Nimpai Pemansang Runding Nembiak Redak

Tiap-tiap dekad bisi aja peturun ti nitihka gaya chuan diri empu. Sida iya nyempuru sereta meri runding enggau chara bepikir ti baru ngagai dunya.

Dalam taun 50-an, sepengudah Perang Dunya Kedua dia kitai nerima pengada nembiak ti begulai sejalai bepintaka menua kitai tu meredika ari dipegai perintah British. Jeman tu bala nembiak udah mupuk nyakal sereta enda nerima chara bepikir ti lama bala urang ke tuai ti udah masai enggau perintah koloni. Sida ngemai bala rayat nentuka diri empu nyadi pemerintah sereta megai menua tu.

Nangkanka dekad 50-an nya dekad 60-an. Nembiak rebak tu diperatika bebida agi ari bala menyadi tuai ke dalam taun-taun 50-an. Chara sida bepikir nya tebuka agi. Sida rebak tu balat agi tekuing runding nitihka penemu nembiak redak ari menua barat ti bepegaika prinsip ngatika diri. Peturun rebak tu ukai semina minta menua tu meredika tang mega bepegaika daya idup ti lepas ari pegai orang. Jeman tu mih jeman musik ti dikumbai musik pop yeh yeh ti nyadika kelai dikena ngenataika pengelepas ari pegai orang bukai.

Penampak runding enggau daya pikir nyau bebida dalam dekad 70-an enti dibanding enggau 20 taun ti udah. Bala nembiak rebak tu bisi tekuing runding, tekelalaka pemesai guna ekonomi enggau reti jaku pemansang. Tragedi 13 Mei 1969 nyadika pun generasi baru ti ngaitka meredika enggau pemansang ekonomi. Maya tu mih polisi ekonomi baru tauka Dasar Ekonomi Baru (DEB) dipejalaika perintah ngambika ngemansangka ekonomi rayat enggau menua Malaysia. Nembiak universiti ti besekula maya tu enggai ninggalka diri tang besemekih enggau nembiak bukai di menua Asia mandangka diri bepintaka pemansang ari perintah.

Enti kitai ngalihka ngagai taun 80-an dia kitai meratika nembiak rebak tu nyau berengkah begigaka asal pengelala diri tauka identiti diri kelebih agi dalam lupak pengarap sereta pekara ti bekait enggau roh. Nya mih kebuah kita meda nembiak bisi pengerinduka pengarap baik nya pengarap agama tauka pengarap lama. Nembiak nyau bisi pengerindu ke main asal enggau adat lama.

Tang dekad 90-an bisi mandangka penyelai enti dibanding enggau dekad ti bukai. Penyelai ti terang bendar diperatika nya penatai pemansang teknologi pemadah enggau komunikasi tauka teknologi ict. Pekara ti bekaul enggau komputer, internet, televisyen satelit enggau telefon besel udah ngubahka chara, gaya enggau runding nembiak. Penemu sida senentang politik, ekonomi enggau daya idup mega berubah.

Diatu kitai agi mengkang ba dekad 2000-an. Kuasa ICT dalam pengidup nembiak nyau makin tegap. Pengaya sereta pemansang menua Malaysia ulih nguing runding enggau chara bala nembiak bepikir. Enti kitai malik ke belakang lalu mandingka chara enggau runding nembiak dulu kelia dia kitai ulih meda penyauh bida ari segi runding enggau daya idup bala nembiak kemaya hari tu. Sida ransing agi deka ke setiap pemansang berubah enggau jampat. Nya mih kebuah nembiak kemaya hari tu dipeda lebih praktikal sereta bepikir chara global dalam mutarka pengawa. Siti agi tanda pemansang nembiak baru diatu diperati ari pemayuh bala nembiak indu ba universiti enggau megai pangkat besai. Pemansang ti bansa tentu bendar ngubah situasyen ke nyadi selama tu.