Genap kali datai maya pengerami ti bekaul enggau jalai pengarap baka Hari Raya Adilfitri, Krismas, Taun Baru China, Deepavali, Gawai Dayak enggau Tadau Kaamatan rayat Malaysia nyambut pengerami nya enggau ati ti beniatka utai ti manah baka minta diri mujur ba semua pengawa.
Ba menua kitai Malaysia ti kaya enggau main asal pupu bansa, pengerami ti bekaul enggau jalai pengarap tu ukai semina tau bekempitka pemanah kaul antara orang ti ngintu pengerami nya aja tang mega enggau raban bansa bukai ti bisi datai ngabang lebuh maya nya.
Enti dibanding enggau menua bukai, Malaysia tu nyelai bendar. Berindik ari penyelai enggau bida senentang adat, main asal enggau jalai pengarap dia rayat menua tu balat agi begempung enggau pangan diri. Genap kali pengerami baka Hari Gawai, Hari Raya Adilfitri, Krismas enggau Taun Baru China deka datai, semua orang dipeda sama bela ransing nganti penatai pengerami ukai semina raban bansa ti ngintu pengerami nya aja tang mega bansa bukai. Pengerami nya diambi nyadika awak dikena sida bekempitka pemanah kaul enggau pangan diri.
Pemanah kaul ti bakatu semina tau diasaika enti menua kitai likun sereta bisi pemaik. Pengelikun enggau pemaik menua bepun ari pengawa ti udah dipejalaika perintah sekumbang ti udah merdeka. Perintah endang suah bendar ngansak rayat pupu raban bansa besambi penemu enggau pangan diri. Pekara ti bansa tu semina tau nyadi enti iya datai ari ati rayat empu.
Ari nya kitai enda patut telengga-lengga, tang patut ngingatka lima iti lalau Rukun Negara ti udah mujur bendar nyerakupka rayat pupu raban bansa. Penemu tu jarang bendar ulih ditunda menua bukai di serata dunya.
Nya alai kitai enda tau enda beratka penyerakup kaul ti diasaika diatu lalu enda ngumbai pengelikun ti diasaika nya datai baka nya aja. Anang kitai ngumbai pengelantang rayat ti diau ba menua ti merintah diri nya utai ti diulih enggau mudah. Kitai patut nyaga pengelantang menua laban menua kitai endang tanggung kitai.
Tu besai endar reti laban enti kitai beratika pemerinsa orang ba menua ti bisi penyarut, baka ti bisi diayanka ba televisyen ninting hari, kitai patut meretika sereta naka ulih ngetanka menua tu ari ti kena kuasa orang ari menua bukai.
Enti kitai meretika pekara tu kitai tentu naka ulih deka ngereja pengawa dikena nyaga pemaik, pengelikun, pemanah kaul enggau pengelantang ba menua tu. Sapa agi ti dikarapka nyaga menua Malaysia enti enda kitai empu.
Tiada ulasan:
Catat Ulasan