Lebuh mensia bejaku, ari mayuh pekara ti disebut bisi nya amat lalu mesti bisi tesebutka pemula. Empai lama ti udah bisi berita madahka menua kitai Malaysia deka bengkerap dalam timpuh sepuluh taun enti sema penatai pemisi perintah enggau belanja ngatur sereta ngemansangka menua enda setimbang.
Penemu ti baka tu ba runding orang bukai bisi besibil mimit kelebih agi bisi penemu ke nyalahka subsidi enggau chukai ti kurang ke ngasuhka menua tu bengkerap. Pekara ti enda dikira lebuh ke mansutka penemu tu nya senentang ulah ke rua belanja lebuh ti bejalaika pengawa perintah baka ti bisi diripotka auditor general dalam timpuh beberap dekad ti udah.
Nya alai, besenutuk enggau nya pekara ti patut dikira ambika banding baka penyampau belanja perintah ti enda patut sereta penyampau pengawa makai duit baka bebelika dua buah laptop komputer ti berega RM 80,000.00. Utai ti nyadika tanda tanya nya ni penyampau duit ti udah diambi pulai ari sida ke ngereja pengawa ti salah baka tu.
Pengawa tu balat amat salah enti dibanding enggau orang ke ngerumpak maya siang hari. Tang nya mih naka ke diatu nadai didinga berita senentang ukum ti udah diletak ba bau sida tu. Nya mih kebuah nyau setaun nampun di bukit ripot auditor general nya lalu enda dikeibuhka ngambika penanggul ngerua duit perintah tu ulih diputarka.
Ari sukut moral engka endang bisi salah mimit kini pengawa perintah lebuh ti deka nambahka penatai pemisi minta mansia mayuh bekelimat tang dalam maya ke sama mayuh amat projek besai ambika chunto RM 7 juta udah diagihka dikena ngaga gerebang pintu Penang Botanical Garden tauka ngemendarka pemesai perintah meli sebuah laptop komputer ti berega RM40,000.00.
Menteri ba Opis Menteri Besai patut mega ngena formula ti sama ke dikena iya lebuh iya ngapuhka Syarikat Penerebai Bilun MAS ari bengkerap. Iya patut ngena chara ti sama baka ngetas semua belanja ti enda patut, ngurangka penyampau projek mega ti deka dipejalaika sereta ngurangka belanja ngemanahka opis perintah.
Nambahka nya, iya patut beratika penyampau duit bebillion ti udah dipelanja enggau jalai ti salah sereta berundingka chara ngambi duit nya pulai. Budaya ngerumpak duit enggau belanja perintah ti rua baka nya patut diketuka munyi ku jaku dalam, enti deka alah enda, enti enggai bisi tau mih nadai.
Nya alai, enti kitai beratika ba menua ti berimbai enggau menua kitai dia kitai meratika menua nya nadai ngeletakka chukai penatai pemisi ba rayat sida tang nadai mih kitai ninga menua sida deka labuh bengkerap. Menua Malaysia iya ke bendar nadai jauh tinggal ari sukut pengeraja asal enti dibandingka enggau menua bukai tang semina pekara ti suah nanggulka iya nya mih duit ti suah amat dipelanja enggau chara ti enda menuku lalu ngujungka pengerugi besai.
Tiada ulasan:
Catat Ulasan