Jaku Pemuka
Karang tu nguji ngenangka kebuah orang ke empu sesebengkah jaku nya nyau enggai agi ngena jaku iya empu tang berengkah ngena jaku orang bukai taja pan bejaku enggau bala ke sama bansa. Nitihka pansik bisi tujuh bengkah kebuah orang nya enda ngena jaku diri empu lebuh ke berandau diri sebansa.
Apai indai ngansak anak sida belajar jaku ke dikumbai bisi standard laban ku sida anak sida semina ulih belajar siti aja jaku nya enggau manah
Raban linguistik nemu kebuah sebengkah jaku nya lus ukai ketegal orang ke ngena jaku nya udah nadai. Pekara tu nyadi ketegal sida tu udah nukar jaku sida ngagai jaku bukai. Tu nyadi ari siti serak tubuh ngagai siti serak tubuh. Kekadang bisi mega sekeda apai indai sida enggau bejaku dalam jaku diri empu lebuh berandau enggau bala anak laban sida ngasaika jaku sida empu nya nadai ngundan tikas ekonomi tauka ulih dikena ba bidang pelajar. Sida mega enggaika anak sida baka sida enda nemu jaku ke dikena ba luar rumah sida. Bala apai indai tu mega ngumbai bala anak sida semina ulih belajar ngena siti jaku aja. Pekara tu enda betul. Nembiak ulih belajar mayuh bengkah jaku kelebih agi enti sida nemu ngena. Maya agi nembiak maya ke manah alai belajar mayuh bengkah jaku.
Tasah asal tauka penusah ketegal mensia-pekara ke nadai diperambu
Tasah ketegal kemarau, penusah kurang pemakai, penyakit, perang, bah, tanah berenyang, bukit pechah, tsunami enggau penusah bukai tau bendar ngasuh mensia lus ari dunya tu. Ambika chunto, jaku Paulohi ke bisi dikena ba menua Maluku, Indonesia nadai agi ketegal 50 iku ke bejaku Paulohi nya mati ketegal tanah berenyang enggau penusah tsunami.
Pindah ngejang ari menua diri empu-pekara ke udah diperambu
Raban Sosiolinguistik madahka mayuh faktor ke bisi kaul entara kebuah seraban pejaku betukar bansa jaku sida enggau pengurang saiz sesebengkah bansa nya tadi. Pindah ketegal dipejal pindah tauka ketegal ari pengeka diri empu nya siti ari kebuah sesebengkah jaku nya lus. Tu bisi nyadi ba bansa Native American enggau orang Siberia. Bansa Naka'ela di Maluku, Indonesia, bisi diripot nyau kurang batang tubuh ketegal ke pindah ari bukit ngagai pasai ba menua pesisir ba pulau Seram.
Orang Hawaii diatu semina tinggal 20% aja ke agi bejaku jaku Hawaii ketegal ke udah pindah ari palan asal sida.
Perintah Amerika, Russia enggau Canada udah mindah orang asal ngagai sekula ke bisi buding laban ke deka ngasuh sida bejaku semina jaku bansa aja ba sekula tu. Tu mih ke ngujungka nembiak lalu enda nemu jaku asal enggau daya idup bansa diri empu.
Ngena jaku kedua ba sekula – ketegal mayuh betukar jaku.
Jaku ke dikena ngajar di sekula nyadika kebuah bala nembiak betukar jaku ari jaku keterubah (first language) ngagai jaku kedua. Pekara ti bansa tu bisi nyadi ba menua Philippine. Orang ke besekula sebedau taun 1972 nemu bejaku English ke nyadi jaku kedua sida kelimpah ari jaku bansa diri empu.Tang sida ke belajar udah taun 1972 nemu agi jaku Tagalog ke nyadi jaku kedua sida enti dibanding enggau jaku English. Kemaya hari tu sekeda ari sida ngena jaku Tagalog taja pan Tagalog nya ukai jaku etnik sida empu.
Polisi jaku bansa-kebuah ngasuh jaku betukar
Tuju orang mayuh enggau perintah ke deka nempa sebuah menua mega ngasuh sekeda jaku betukar kelebih agi baka ba menua Amerika enggau Israel. Lebuh Tanzania merdeka, bala tuai sida mutuska penemu ngasuh jaku Swahili nyadika jaku bansa menua sida. Mayuh amat orang Tanzania udah nya nyau nemu bejaku Swaihili kelimpah ari jaku diri empu. Diatu bisi sekeda sida nya nyadika jaku Swahili nya jaku sida empu. Taja pia agi mayuh bala etnik bukai agi bejaku jaku sida empu ke pun jaku sida.
Faktor ke enda ngasuh sesebengkah bansa nya betukar bansa jaku
Mensia mayuh ba sekayu dunya tu deka agi bejaku ngena jaku diri empu ari jaku kedua ke diasuh perintah. Hal tu nyadi, laban sida ukai semina landik agi ngena jaku nya tang jaku nya dikena lebuh ke berandau enggau bala pangan enggau kaban belayan. Tu mih ke ngasuh kaul sida rapit agi.
Faktor bukai ke ngasuh jaku betukar
Sekeda ari faktor ke ngasuh jaku nya berubah iya nya ketegal ari pemansang nengeri, pengawa industri, ubah ekonomi, betukar perintah enggau penyampau tubuh orang ke empu jaku nyau kurang. Taja pia, kitai enda tentu ulih nyangka kemaya sesebengkah jaku nya tau berubah laban pekara tu tau nyadi sebarang maya kelimpah ari faktor daya idup sesebengkah bansa.
Penutup
Nya mih sekeda kebuah sekeda orang nya nadai agi ngemeranka jaku diri empu taja pan nampil berandau enggau orang ke sebansa enggau iya. Nya alai kitai ke agi tegap sereta meruan jaku diri empu patut bechuanka kenang tu ngambika enda nyadi ba tubuh kitai.
[Penyanding penemu:
Tiada ulasan:
Catat Ulasan