Friday the 13th nya nyadi ba hari ketiga belas dalam sebulan lalu mega kena hari lima. Hari tu suah dikumbai hari ke sial tauka nadai nasit. Dalam kelinda Gregorian, hari tu bisi nyadi sekali dalam setaun tang kadang-kadang bisi maya iya tiga kali dalam setaun. Iya suah nyadi enti hari dalam bulan nya berengkah enggau hari minggu.
Takut ketegal Friday the 13th dikumbai friggatriskaidekaphobia. Leka jaku frigga reti iya "Friday" lalu triskaidekaphobia jaku Greek ke mai reti tiga belas enggau phobia nya madahka reti takut. Leka jaku tu keterubah iya nyadi dalam taun 1911 lalu mungkal dikena dalam taun 1953.
Nitihka penulis cherita folklore sebedau abad ke 19 nadai temu bukti ti nulis senentang "Friday the 13th" ke dikumbai sial nya. Dokumen keterubah ke nyadika penyanding penemu dalam English nya biografi ti ditulis Gioachino Rossini dalam taun 1869.
Taja pia bisi mega sekeda cherita folklore madahka pekara tu dikenatai ari aki ini reti nya dicheritaka nitih peturun. Pengawa ti nentuka asal pengarap tu ukai tentu ngena chara sains tang suah agi nengah chara sangka aja. Besenutuk enggau nya sekeda teori udah dikenataika dikena nerangka asal penatai Friday the 13th ke dikumbai sial.
Siti teori madahka iya nya dua pengarap lama ke dichampur chara moden: 13 dikira lumur ke enda benasit tauka lumur sial lalu hari Lima dikira hari ke enda manah nasit tauka hari sial.
Ba penemu numerology, lumur dua belas dikira lumur genap tauka chukup enti diperatika ari penyadi dua belas bulan dalam setaun, dua belas kelai zodiac, dua belas lumur jam dalam jam, dua belas bansa Israel, dua belas iku rasul Jesus, dua belas iku petara Olympus.etb. Tiga belas dikira nyelai laban enda chukup baka lumur dua belas. Bisi mega orang pechaya pekara tu datai hari pengawa ba Last Supper ke alai tiga belas iku orang duduk nunga pangan diri ba mija ke ngujungka siku ari sida nya kena bunuh.
Nitihka cherita Canterbury, hari Lima endang dikira hari sial kenyau ari abad ke 14 lalu mayuh orang ke gawa mega ngira hari Lima nya hari ti nadai nasit. Nya alai enti deka bejalai tauka ngepun sesebengkah projek anang maya hari Lima. Black Friday nya hari maya market stock labuh enggau chukup udu lalu pia mega maya hari tu suah amat penusah besai nyadi kenyau ari taun 1800. Kala mega diberi tuduh penemu ke madahka hari Lima tu sial tauka hari ke nadai nasit laban nitihka bup Kristian, Jesus mati ba kayu regang kena hari Lima.
Siti agi teori dikenataika pengarang ke benama Charles Panati. Iya tu endang orang ke nemu pasal penumbuh tauka penatai sesebengkah utai. Nitihka penemu iya, pengarap senentang pekara tu datai ari cherita mitos ke lama kelia iya nya nitihka cherita mitos Norse. Nitihka cherita tu, Friday diberi nama Frigga, petara pengerindu enggau penggalak. Lebuh bansa Norse enggau Germanic masuk Kristian, Frigga ngelarika diri ngagai bukit tinggi ketegal malu. Iya lalu dikumbai sida nyadi manang. Nitihka pengarap sida maya nya, ninting hari Lima, petara tu baum enggau sebelas iku manang bukai lalu ditambah enggau antu jai ke nyungkupka tubuh sida nyadi tiga belas. Nyadi aum sida tu senentang pengawa jai ke deka digaga sida minggu ti deka datai. Nya alai beratus-ratus taun ti udah, orang ba Scandinavia ngumbai Friday nya manang Sabbath.
Siti agi teori nya nyebut ba siku legenda ke benama Knights Templar. Tu siti gerempung soldadu ba Jerusalem dalam taun 1118. Tuju gerempung tu dikena nyaga pengelikun orang Kristian ke besembiang kia maya Perang Regang. Dua ratus taun udah nya gerempung tu nyau majak nyadi kering sereta kaya. Pengering enggau pengaya gerempung tu balat ngenakutka Raja Philip ti ngujungka iya ngena jalai resia merintah orang nangkap semua bala sida Knight Templar ba France kena 13 hari Lima bulan Oktober 1307 ke nyadi Friday the 13th. Cherita senentang hal tu enggau Knights Templar tebilang ba taun 2003 dalam novel The Da Vinci Code. Taja pia mayuh orang ke landik madahka pekara tu utai ti ditengkebang jeman moden tu. Bisi ke madah iya tebilang ketegal novel Friday, the Thirteenth ke ditulis Thomas W. Lawson. Mayuh agi teori bukai ke nyerita pekara ke jai nyadi maya Friday the 13th tu.
Friday the 13 tu mai empas ke negatif ngagai pengidup mensia ke arapka pekara tu. Nitihka Stress Management Center and Phobia Institute di Asheville, North Carolina, madahka bisi dianggar penyampau 17 ngagai 21 juta orang ba Amerika takutka hari lima 13 haribulan nya. Sekeda sida udu takut dataika enda berani nurun gawa tauka ngaga kereja, ngena bilun tauka angkat dani tinduk. Perintah nganggarka dagang ke rugi ketegal pekara tu nya dataika $800 tauka $900 juta mata duit Amerika.
Taja pia aksiden tauka bebadi ba jalai raya kurang nyadi maya Friday the 13th nitihka ripot ari Dutch Centre for Insurance Statistics (CVS) June 12, 2008. Pekara tu baka tu engka mensia mayuh balat agi bejimat mai kerita maya hari Lima tu. Kelimpah ari nya mega engka mayuh agi bala diau sehari nya. Taja pia nitihka pansik British Medical Journal dalam taun 1993 lebuh ke manding penusah bebadi ba jalai raya entara hari Lima 6 haribulan enggau hari Lima 13 haribulan nyemetak bendar madahka mayuh agi penusah ba jalai raya nyadi maya hari Lima 13 haribulan.
Pekara baka tu engka jarang nyadi ba menua Malaysia ketegal iya ukai budaya tauka pekara ti dipechayaka kitai ari turun aki ini kitai kelia. Nya alai hari Lima 13 haribulan patut dikira sebaka hari enggau hari bukai dalam bulan nya. Utai ke nyadi ukai ketegal hari nya sial tang endang udah atur dunya tauka petara baka belayan padi lebat bebuah, tiap-tiap pekara ke nyadi tentu bisi kebuah.
Tiada ulasan:
Catat Ulasan