Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.
"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Sabtu, 17 Julai 2010

Mansai Sungai Ngena Tapa, Nebang Tapang Ngena Lungga



-->
Pekit main bol berebutka Piala Dunya baru udah nutupka tabir apin lama ti udah. Spanyol udah diangkatka nyadi pemenang udah ti ngalahka Belanda satu gol enda bebalas. Tang utai ti deka dikenang ditu ukai analisis tauka komen senentang dua buah team tu tang pekara ke tau bendar ngelugika ati. Apin lama ti udah menua Malaysia bisi mega enggau begauka Piala Dunya. 14hb July tu tadi dia Menteri Nembiak, Lumba enggau Main bisi mansutka penemu minta Malaysia enggau Indonesia nyadi tuai rumah ngaturka pekit main bol berebutka Piala Dunya.
Utai ke nyadika buah kenang ditu iya nya senentang pematut menua Malaysia tauka rasional iya ngaturka pekit tu. Tuduh penemu baka tu kala udah dipansutka Menteri Nembiak, Lumba enggau Main, Tan Sri Muhyiddin Yasin lebuh iya nemuai ngagai Opis Kunsil Olimpik Antarabansa tauka International Olympic Council (IOC) ba Laussane, Switzerland dalam taun 1998. Maya nya Malaysia bisi enggau nguji masuk tender berebutka nyadi tuai rumah Lumba Olimpik.
Berindik ari tuduh penemu nya tadi menteri nya nitihka pegawai ke bisi enggau nya nyau ngetu baka puyu mabuk ambuh, tegenung enda lama baka empelekung mabuk keruh lebuh Presiden Komiti IOC maya nya suba nibar iya enggau jaku seleka dua. Iya madahka pengirau ati diri ke Malaysia. Taja pan iya nadai pengirau ke Malaysia ke endang chukup perengka rama lalu bisi peneleba ngatur lumba enggau main ba tikas antarabansa tang Malaysia maya nya nadai ngembuan atlet ti betikas antarabansa ke ulih menang midul emas ke Malaysia. Utai ti balat agi dikemeratka lebuh ngaturka pekit antarabansa nya pengulih atlet menua Malaysia berebutka midul emas. Atlet ke disebut presiden nya tadi ukai siku dua tang seraban tauka team Malaysia. Jaku presiden nya tadi mih ngujungka Malaysia puntan baka menasan jalai jani enda dipilih nyadi tuai rumah lumba olimpik 2008.
Isu tauka pekara ti baru udah dikenang nya tadi nyau deka sebaka enggau tuduh penemu Menteri Nembiak, Lumba enggau Main ke diatu ti minta Malaysia nyadi tuai rumah pekit main bol berebutka Piala Dunya dalam taun 2026. Tuduh penemu nya sigi manah amat laban tau ngasuh menua Malaysia pegari ba mata dunya tang iya mega tau disemaka baka orang ke deka mansai sungai ngena tapa, nebang tapang ngena lungga.
Pekara ti diperatika gerempung OIC nya suba nyau deka sama enggau Gerempung Main Bol Antarabansa (FIFA) iya nya senentang pengulih skuad tauka team menua Malaysia menang ba sebarang main ba tikas antarabansa.
Malaysia patut ransing agi begiga sereta ngelatihka pemain nyadi sebuah team ti chukup kering ba menua Asia Tenggara tauka menua Asia. Baka ni deka ngatur pekit enti Malaysia nadai kala layak masuk tikas Piala Dunya. Penemu baka tu semina minta Malaysia nyadi pengatur tauka organiser ukai ngemeratka pemain.
Nitihka ranking FIFA Malaysia tu ba lumur 146 ba menua ASEAN lalu di baruh menua Singapore enggau Thailand. Taja pan Singapore udah enda tentu ngemeratka main bol tang iya diatu ba lumur 127 lalu Thailand nya menua ke ba atas sekali ba menua ASEAN iya nya ba lumur 106. Baka ni Malaysia ulih bekempit enggau menua bukai ba dunya enti menua ASEAN baka Laos, Mynmar, Vietnam enggau Kampuchea pan iya enda ulih ngalah? Pengawa ti baka tu semina mansauka awak laban tentu bendar kitai nya nyau baka orang ke andal ngantika kijang dalam babas. Nya alai enti ngagai sida ke bisi kuasa dalam pekara tu bepikir mih enggau dalam; enti tali ginti semina sejengkal, anang diulur ke lubuk dalam.
Posted by at
Labels:

3 ulasan:

  1. Tanpa Nama18 Julai 2010 pada 9:46 PTG

    Tabi puji ke nuan, unggal Uchutedung. Rindu aku ke tulis enggau buah kenang nuan tu. Endang amat ku nuan - agi mayuh penekul enggau penanggul ke enda tau enda diseliahka menua kitai tu, enti kitai deka sama sesingkang enggau menua bukai. Penekul enggau penanggul ti ku aku nya iya ke endang betatam dalam pikir enggau runding kitai empu, enda pia?

    BalasPadam
  2. Ibantracker21 Julai 2010 pada 8:09 PTG

    Amat bendar penemu nya. Manah amat penemu ti dibantaika nuan ngena jaku kitai tuan. Arapka nuan ngemendarka aku ngambi lalu ngena sekeda karang nuan tu ke teks ngajar nembiak ba sekula. Terima kasih.

    BalasPadam
  3. uchutedung26 Julai 2010 pada 6:30 PG

    Terima kasih ngagai seduai rbjt enggau Ibantracker laban udah meri komen senentang karang aku ditu. Ngagai Ibantracker aku endang meri peluang karang aku dikena bala pengajar di sekula.

    BalasPadam

Langgan: Catat Ulasan (Atom)