Pemesai Guna Ngetan Jaku Ke Nyau Deka Lus

1. Pemuka Jaku

Ari 6.809 jaku ti bisi dirintai dalam database Ethnologue: Languages of the World 330 bengkah jaku bisi dikena sejuta orang bagi sesebengkah jaku nya.Penyampau ke mayuh baka tu bebida amat enti dibanding enggau 450 jaku ke mimit lalu ba tikas ke nyau deka lus. Jaku ti nyau deka lus tu semina dikena bala orang tuai aja. Taja pia mayuh orang nyangka tekejut enti sida nemu berita ke madah setengah ari pemayuh jaku ti dikena ba dunya tu nya dikena 6,000 iku; reti nya setengah ari jaku di dunya dikena kurang 6,000 iku, lalu setengah agi 6,000 iku tauka kurang.

2. Pemesai Guna Ngetan Jaku Ke Nyau Deka Lus

2.1 Nyaga jaku ketegal ari pengelenyau daya idup

Kati bisi kini bala kitai berunding enti sesebengkah jaku nya agi meruan dikena tauka enda? Mayuh orang mupuk irau enti sebansa utai tumbuh tauka jelu nyau deka pupus. Taja pia kitai patut agi berasai tusah enti sesebengkah jaku nya pupus ari dunya tu. Sesebengkah jaku nya tumbuh dalam genturung pendiau sesebengkah raban bansa. Jaku tu nyadika kelai enggau daya idup sesebengkah bansa nya. Tiap-tiap leka jaku, rambai jaku, klausa enggau tukuh wacana ke dikena bisi nunjukka pekara nya tau sebaka tauka bida. Jaku ke dikena sida ngelaika dunya enggau adat ke dikena enggau pangan diri. Sida ngena jaku dikena nusui ensera, nyeritaka pekara ti udah nyadi, nelusurka leka main sereta ngenataika chara idup ngagai bala anak engau uchu ambu diri empu.

2.2 Nyaga pengelenyau penerang senentang utai tumbuh enggau pengidup siga

Joseph E. Grimes nya siku ari pemansik ke mansik senentang utai tumbuh enggau jelu di Mexico. Utai tumbuh enggau jelu tu endang ditemu ba menua orang bansa Huichol di Mexico. Sida bansa Huichol ulih madah dalam jaku sida empu ngagai Joseph Grimes senentang mayuh bansa utai tumbuh enggau jelu. Tu nyengkaum sekeda jelu ke nadai ditemu dalam bup penyanding penemu baka jelu jaguarundi. Sida Huichol nusui ngagai iya baka ni pendiau jelu tu sepemanjai taun sereta enggau utai ke diempa jelu tu. Sida mega ulih madah ngagai iya enti bangkai jelu ti ditemu sida nya udah dibunuh engkulau tauka singa bukit. Enti semak Joseph tu enda meretika jaku bansa Huichol tentu nadai chara sida ulih nyeritaka pekara nya ngagai iya laban sida tu nadai tentu nemu jaku bukai. Penerang baka tu majak lenyau enti jaku ke dikena nerangka pekara nya udah pupus.

2.3 Ngetanka pengelala diri

Mayuh orang ngasaika jaku nyadika pengelai diri tauka identiti diri. Siku ari linguistik bansa Russia ke diburu ari Russia dalam taun 1977 ketegal hal politik madahka iya enda nemu agi nulis dalam jaku Russia taja pan jaku nya endang jaku pemaiada iya empu.

[Penyanding penemu: Barbara F. Grimes, Ethnologue Editor 1971-2000]