Berita pasal gaji minimum tu endang lama amat udah dikerandauka ba media massa. Polisi sereta undang-undang senentang hak pekereja baikka iya pekereja Malaysia tauka orang luar endang agi kalik-kalik. Bagi orang luar pengawa ke ngayahka bala pekereja balat amat nyadi taja pan menua kitai balat temegahka diri ke ngembuan nilai Asia sereta beberita manah enggau orang.
Kitai suah amat betalat enggau orang madahka enti kitai ngajika pekereja dalam mata duit ringgit lalu enti dikalihka ngagai mata duit Kampuchea, Indonesia enggau Filipina dia gaji nya balat besai. Jarang amat kitai berunding senentang mayuh orang Malaysia ke gawa ba menua tasik baka Australia, Amerika enggau British ketegal gaji din ke besai agi ari menua tu. Nama kebuah kitai enda ngasuh sida ke ngaji orang Malaysia tu ngurangka gaji sida dih laban mata duit dollar enggau pound besai agi lebuh dikalihka ngagai ringgit.
Empai lama ti udah Malaysia udah enda besetuju enggau tuduh penemu ari Indonesia ke minta gaji minimun RM800 ngagai sida ke gawa nyadi amah. Nitihka dalih Menteri Pengeraja Asal Mensia, Malaysia enda ngatur gaji minimum ngagai bala ke digajika sida gawa. Nitihka dalih Menteri tu, gaji ba Malaysia dibayar belalauka peminta. Gaji minimun RM800 tu enti dikira minggu kira-kira RM200 seminggu. Kelimpah ari nya mega sida ke gawa tu nadai diberi hari diau.
Tang ba hal ke sama enggau Filipina, Malaysia endang bisi sempekat ke meri sehari dalam seminggu alai pekereja ke nyadi amah nya diau. Iya ke manah agi hak ke sama patut mega diberi ukai semina ngagai orang ke gawa nyadi amah tang ngagai orang bukai ke gawa ba menua kitai.
Dalih ke enda nyagi sida amah tu diberi diau sehari laban sida agi biak lalu irauka sida betaban lari enggau tawing sida lalu nangika sida ngandung. Enti nya nyadika dalih orang Indu Malaysia ke agi biak patut besekula di rumah nganti umur sida chukup alai belaki tauka alai pengaji sida ke gawa ngemataka sida dalam timpuh 24 jam.
Mayuh bala indu tu nguna hari diau alai sida ngagai gerija tauka betemu enggau bala pangan dikena sida bekunsi pengelengau, penusah enggau besilih penemu senentang pengawa. Indu ke sama rebak begunaka pangan diri dikena, berandauka pengasai ati ati. Baka nya mih ke nyadi enggau bala nembiak tauka pekereja Malaysia ke gawa ba menua luar. Gerempung Malaysia ditubuhka ngambika bisi alai sida ke sama latar pengawa tauka pelajar ngambika sida ulih berandauka penusah sereta penanggul sida.
Nya alai isu gaji minimum ba Malaysia tu patut diperundingka enggau nenak ngambika bala pekereja enda diayahka bala tauke tauka pengaji sida.
Tiada ulasan:
Catat Ulasan