-->
Reti leka jaku kelalu masau jam ianya ngereja pengawa ti nadai meri penguntung ngagai diri empu. Pengawa kelalu masau jam tu tau meri pengerugi ngagai sida nembiak laban jam ti tebasau nya kelalu berega enti sida nguna iya enggau manah.
Pengawa kelalu masau jam tu suah nyadi ba nembiak ke agi besekula. Sida rindu amai masau jam laban sida nadai nemu tiap-tiap minit enggau second nya kelalu berega. Enti sida udah nemu pemesai guna jam nya baru sida nyesal. Jam enda kala nganti mensia. Nya alai orang ke bedagang enda kala masau jam. Jam disempama baka emas lalu enti iya lenyau, iya enda ulih diganti tauka diambi pulai.
Dikena nagang nembiak ti kelalu masau jam bekedayau kin kitu nadai bebatang tuju, mayuh chara ti ulih dikena. Siti ari chara tu nya nganjung nembiak nya ngagai kelas tuisyen. Apai indai tau nganjung anak sida ngagai kelas tuisyen pagi enti anak sida besekula lemai lalu ngagai kelas ngalih hari enti iya besekula pagi.
Kelimpah ari nya, sida mega tau dianjung belajar kelas komputer. Ba endur tu, nembiak ulih belajar pasal penemu komputer enggau dunia teknologi pemadah tauka IT. Sida mega ulih berandau enggau orang di sekayu dunya ngena internet. Senutuk enggau nya mega, sida ulih belajar bemacham-macham bansa penemu ti tau meri sida pemandai sereta pengelandik ti tinggi sereta dalam dalam program komputer. Ari nya iya tau bendar nagang sida ari muai jam bekedayau kin kitu ngereja pengawa ti nadai penguntung.
Nembiak mega ulih enggau masuk pengawa luar tauka pengawa ko-kurikulum ti bisi diatur selepas sekula. Kelab main enggau lumba, kelab akademik enggau Gerempung Bepekayan Seraris nya sekeda ari pengawa ti tau dipasukka nembiak. Kelab Tang Soo Doo, ambika banding udah balat bendar meri penguntung ngagai nembiak ti bisi enggau masuk kelab nya. Kelimpah ari belajarka pengelandik besilat enggau bekuntau, sida mega ngena jam ti bisi enggau menyana.
Nya alai nembiak patut nemu pengawa ti kelalu masau jam nadai meri penguntung tang mayuh agi ke meri pengerugi. Bala nembiak patut nagang diri empu ari ke enggau bala pangan bekedayau sebelah endur enda tentu pasal.
[ Diambi sereta dibali ari Karang Mathbriela Cindy,3Proton SMK Tun Abdul Razak]
yuhuu..br tepeda ka karang lama aq suba...:)) macih...
BalasPadam