Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Selasa, 15 Disember 2009

Nulis Enggau Penuh Disiplin

NULIS nya pekara ti mudah amat dikereja. Nadai milih sapa-sapa ulih aja nulis. Kemaya hari tu mayuh amat peluang nulis enti dibanding enggau dulu suba. Nentuka batang pekara ke deka ditulis pan ukai pengawa ke mar. Pemacha mega kekadang nadai tentu kiruhka pekara ke dibacha iya.

Taja pia pekara di atas enda sebaka enti sema karang nya ditulis enggau serius, bebendar sereta penuh komitmen. Penulis ke bebendar nulis nya tetap deka ngasilka karang ti bisi reti nadai ngira pekara ke ditulis nya tau ngasuh ketawa tauka serius,

Penulis berita ba media chelak bebida enggau penulis blog laban iya bepanggai ba pemerat pekara ke diasuh pengarang sida tulis tauka belalauka polisi media nya empu.

Sesebengkah karang nya ditengkebang betukuhka buletein tauka newsletter tau mega dikumbai karang kenang (rencana). Enti sema iya ditulis ketegal diasuh sida ke ba agensi alai penulis nya gawa tentu bendar iya ngembuan juluk ati, tuju enggau philosophy iya empu. Taja pia kekadang tuju tu suah amat tepejuh ngagai pekara bukai. Suah amat diperatika karang nya enda nyereminka watak penulis nya empu. Bisi mega maya penulis nya semina deka nunjuk belalauka motif diri empu.

Bisi mega sekeda nya deka ngayanka diri pandai. Sida tu tentu ngenataika pekara ngena konsep ke tinggi lalu ngena terminologi tauka rambai jaku ke enda ulih diperetika. kitai ke macha karang nya. Semina penulis nya aja mih nemu nemu nama pekara ke dituliska iya.

Idea tauka kelikuh ke dikenataika mega panjai sereta bebelit-belit lalu tau ngasuh pemacha charut runding. Bisi mega penulis nguji mandangka pangkat diri. Jaku ke dikena maya nulis iya renjan sereta tinggi. Pekara ke ditulis mega semina komen tauka penemu diri empu aja.

Kelimpah ari nya bisi mega penulis ke enda ingat ngagai penatai diri. Leka jaku ke dikena nadai meri reti ke menyana ngagai pemacha. Karang iya nadai nyungkit sebarang penanggul ke diasaika bala pemacha. Iya mega nadai meri simpul penemu ngagai pekara ti dikenataika iya. Pekara tu tau disemaka baka orang ke belagu ba dalam bilik mandi.

Tu mih ke midaka sida nya enggau penulis ke nulis ketegal pengelurus ati. Sida tu tentu nemu tuju sida nulis. Enda kira mih tuju baka deka ngenataika pekara, nerangka sesebengkah isu tauka nuduhka sekeda penenemu senentang chara mutarka sesebengkah penanggul. Ketegal pengelurus ati, penulis tentu bebendar nulis enggau penuh pengarap sereta ngembuan komitmen ke tinggi. Tuju iya semina deka meri penguntung ngagai audience iya empu ke mayuh.

Enti sema tuai sesebengkah agensi ngasuh orang ke di baruh iya nulis ngarika iya tentu amat iya patut bisi ngembuan penyiru senentang peminta enggau pengarap ari orang ke minta. Ukai semina nya aja, tuai mega patut nemu pekara ke nanggulka klien ngambika iya ulih berundingka pekara ke patut diperambuka nyengkaum chara ke rasional dikena mutarka pekara nya.

Iya mega patut belematika isu nya ari sukut klien iya empu lalu mutarka pekara nya nitihka runding rama lalu ukai ngemeratka agensi ke diarika nya tauka semina ngarika raban ke mit. Pekara tu balat agi salah enti iya ngumbai orang ke diarika iya nya sida ke enda nemu utai. Nya alai iya patut amat dipadahka jalai ngambika ngaga utai sengapa-kada.

Taja pia tanggung pengawa apin tembu enti semina ngeluarka perintah. Balat agi timpang enti karang ke ditulis nya enda diperesa sereta diseruri sebedau dikeluarka. Enti tu nyadi karang nya dikira ba ikas ke baruh lalu mudah amat dikelanyaika bala pemacha.


Tiada ulasan:

Catat Ulasan