BESEDIAKA tauka enda rayat menua Malaysia enti subsidi diambi pulai perintah? Tu mih pugu pekara ti patut disaut enggau naka pengelurus sebedau perintah meri pemutus penemu deka nentuka pengawa beberika subsidi ngagai rayat.
Sebedau saut ke engkeman ulih diberi ngagai tanya tu, kitai patut merati lalu mansik senario ekonomi kemaya hari tu, pemansang menua jemah ila sereta enggau pengidup rayat.
Rayat udah betaun-taun nyepi pemeri subsidi. Pemanah subsidi ti ngasuh rayat menua tu berasai betuah ketegal disaup enggau penuh ti ngujungka sekeda ari sida nya kaya raja. Raban tu ngarika 20 peratus rayat menua Malaysia.
Kitai anang ngumbai semina sida ke tusah aja diberi subsidi. Raban orang penatai pemisi ke besai sereta kaya mega bisi enggau nyepi subsisi ke diberi perintah. Sida kala diberi subsidi dataika sida nyadi kaya raja. Sekeda ari sida nya agi nerima subsidi dalam pengawa dagang sida iya.
Subsidi ti diberi ngagai sida tu ngurangka kos operasyen dagang sida lalu meri penguntung ke besai agi enti dibanding enggau sida ti nadai diberi subsidi perintah. Nengah subsidi tu mih, ninting taun sida nambahka pengaya diri. Tanda tauka bukti tu ulih diperatika ari rintai raban ke pengabis kaya ba Malaysia nitihka ripot apin lama ti udah.
Nya tadi raban sida ke amat-amat kaya ba Malaysia. Katika ngaga sida ke enda disengkaum dalam kategori tu tang endang sigi udah kaya lalu mega ngasaika pemeri subsidi nya?
Katika sida raban rayat ke datai ari sida ti ngembuan penatai pemisi ke jelan sereta baruh dih? Sida tu mega ngasaika pemeri subsidi, tang subsidi tu semina dikena sida beridup besehari-sehari ukai dikena sida ngulihka pengaya tauka penguntung ti besai.
Subsidi pemakai, pengerai, pelajar, minyak petrol nya entara subsidi ti diberi perintah ngagai rayat ngelama tu. Raban rayat ari penatai pemisi ke jelan sereta baruh tu begunaka subsidi dikena nampung pengidup sida besehari-sehari. Uji kitai beratika nama penyadi ngagai rayat Malaysia ke nerima gaji ti baruh ari RM1,500 sebulan enti subsidi diambi pulai?
Tiga pekara ke tau ngeruga runding sida nya, keterubah iya nya rega barang ti diguna besehari-sehari deka niki ari selama. Kedua nya, rega barang bukai ti bekaul rat enggau barang ti beri subsidi mega deka niki. Ketiga, rega barang ti nadai kaul terus enggau barang subsidi mega engka deka niki rega enggau tinggi.
Nya alai, nama penyadi ngagai kuasa meli sida tu sebedau enggau sepengudah subsidi diambi pulaika perintah? Saut iya chukup terang bendar, iya nya kuasa meli deka berasai kurang ari selama. Taja pia bisi mega sekeda bala ke madah, nadai utai ditusahka laban perintah ulih beratika pekara nya sereta neritka undang-undang. Raban ke baka tu ke bendar nemu undang-undang aja jarang bendar ulih ngedisiplinka raban pedagang ba Malaysia.
Tanda tauka bukti nya ulih dipeda lebuh maya isu ngelalaika gula enda kala ulih diputarka dataika diatu. Lain mih hal iya enti lesen import diberi ngagai semua pedagang enda ngira sapa lalu mega enda dimonopoli seraban pedagang aja. Enti pia, tentu sekali penanggul tu kurang agi.
Utai ke udah dirintai nya tadi semina nyadi ba rakyat, katika ba perintah dih? Nitihka ripot, Malaysia deka bengkerap dalam taun 2019 enti iya majak ngembuan utang enggau subsidi ti tinggi. Dalam jaku bukai, tu nandaka setaun sebedau rayat Malaysia nganti hari bulan ajih 1 Januari 2020 alai Malaysia nyadi sebuah menua maju, menua kitai deka ngasaika diri bengkerap ketegal ngembuan mayuh utang enggau subsidi.
Nya alai, baka ni chara dikena perintah nyeliahka menua tu ari bengkerap dih? Nitihka sekeda orang ke nemu pasal ekonomi, strategi ti pengabis nemban iya nya ngurangkan defisit menua ari baruh tikas tiga peratus. Taja pia, baka ni defisit ulih dikurangka ba tikas nya enti subsidi enda dikurang tauka dikinsil?
Bisi mega bala ngembuan tuduh penemu ke ngasuh chukai barang enggau servis (GST) dipejalaika dikena nambah penatai pemisi perintah. Tang katika rayat udah sanggup sereta besedia nerima sistem chukai ke baru tu?
Siti agi chara iya nya nentuka momentum penumbuh ekonomi ba tikas ke tinggi amai. Kebuah pia, penatai pemisi ari chukai korporat deka nambah. Strategi tu nitihka sida ke nemu pasal ekonomi madahka semitan agi laban meri empas ke terus ngagai rakyat enti dibanding enggau chara GST. Tang kati chukup kini enti semina ngena strategi tu aja?
Perintah patut ngembuan mayuh strategi baka bekelimat lebuh ngena duit ngambika projek-projek perintah ti dipejalaika ngena ungkus ke udah diperambuka sebedau tu. Ambika banding penyampau projek ke tejanggal enggau ditangguhka ngasuh perintah balat agi nanggung ungkus ke tinggi.
Perintah patut agi meri perati ngagai belanja ti baka tu enti dibanding enggau ungkus subsidi ke enda tinggi diberi ngagai rayat mayuh.
Sepekara agi iya nya bekaul enggau utang menua. Fokus perintah patut ditujuka ngagai utang sida swasta. Udah chukup awak alai, sektor swasta mega patut bekelimat sereta ngaturka utang sida enggau manah agi. Sida patut enda bejalaika dagang sida baka ke dipejalaika pedagang ba menua Barat. Tambah mega sektor swasta dikira nyadika pugu pemansang ekonomi menua jemah ila.
Subsidi ti diberi ngagai sida sektor swasta kelebih agi syarikat-syarikat konglomerat ti bulih untung beratus-ratus juta enggau bebilion-bilion ringgit patut bendar diambi pulai ngambika sida iya regas sereta ulih besemekih enggau lanchar agi dalam bidang nya.
Dikena nyimpulka penemu tu, kuasa meli majoriti rayat Malaysia ke bepenyampau 80 peratus nyadi faktor ke berat amat sebedau subsidi ulih diambi pulaika perintah. Angkat mih dulu penatai pemisi enggau gaji sida ke tikas ke tinggi agi dalam timpuh tiga ngagai lima taun sebedau berunding deka ngambi pulai subsidi berenggat-renggat baka ke udah diberi ngagai sida ngelama tu.
Tiada ulasan:
Catat Ulasan