dia pengawa ke bansa tu nyerangkum semua rayat Malaysia enda ngira bansa, apai-indai enggau pengajar.
Rayat Malaysia patut naka ulih beratika batang pelajar dipelajar ke nembiak kediatu lalu ngasaika enti iya setipak enggau pemansang ti kedeka ke kitai jemah ila. Dalam pengawa tu sida gerempung ukai perintah bedurok lalu begempung enggau bala apai indai berundingka pekara tu. Enti asai utai ti dipelajar naka kediatu enda ulih napi pemansang dudi ari ila dia sida patut bendar besaup madah ngagai perintah ngambika ulih ngatur ke perambu ti baru.
Perintah kelebih agi baka opis menteri pelajar patut meratika turai pelajar siti-siti mata pelajar ke udah dilanggur sereta dikena naka jam kediatu.Nya mih kebuah naka kediatu mayuh bendar pengawa dalam bidang mata pelajar udah jauh bendar berubah enti dibanding enggau ke dulu suba. Ari Laporan Kabinet ke bisi dipejalaika dalam taun 1979 dia opis menteri pelajar udah nyingkang enggau penumbas iya jauh dalam pemansang pelajar menua. Siti ari batang pengawa ti udah bisi diperambu nyengkaum ngemunka turai KBSR enggau KBSM ti meri peluang ke mayuh agi dikena ngeluarka rayat Malaysia ti bepenemu, bepengerai , manah runding sereta megai pengarap ti tinggi.
Nya alai munyi ku jaku tuai, tukul sigi enda bula ke tempan, labu enda bula ke peputan, kunchi pemujur Tinjau Pemansang 2020 endang begantung bendar ba nembiak ke bisi penemu. Ngambika juluk ati ti deka meda pemujur Tinjau Pemansang 2020 tu ila kitai diatu patut bendar meri perangsang ngagai nembiak rebak baru ngambika sida iya ulih besemekih enggau orang bansa menua bukai.
Tiada ulasan:
Catat Ulasan