Raban bala pengajar baru udah ngintu Hari Pengajar ti disambut kena 16hb Mei ninting taun. Maya nya mega bisi aja pekara ke manah dikenataika Menteri Pelajar ngagai bala pengajar dikena ngenangka budi sereta pengeransing bala pengajar ngajar nembiak. Apin lama ke udah bisi agi berita ti tau bendar ngeruga runding bala pengajar ba serata menua Malaysia.
Berita tu bisi bendar bekaul enggau pemansang enggau pengidup raban pengajar. Sapit Menteri Pelajar, Dr. Mohd. Puad Zarkashi apin lama ke udah bisi madahka jemah ila raban bala pengajar dipinta ngambi lesen ngajar dulu sebedau sida ulih dituduh nyadi pengajar. Ngelama tu raban pengereja pengawa ke bisi diberi lesen sebedau diterima gawa nya nyengkaum akauntan, lutur lawyer enggau injineer.
Nitihka berita, lesen tu dilanggur ngambika nyadi siti ari jalai ngetanka intergriti, imej enggau martabat pengajar lalu senutuk enggau nya mega mensia mayuh dikearapkan terus ngembuan pengarap ngagai bala pengajar. Nitihka penerang, menua ke udah ngena atur ti bansa tu iya nya menua Kanada. Di Kanada, pengajar diberi lesen ngajar sebedau sida ulih ngajar.
Enti kitai mulaika pengingat, dulu suba ba era taun 80-an, chara ke nyau deka engkabih baka lesen ngajar tu bisi kala dipejalaika opis menteri pelajar, tang maya nya iya dikumbai Bup Biru. Maya nya suba, tetiap iku pengajar ke udah dilatih ngajar dipinta ngerijistaka diri enggau Pendaftar Sekula, Menteri Pelajar ngambika sida ulih diterima nyadi pegawai perkhidmatan pendidikan. Pengajar maya tu suba mega dipinta ngidupka bup sida tu ninting taun. Bup Biru nya mega bisi kuasa dikinsilka enti raban pengajar bisi ditemu ngelanggar atur ngajar. Taja pia maya tu suba, Bup Biru tu semina dipejalaika ba menua Semenanjung Malaysia aja.
Pekara ke nyadi buah kenang senentang pekara tu nya pematut lesen ngajar diberi ngagai raban pengajar di serata menua Malaysia. Pengajar nitihka definisyen ti bendar ukai semina raban pengajar ke ngajar ba sekula perintah tang mega nyengkaum sida ke ngajar ba sekula swasta. Nitihka data, penyampau raban pengajar ke ngajar ba sekula perintah serata Malaysia nya kurang lebih 400,000 orang. Tu penyampau ti chukup besai enti dibanding enggau raban pengereja pengawa baka akauntan, lutur, lawyer enggau injineer.
Naka ke diatu pengajar dikemeratka ngembuan pemendar ikhtisas ba bidang ngajar. Tu tau nyengkaum sida ke bisi ngembuan sijil, diploma tauka degree dalam bidang ngajar. Taja pia, nitihka praktik, opis pelajar agi mega ngambi sida bukai ke nadai ngembuan pekara di atas nyadi pengajar sandaran, sementara tauka pengajar pengganti. Enti atur ke meri lesen tu dipajalaika, dia opis pelajar enda ulih ngambi orang sebarang nyadi pengajar sandaran, sementara tauka pengajar pengganti. Tang ba penemu penulis atur ke enda nerima orang ti nadai ngembuan sijil, diploma enggau degree ba bidang ngajar enda ibuh ngantika bisi lesen ngajar laban atur nya ulih dipejalaika barang maya kemaya hari tu. Nya alai nya ukai nyadika kebuah lesen ngajar diberi ngagai pengajar ngambika nadai agi pengajar sandaran, sementara tauka pengganti.
Langgur tu mega diperatika bisi disakal ukai orang bukai tang menteri pelajar empu enggau Gerempung Pengajar Bansa tauka National Union of Teaching Profession (NUTP). Nitihka penemu Menteri Pelajar, pekara ke beberika lesen ngajar ngagai bala pengajar tu ukai pengawa ke praktikal. Nitihka penemu iya ba Malaysia, pelajar disedia sereta diberi pechuma ngagai semua nembiak rayat Malaysia lalu langgur ti bansa tu ukai pengawa ke engkeman dipejalaika kemaya hari tu.
Ba penemu NUTP, pekara ke beberika lesen ngajar ngagai raban pengajar enda tentu praktikal laban begunaka ungkus ke besai nirika gerempung tauka tubuh ke ngemata, merati sereta meri lesen ngajar ngagai bala pengajar tu ila. Nitihka penemu gerempung tu, sida bisi betanyaka sapa sida ke deka dipaduka meri lesen ngajar tu lalu nama bidang penemu sida tu sebedau sida ulih meri lesen ngajar ngagai raban pengajar. Kelimpah ari nya mega bala pengajar tentu deka nemu dini alai sida ulih ngambi sereta ngidupka lesen ngajar sida ninting taun. Besenutuk enggau nya mega, penanggul bukai baka lesen ke lenyau tauka lesen tiru engka bisi nyadi enti pengawa beberika ke lesen ngajar ti dipejalaika jemah ila.
Nya alai, sebedau perambu beberika lesen ngajar tu dipejalaika jemah ila bala pengajar, gerempung pengajar begulai enggau opis menteri pelajar patut bendar duduk berandau senentang pematut pekara tu. Laban sekeda pekara ke patut ditanya nya katika sepengudah lesen ngajar tu diberi ila pengajar nadai agi diasuh ngereja pengawa bukai kelimpah ari pengawa ngajar, kati enti udah bisi lesen ila, pemasang penumbuh sekolah swasta deka disekat, lalu ke penudi bendar nya kati mensia mayuh deka bebasa agi ke bala pengajar?
Tiada ulasan:
Catat Ulasan