Di Sarawak baka menua bukai di Malaysia ngembuan mayuh gerempung ukai perintah tauka NGO ti ditumbuh dikena ngerempung bansa Dayak baikka nya bansa Iban, Bidayuh tauka Orang Ulu. Sekeda ari gerempung tu baka Sarawak Dayak National Union (SDNU), Sarawak Dayak Iban Association (SADIA), Serakup Indu Dayak Sarawak (SIDS), Dayak Bidayuh National Association (DBNA), Orang Ulu National Association (OUNA) enggau Persatuan Lun Bawang Sarawak.
Ari gerempung ke bisi tu SDNU nya gerempung ke udah lama amat ditumbuhka di Sarawak. Gerempung tu udah ditumbuhka sepengelama 53 taun. Taja pan udah tuai, tang agi mayuh amat juluk ati gerempung tu enti diperatika nengah chara kasar bedau ulih dijapai. Siti ari juluk ati gerempung tu endang deka ngerempungka semua bansa Dayak ke bisi diau mendam di menua Sarawak.
Federal Constitution bisi nyebut, The races to be treated for the purposes of definition of “native” in Clause (6) as indigenous to Sarawak are Bukitans, Bisayahs, Dusuns, Sea Dayaks, Land Dayaks, Kadayans, Kalabits, Kayans, Kenyahs (including Sabups and Sipengs ), Kajangs (including Sekapans, Kejamans, Lahanans, Punans, Tanjong and Kanowits), Lugats, Lisums, Malays, Melanos, Muruts, Penans, Sians, Tagals, Tabuns and Ukits.
[Federal Constitution 16A.]
Nitihka presiden Sarawak Dayak National Union, Mengga Mikui, bisi dianggarka 1.5 juta Dayak diau mendam di Sarawak. Ari penyampau tu 800,000 nya bansa Iban. Ketegal penyampau ke mayuh nya endang patut amat gerempung ukai perintah tu nguji ngempung semua bansa Dayak ke bisi diau nguan menua Sarawak.
Ketegal ke udah lama amat ditumbuh endang patut amat juluk ati tu diteruska ngambika bansa Dayak bisi gerempung alai mantaika serebana sida. Nya mih kebuah, Datuk Joseph Salang kala ngelalauka bala raban komiti SDNU mantu nyaga, ngetan sereta naburka ngagai bansa bukai jaku bansa Dayak ke bisi di Sarawak.
Datuk Salang kala madahka SDNU ukai semina nyaga jaku Iban aja tang mega jaku bansa Dayak bukai (The Star, 7th May 2008). Nitihka fakta enggau penerang, semua raban asal ukai Islam di Sarawak disengkaumka baruh raban bansa Dayak.
Nya alai gerempung baka SDNU tu patut beambi ulih ngempuru semua raban Dayak ke bukai ngambika jaku, adat asal sereta pengela bansa sida entap dijaga. Tanggung pengawa ke baka nya mega nulung nyeliah gerempung ari dikumbai orang semina nyaga jaku enggau adat asal bansa Iban aja.
Kelimpah ari nya mega, gerempung tu patut meransang nembiak Dayak belajar bebendar ngambika ulih ngenataika diri ba ikas pelajar ke tinggi setipak enggau raban bansa bukai di Malaysia. Enti sida tu pandai tentu sida nemu agi pemesai reti nyaga adat enggau jaku ngambika iya terus nyadika pengelala bansa.
Tiada ulasan:
Catat Ulasan