-->
Menua Malaysia kemaya hari tu bisi ngembuan sejarah cherita lama ti patut bendar dikenang kelebih ngagai nembiak rebak baru. Tuduh penemu ti deka ngemunka menua Malaysia tu bepun ari pikir Tunku Abdul Rahman dalam taun 1961. Nitih ku iya menua tu ila deka nyengkaum Tanah Melayu, Singapura, Sabah, Sarawak enggau Brunei. Menua deka beserakup lalu dikumbai Serakup Malaysia.
Perintah British maya taun 1960-an endang bisi ati deka meri merdeka ngagai menua ti dipegai iya. Tang taja pia menua Sarawak dalam pikir sida British bedau besedia merintahka diri laban ketegal ekonomi enggau politik menua ti bedau entap. Nya meh kebuah Tunku Abdul Rahman besedia mai Sarawak enggau Sabah masuk Serakup Malaysia ngambika dua iti menua tu ulih merdeka baka menua Semenanjung.
Lebuh tuduh penemu ti deka numbuhka Serakup Malaysia dibantai dia rayat menua Sarawak bedau besedia sereta setuju enggau masuk. Sida ke nyadi tuai maya nya meratika nadai penguntung ekonomi ti ulih ari ti enggau masuk Serakup Malaysia. Tang taja pia lebuh udah diterangka wakil Cobbold Commision enggau manah sereta ditubuhka Komiti Kaul Pupu Raban Bansa tauka JPPM dia bala tuai-tuai menua berubah ati lalu besetuju deka masuk Malaysia. Nya meh ti ngujungka Sarawak merdeka dalam Malaysia kena 16 haribulan September 1963. Cherita tu taja dilansaka naka tu tang bisi bendar mai reti ti dalam ngagai kitai rayat Malaysia kelebih agi ti diau mendam di menua Sarawak. Berindik ari ti masuk Malaysia, Sarawak bulih merdeka tumu agi ari ti dijangka laban lebuh maya nya Sarawak agi dipegai perintah British Colony.
Diatu umur Sarawak nyau manggai 40 taun. Nama pemasang sereta utai ti berubah enggau pemujur ti bisi sekumbang Sarawak udah merdeka? Tanya tu besai bendar reti ngagai rayat Sarawak dikena ngenangka pemansang, meratika pemujur sereta meri terima kasih rayat ngagai tuai-tuai menua ti udah enggau naka ulih nitihka pikir enggau runding sida besetuju deka enggau masuk Serakup Malaysia. Aram meh kitai sama bela merati lalu mulaika pengingatka kitai ngagai pemansang Menua Sarawak dalam timpuh ti ngelama empat puluh taun.
Pengawa Politik
Pemansang dalam pengawa politik tu bepun ari tuduh penemu ti deka numbuhka Serakup Malaysia. Sarawak United People’s Party (SUPP), Parti Negara Sarawak (PANAS) enggau Sarawak National Party(SNAP) nya sekeda ari parti ti ditubuh rambau Sarawak deka nyendiaka diri masuk Malaysia. Kelimpah ari nya mega bisi parti politik ti bukai ditumbuh baka Barisan Rakyat Jati Sarawak (BARJASA) enggau Parti Pesaka Anak Sarawak (PESAKA). Semua parti politik tu ditubuhka dikena enggau bepilihka pengari menua. Lebuh ti nyendiaka diri enggau bepilihka pengari menua ti deka megai Sarawak dia parti SNAP, BARJASA enggau SCA bisi besempekat nubuhka Parti Alliance Sarawak. Nya mega ngujungka Parti tu mujur bendar dalam pengawa bepilih.
Berengkah ari nya Kepala Menteri Sarawak dipilih ari Parti Alliance. Tan Sri Datuk Stephen Kalong Ningkan dipaduka nyadi kepala menteri ti keterubah. Nangkanka nya dalam taun 1966 dataika taun 1970, menua Sarawak diperintah betuaika kepala menteri Datuk Patinggi Tawi Sli. Ari taun 1970 ngagai 1981 Sarawak diperintah Datuk Patinggi Tun Abdul Rahman Yakub. Lalu ari taun 1981 nyentuk kediatu menua Sarawak dipegai kepala menteri Datuk Patinggi Tan Sri Abdul Taib Mahmud. Sepemanjai timpuh 40 taun menua Sarawak udah diperintah empat kepala menteri. Kelimpah ari nya menua Sarawak udah bisi lima iku Yang di-Pertua Negeri iya nya bepun ari Tun Abang Haji Openg lalu ditangkanka Tun Tuanku Haji Bujang bin Tuanku Othman, Tun Datuk Patinggi Abang Haji Muhamad Salahuddin, Tun Datuk Patinggi Abdul Rahman Yaakub Tun Datuk Patinggi Haji Ahmad Zaidi bin Adruce enggau penudi bendar nya Tun Datuk Patinggi Abang Haji Muhamad Salahuddin ti dipilih baru mangku pengawa nyadi Yang di-Pertua Negeri.
Enti dibanding enggau nengeri bukai di Malaysia, nengeri Sarawak nya nengeri ti pemadu besai ti ngembuan kandang menua ti mungkur enda kurang ari 124,450 km besegi. Ari pemesai kandang menua nya dia pemansang Menua Sarawak diatur nitihka bagi menua enggau pelilih menua. Lebuh maya baru merdeka menua Sarawak dibagi ngagai lima Bagi menua nya baka Kuching, Simanggang, Sibu, Miri enggau Limbang. Tang laban rayat majak mayuh lalu perintah ngasaika pemansang patut disediaka enggau jampat dia perintah menua bepikirka nambah dua iti agi bagi menua ti dibagi ari Bagi Menua Sibu lalu nyadi Bagi Menua Sarikei enggau Kapit. Bagi menua betambah nyadi sembilan lebuh Bintulu enggau Kota Samarahan dipadu nyadi bagi menua ke-8 enggau ke-9. Lalu dalam taun 2002 Mukah enggau Betong udah diangkat nyadi bagi menua ke-10 enggau ke-11. Juluk perintah ti ngangkatka mayuh agi menua nyadi bagi menua dikena nyungkak peluang pemansang ba siti-siti endur.
Pengawa Ekonomi
Dalam timpuh 40 taun menua Sarawak balat bendar mansang sereta mujur dalam mayuh bengkah pengawa. Nitihka pansik pukul rata ekonomi menua Sarawak tumbuh 7.5 peratus tiap-tiap taun dalam timpuh dua-puluh taun ari 1971-1991. Sebedau merdeka iya nya dalam taun 1961 nilai Gross Domestic Product(GDP) menua Sarawak semina RM438 million tang GDP nya betambah nyadi RM6,592 million dalam taun 1990. Tu terang bendar mandangka perintah mujur ngemansangka menua Sarawak. Gaji perkapita orang ti diau mendam di Sarawak mega betambah ari taun ke taun.
Pemujur pemansang ekonomi menua Sarawak sigi bekait bendar enggau ekonomi Malaysia. Lebuh ti merdeka dalam Malaysia dia atur pemansang mega nitihka Atur Pemansang Menua Malaysia. Anggar belanja dalam tiap-tiap lumpar pemansang majak betambah dalam tiap-tiap sitak lumpar pemansang. Ambika banding dalam Atur Pemansang Malaysia Ke-1 (RM1) dia perintah udah nganggarka belanja RM249,62 juta lalu dalam Atur Pemansang Malaysia Ke-4 anggar belanja nya ditambah ngagai RM5,110 juta. Reti nya pemansang menua Sarawak sigi bekaul rapat enggau pemansang Menua Malaysia. Pemansang ekonomi mega bekaul rapat enggau pengawa bukai baka pengawa betanam betupi enggau pengawa industri bukai.
Pemujur Pengawa Betanam betupi
Ari jeman Brooke nyentukka diatu menua Sarawak endang ngemeranka pengawa betanam betupi. Pengawa betanam betupi udah mujur nambahka GDP menua Sarawak ngagai 7.4 peratus dalam taun 1997 lalu meri peluang bekereja ngagai 33.3 peratus iku orang di Sarawak. Export dalam asil betanam-betupi mega betambah ari RM301 juta dalam taun 1980 ngagai RM387 juta dalam taun 1997. Agensi perintah ti bekaul enggau betanam-betupi baka SLDB, SALCRA enggau LCDA udah ditumbuhka dikena nyaup ngemansangka tanah. Kelimpah ari tiga agensi tu FELCRA enggau Kompeni Luar bisi mega enggau diambi ngemansangka kebun bedandang besai.
Naka pengujung taun 1995 140,000 hektar tanah udah diperimba lalu ditanamka enggau sabun. Tuju perintah muka kebun bedandang besai awakka ulih nguntungka mensia mayuh kelebih agi ngagai raban bansa bumiputera. Kelimpah ari pemansang dalam pengawa nanam sabun Sarawak mega mujur ngasil lada ti pemadu mayuh di Malaysia. 99 peratus ari lada Menua Malaysia datai ari Sarawak.
Projek Pemansang Betanam Betupi Begenturung (IADP) udah mujur bendar dipejalaika di Samarahan enggau Kalaka. Projek ti bansa tu ukai semina ngangkatka pendiau pengidup sida ti ba genturung nya tang mega ngujungka pasar Kota Samarahan enggau Saratok ti semak enggau genturung pendiau nya mupuk maju dalam pengawa ekonomi. Kurang lebih 96,000 hektar tanah udah diperimba dalam projek nya lalu iya mayuh bendar meri peluang bekereja ngagai mensia mayuh. Perintah mega udah ngemansangka 600,000 hektar tanah nitihka Atur Pemansang Tanah Temuda Bansa Asal. Berindik ari nya mayuh agi asil sereta penguntung deka disepi rayat menua pesisir lalu deka ngubahka chara betanam ti bekenaka teknologi baru.
Taja pan mayuh asil pengawa ekonomi bukai ti tau mai penguntung ngagai Menua Sarawak, perintah menua tetap enda sanggu lalu terus ngemansangka pengawa betanam betupi. Dalam taun 2000 aja RM339 juta udah diperambu sereta diagih dikena ngemansangka pengawa betanam betupi. Sepemanjai timpuh 40 taun tu Opis Betanam betupi udah nubuhka enam iti Stesen Pemansik Betanam betupi, sepuluh iti Palan Pematih Orang Bumai enggau siti Institute Betanam betupi. Iya ti baru iya nya kilang ngaga sagu di Mukah enggau Industri Ikan Tasik di Beladin chunto dua iti projek ti udah diperambuka perintah sereta ditemu deka mai penguntung ti besai ngagai mensia mayuh di menua pesisir.
Pemujur Industri Kayu Balak
Industri kayu balak enda mega kurang dalam mantu nambahka GDP Menua Sarawak. Dalam dekad 1960 industri kayu di tangga kedua nangkanka pengawa betanam betupi dalam mantu ekonomi menua. Taja pia penatai pemisi ari industri kayu bisi nurun mimit dalam dekad 1970. Tang industri tu meri penguntung dalam taun 1979-1980. Dalam taun 1992, penyampau asil eksport kayu balak nya RM2,540.4 juta tauka 24 peratus ari asil eksport Sarawak.
Industri kayu diatu majak maju kelebih agi dalam pengawa memproses kayu. Zon Pemprosesan Kayu Tanjung Manis nya siti ari estet industri kayu di deka meri penguntung ti besai ngagai Menua Sarawak. Naka kediatu perintah Menua Sarawak udah merambu deka ngemansangka projek palpa enggau kertas di Bintulu.
Industri Minyak
Siti agi pengawa ekonomi ti bisi mai pemujur ngagai Menua Sarawak nya industri minyak. Minyak berengkah ditemu di Miri dalam taun 1968 lalu gas bisi ditemu dalam taun 1970. Sekumbang ti udah dikereja penyampau asil eksport industri tu majak mansang ari taun ke taun. Dalam taun 1992 aja penyampau asil eksport minyak nya RM2,595.6 juta.
Kelimpah ari ti ngeluarka minyak dia pengawa bukai ti besangkut paut enggau industri minyak bisi mega digaga. Industri Petrokimia baka Gudang Gas Cecair Asal enggau Kilang Baja Urea ASEAN Sdn. Bhd. di Bintulu nandaka dua iti projek ti tumbuh asil ari pemansang industri minyak.
Industri Begagaka Utai
Dalam pengawa industri begagaka utai asil mata duit ti diterima ari industri tu agi kurang lebuh maya dekad 1960 tang iya majak mansang dalam dekad 1970 lebuh perintah ngaga polisi ti ngemeratka pemansang dalam pengawa industri begagaka utai. GDP industri tu diperatika bisi betambah sembilan peratus kelebih agi dalam taun 1976-1980. Ari timpuh 1980 – 1990 asil industri tu bisi nambah ngagai tigabelas peratus. Sekumbang 40 taun ti udah merdeka mayuh bendar estet perindustrian udah digaga di serata menua Sarawak. Sekeda ari estet perindustrian tu baka ti bisi ditemu di Pending, Sejingkat, enggau Kidurong. Kilang beteknologi tinggi baka Taiyo Yuden, 1st Silicon, Komag enggau Toko Electronics nya sekeda ari kilang ti besai ti bisi dibuka di Sarawak kemaya hari tu.
Kelimpah ari nya perintah mega bisi meransang mensia mayuh enggau masuk pengawa industri mit enggau ke jelan pemesai(SMI). Industri ti mit bakatu ngeluar asil baka pemakai lalu utai ti bukai ti dikena besehari sehari. Bisi mega estet perindustrian mini dibuka baka di Kota Samarahan enggau Mukah.
Industri Dagang Temuai
Taun 2003 udah disebut taun nemuai ngagai menua Sarawak. Taja pan juluk ati ti deka mai mayuh agi temuai napat menua Sarawak bisi tejanggal mimit ketegal penyakit pandak seput ti teruk(SARS) tang perintah tetap bekereja enggau naka ulih ngaturka temuai nemuai ngagai menua Sarawak. Rayat Sarawak benasit bendar laban menua tu mayuh endur ti tau ngelantangka ati baka Gua Niah, Gua Mulu, Kampung Budaya, Muzium Sarawak enggau tempat-tempat ti bukai. Rayat Sarawak mega patut berasai temegah ati laban Taman Negara Mulu udah diaku nyadi siti ari pesaka dunya. Kelimpah ari nya mayuh agi tempat-tempat ti besejarah baka kubu-kubu lama tetap diintu perintah ngambika bisi dipeda bala temuai.
Pemujur industri dagang temuai ulih diperati ari penyampau temuai ti bisi datai napat Menua Sarawak Dalam taun 2001 ambika banding, bisi tiga juta iku temuai udah datai nemuai ke Sarawak. Tu nandaka menua Sarawak majak dikerinduka bala temuai ari serata dunya. Perintah menua meri sukung ti chukup dikena ngemansangka industri tu. Naka taun 2000, RM160 juta udah diagihka perintah dikena ngemansangka pengawa industri dagang temuai. Asil ari pemansang industri dagang temuai, industri ti bukai baka industri asil pengelandik jari enggau industri hotel mega maju.
Pemujur Dalam Pemansang Sosial Enggau Mensia Mayuh
Menua Sarawak mega balat bendar mujur dalam pemansang social. Siti ari pemujur ti nampak bendar diperatika kitai iya nya pemansang dalam penatai pemisi mensia mayuh. Perambu sereta langgur pemansang ti manah udah diaturka perintah menua dikena ngemansangka penatai pemisi mensia mayuh. Perintah nadai bechiping penemu lebuh ti magika asil ekonomi enggau pemansang ngagai genap pupu raban bansa di Sarawak. Mensia mayuh mega nunjukka ulah ti manah sereta nerima pemansang ti diberi perintah enggau chukup basa. Tu ngayanka ‘standard’ pengidup mensia mayuh majak mansang manah ari ti udah kelebih agi sebedau merdeka.
Enti dikalih ke enggau jaku bukai, dia kitai tau nyebut penyampau mensia mayuh ti dipanjuk penyeranta majak kurang ari taun ke taun. Ambika banding dalam taun 1976 penyampau orang ti seranta nya 56.5 peratus tang penyampau nya bisi nurun dalam taun 1990 nyadi 21 peratus. Nitihka pansik penyampau tubuh di Sarawak dalam taun 1997 bisi 1.9 juta iku lalu ari penyampau nya 5,000 buah genturung pendiau bisi ditemu diau ngachir menua Sarawak.
Berindik ari pemujur Atur Pemansang Malaysia dia penyampau orang ti seranta dalam taun 1995 udah nurun ngagai 17 peratus. Perintah mega udah numbuhka mayuh agi Palan Pengerembai Menua Pesisir dikena mantu rayat menua pesisir ngangkat sereta ngubah chara pengidup enggau penatai pemisi sida. Dalam taun 2000 RM67 juta udah diagihka perintah dikena ngemansangka Palan Pengerembai Menua Pesisir. Enggau nya konsep Palan Pengerembai Menua Pesisir udah mujur bendar mai pemansang ti komprehensif dalam pengawa ekonomi enggau sosial.
Pengawa ti ngemunka Polisi Ekonomi Baru dalam timpuh dua puluh taun ari 1971-1990 patut bendar dikenang laban udah mujur bendar ngurangka penyampau orang ti seranta sereta ngatur pendiau pengidup ti baru ti enda bechuanka penatai pemisi ekonomi nitihka pupu raban bansa. Taja pan polisi tu udah nyadi sejarah tang pemesai reti polisi tu dalam ngurangka penyeranta mensia mayuh endang enda ulih disangkalka agi. Tambah mega tusah bendar deka meragam bakanika penyadi ekonomi menua Malaysia kelebih agi Sarawak ulih berubah enti nadai polisi ti baka tu.
Perengka Rama Mensia Mayuh
Dalam pengelama empat puluh taun mayuh bendar perengka rama mensia mayuh udah digaga sereta disendiaka perintah. Perengka ti bansa tu ukai semina digaga di bandar-bandar tang mega di menua pesisir. Perintah menua udah ngagihka RM415 juta dikena begagaka sereta ngemanahka jalai alun enggau jematan. Naka taun 1996 kurang lebih 6000 kilometer jalai alun udah bisi digaga.
Kelimpah ari jalai alun, perintah mega udah mujur bendar ngadaka api eletrik ngagai mensia mayuh. Projek Eletrik Hidro Batang Ai nya siti chunto pemujur perintah menua nyendiaka perengka dikena mensia mayuh. Projek tu ti beungkus RM560 juta nya siti ari projek ti ulih ngeluarka kuasa eletrik ti besai. Nambahka nya perengka eletrik udah meri penguntung ngagai 190,00 iku orang.
Loji penapis ai mega udah mayuh digaga lalu udah ngeluar kurang lebih 106,000,000 meter padu ai dalam taun 1991. Paip ai ti beresi beguna bendar ukai semina ngagai sida ti diau di bandar tang mega di menua pesisir.
Pengawa belajar nya siti ari pekara ti mujur bendar dikemansangka sepemanjai timpuh empat puluh taun udah merdeka. Dalam taun 1963, Sarawak semina bisi 964 sekula primary lalu 36 buah sekula sekondari. Tang dalam taun 1993 pemayuh sekula primary udah betambah nyadi 1261 buah lalu sekondari betambah nyadi 129 buah. Kelimpah ari nya mayuh bendar institut pelajar tinggi udah bisi digaga dalam timpuh 40 taun. Sekeda institut tu baka UNIMAS, pampang UITM, Universiti Curtin enggau Swinburne. Pemansang dalam pengawa belajar udah mujur bendar ngangkat penatai pemisi rayat Sarawak. Penyampau nembiak ti nemu macha udah betambah ari 25 peratus (1960) ngagai 55 peratus dalam taun 1980. Taja pia nembiak patut diansak belajar enggau bebendar agi ngambika mayuh agi ari sida ulih belajar di institusi pelajar tinggi.
Pengawa ti begagaka rumah nya siti agi pekara ti mujur bendar udah diadu dalam timpuh empat puluh tahun. Pengawa ti begagaka rumah kos murah nya siti ari pengawa ti udah diatur perintah dikena meri peluang ngagai sida ti begaji mit bebelika rumah.
Siti agi pekara ti mujur bendar diadu iya kaul ti rapat di antara pupu raban bansa. Sekumbang ti udah merdeka kaul di antara pupu raban bansa majak manah lalu nadai alai mantah. Rayat diau enggau likun sereta bebasaka pangan diri. Konsep berat sama ngangkat, lempung sama nanggung agi dipatih di menua Sarawak. Mensia mayuh enda ngira pupu raban bansa enda sanggu betulung pangan diri lebuh maya tusah. Siti chunto nya ari genturung pendiau ti diau dalam siti siti taman perumahan.
Dalam pengawa lumba enggau main menua Sarawak udah mujur bendar ngayan penguat diri. Kontinjen menua Sarawak udah nyadi champion tiga kali beturut-turut dalam lumba SUKMA III.IV enggau ke V. Kelimpah ari nya Sarawak mega kala nyadi champion dalam main bol berebutka mangkuk FA dalam taun 1992. Dalam taun 1993, perintah menua Sarawak udah dipilih nyadi pemenang dalam Kategori ‘Sports Leadership 1992’. Kelimpah ari nya, menua Sarawak udah mujur ngasilka pelumba ti tebilang baka Bala Ditta, Watson Nyambek, Sapok Biki enggau sida ke bukai.
Pemujur Sarawak sekumbang ti empat puluh taun udah merdeka ukai baka sempama orang ti ngasaika diri untung nemu beliung enda ngambuh, nemu peredah enda nikuh. Tang semua pemujur ti bisi kemaya haritu baka pemujur pengawa ekonomi, politik enggau social endang datai ari pengangkun rayat ngagai menua Sarawak sereta pengerajin sida ngerejaka pengawa.
[Karang tu kala masuk pekit ngarang ke diatur Opis Pemadah Sarawak lalu bulih lumur 2]
Tiada ulasan:
Catat Ulasan