Bulan Merdeka Bulan Pengelepas

-->

Ninting taun dalam bulan August, menua kitai ngintu Bulan Merdeka dikena kitai ngenangka maya menua kitai lepas ari pegai British. Ba sekula pekara tu bisi dipelajarka dalam pom tiga. Nembiak pom tiga diajarka baka bala pemesai enggau tuai raban bansa kelia ngeringka diri minta menua tu dilepaska ari pegai perintah British. Siti penyelai menua kitai enti dibandingka enggau menua Asia Tenggara ke bukai chara kitai ngelepaska diri ari perintah British nya bebida ari menua bukai laban kitai kelia nadai kala beperang sereta bebunuh ngelaban perintah asing ke megai menua kitai nya.

Kedua penyelai menua kitai enggau menua bukai lebuh ke bejaku pasal merdeka nya senentang haribulan kitai ngelepaska diri ari perintah British. Enti menua Asia ke bukai semina siti aja haribulan ke patut dikeingatka ke bekaul enggau merdeka. Hari merdeka di Malaysia dikira bepun ari menua Semenanjung Tanah Melayu ngelepaska diri ari pegai perintah British iya nya kena 31 August 1957. Enti nitihka nya kita udah 53 taun merdeka. Tang maya taun 1957 menua Malaysia endang bedau ada. Fakta tu sigi bisi dipelajarka nembiak sekula semina kekadang sida enda tentu ibuhka pemesai reti fakta ke baka tu. 

Malaysia ada dalam taun 1963 lebuh Tanah Melayu, Singapore, Sabah enggau Sarawak besetuju numbuhka Serakup Malaysia tauka dalam jaku Melayu dikumbai Persekutuan Malaysia. Haribulan ke nyadi dikena numbuhka Serakup Malaysia nya 16 September. Maya suba endang bisi diperambu haribulan dikena ngintu hari penumbuh Serakup Malaysia nya kena 31 August 1963 tang ketegal sekeda pekara ke nanggul ti alai hari bulan nya diinsur ngagai 16 September. 

Kebuah Serakup Malaysia ditumbuhka mega endang dipelajarka nembiak sekula. Tang munyi ke udah dikenang tadi nembiak kadang-kadang nadai tentu bisi ati deka belematika pekara tu. Nyadi lebuh ti ngenangka bulan enggau hari merdeka dia kitai suah diasuh sama-sama enggau pangan diri nunjukka pengangkun enggau penakluk diri ngagai menua Malaysia. Enti di sekula mayuh amat program ti belalauka aktiviti patriotisme dilanggur sereta diatur dikena ngingat sereta ngeramika Bulan Merdeka tu.

Ba luar kandang sekula baka ba genturung pendiau tauka pasar, perintah endang meransang mensia mayuh sedada saum seati mandangka diri angkunka menua Malaysia. Rayat dipinta niri negika menira Malaysia baikka iya ba perabung kerita tauka ba rumah. Kelimpah ari nya mayuh mega program diperambuka kaban komiti ba sitak menua dikena ngintuka Bulan Merdeka tu.

Taja pia kadang-kadang orang suah amat nyukatka pengangkun kitai ngagai menua ari menira ti ditegika kitai. Jarang amat orang meda chara bukai dikena nunjukka kitai nya angkunka menua diri. Iya ke bendar nuatka menira baik iya ba kerita tauka ba rumah semina siti chara aja dikena nunjuk kitai angkunka menua diri.

Mayuh amat chara dikena kitai nunjukka kitai nya angkunka menua diri. Siti nya besaup enggau perintah nyaga pemeresi rampa menua. Rampa menua ke beresi tentu mai penguntung ngagai semua rayat Malaysia. Kitai enda patut bebuaika uras sebarang endur. Kitai patut nyaga sungai, tebing tasik, palan ngelantangka ati enggau taman negara ari kamah.

Kedua, kitai ke nyadi rayat Malaysia patut nitihka adat enggau undang-undang lebuh ba jalai raya baik iya lebuh kitai ngena kerita, motosikal tauka bejalai kaki. Suah amat penusah bebadi ba jalai raya nyadi ketegal mensia mayuh ngelanggar atur jalan raya. Neriba kerita enda nitihka atur pengelaju ba jalai tauka ngelanggarka lampu isyarat nya sekeda chunto orang ke enda angkunka menua ketegal ngelanggar undang-undang jalai raya.

Ketiga, diatu mayuh amat mensia mayuh baik iya ke gawa ba perintah tauka ba syarikat tauka kediri empu suah tepejuh enggau pengawa makai suap. Ketegal pengawa ti salah baka tu duit rayat ke digumpul ari chukai suah amat dipelanjaka enggau chara ti salah. Orang ke gawa ba perintah diberi makai suap ngambika pengawa jampat dikereja tauka tender mudah diberi ngagai orang ke nyuap orang perintah. Semua pengawa ti baka tu ukai nunjukka orang nya angkunka menua diri. Orang ke gawa nyadi akim enti enda angkunka menua tentu bechiping ari chara iya ngaturka laya laban bisi orang niki nibung lalu bisi orang niki pinang. Bisi mega pemesai ke semina baka abang begerah dayang bepadah, bejaku aja tak semina nemu mansutka gerah aja ensepi diri ke bisi pangkat.

Keempat, enti sema kitai dipilih nyadi pengari rayat baikka iya ba sitak kitai empu tauka dipaduka nyadi tuai sesebengkah gerempung tauka nyadi menteri, kitai patut nunjukka pengangkun diri ngereja pengawa nya enggau lurus. Mayuh pengari nama udah dipilih lalu enda ingatka tanggung pengawa diri baka kachang ke enda ingatka umbang. Sida beambi ulih nengah kuasa ke bisi ba sida ngulihka reta tengkira enggau pengaya ngena chara ti enda betul. Suah amat sida ngelanggar adat baka beberika tender kontrak ngagai kaban belayan diri empu, tauka ngena nama orang ke dikelala sida. Sida tu lebuh udah pinchin gawa nyadi pengari rayat balat amat kaya enti dibanding ari elaun ke diterima sida nyadi pengari. Taja pan ukai semua pengari rayat ke baka tu tang iya ke bisi nya nyampau amat nunjukka sida nya enda angkunka menua.

Semua pekara ke udah dirintai nya tadi sekeda ari chunto ke tau nulung meresa ati kitai rayat Malaysia nanya enti kitai nya rayat ke angkunka menua diri empu. Laban pengangkun diri ukai semina dibantai ngena chara nuatka menira Malaysia aja tauka enggau orang ngulu pengerami hari merdeka. Enti kitai deka nyadi rayat Malaysia ti beguna sigi alah enda tang enti enggai bisi pan tau mih nyadi nadai.