Nama Kebuah Orang ... Munuh Diri

Ba Malaysia, munuh diri nya dikategorika siti pengawa ti salah tauka dikumbai jenayah sereta dikumbai ngelanggar adat menua.

Seksyen 309 Kanun Keseksaan bisi nyebut sapa bagi orang ke deka munuh diri sereta ngereja pengawa ti tau ngujungka penyalah tu deka ditinggang ukum jil setaun tauka didenda tauka ditinggang kedua-dua ukum nya. Ba dalam rumah pasung, individu tu deka diberi kaunseling.

Nitihka statistik Gerempung Pengerai Sedunya (WHO) madahka ba menua China bisi 685 iku orang munuh diri ninting hari. Tu nyengkaum sida ke beumur 20 ngagai 35 taun. Ripot tu mega madahka peratus penyampau sida ke munuh diri ba menua pesisir mayuh agi enti dibanding enggau sida ba nengeri.

Ba Malaysia, nitihka statistik ti dekeluarka Lembaga Kaunseling Negara madahka dalam taun 2007, pukul rata enam iku orang munuh diri tiap-tiap hari. Taja pia statistik tu semina belalauka kes-kes ti bisi diripot tang enti disengkaumka enggau iya ke enda diripot tentu penyampau nya mayuh agi.

Lebuh ke ngiga saut ngagai kebuah orang ke munuh diri mayuh bala ke endang pandai ba bidang tu mantaika mayuh macham teori dikena nyautka penanggul tu. Taja pia kebuah orang munuh diri engka ketegal faktor sosial, psokologi enggau biokimia.

Ari sukut sosiologi, orang munuh diri nya diketegal kena tekan ari luar baka penusah enda ulih bekaul enggau orang bukai tauka nadai kaul ti rapit enggau orang bukai. Penusah tu lalu nyadi penyakit psikologi laban individu nya ngidap penyakit mawa lalu ngujungka iya munuh diri.

Munuh diri enda ngira sapa-sapa laban penanggul tu tetap datai nempuh siku-siku dalam pengidup besehari-sehari. Pekara ti baka tu nyadi laban ba siku-siku, tikas pengidup kitai tentu bisi penanggul dalam kaul enggau orang bukai, ba pengawa enggau mayuh agi pekara bukai.

Nya alai dikena ngurangka asai stres tauka kena tekan siti ari chara nya mantaika pengerindu laban iya pun pengidup kitai mensia. Pengerindu ti manah nadai ngarapka dibalas orang bukai. Kitai patut nemu kebuah orang ke munuh diri laban sida ngasaika diri enda teputarka penanggul kelebih agi lebuh sida ngembuan pengarap ti tinggi senentang sesebengkah pekara tang enda dikibuhka orang bukai.

Nya alai kitai dipinta ngembuan pengerindu enggau pengasih ngagai orang bukai ngambika polis enda datai nangkap, ngetan sereta madahka kebuah munuh diri nya pengawa ti salah.

(Penyanding Penemu: Herald, The Catholic Weekly Vol.13)