Raban Bansa Cantonese ba Negeri China Mandang Diri Ringat

Kitai suah amat ninga perintah tauka gerempung ukai perintah bekimpin ngasuh mensia mayuh nyaga sereta ngetan pemanah rampa menua enggau jelu ari dirusak mensia. Tang kitai jarang amat ninga perintah tauka gerempung ukai perintah minta mensia mayuh ngetan jaku minoriti tauka jaku bansa etnik ari pupus.

Siti berita ti apin lama udah pansut ba surat kabar The Sun madahka sebansa raban dialek china iya nya ari dialek Cantonese udah begelumu ba jalai mandangka diri ringat. Nitihka berita ti beratus-ratus orang begelumu nunjukka asai ati diri ba selatan bandar raya Guangzhou kena 23 hari bulan July 2010 tu tadi laban minta perintah enda nagang sida ari ngena jaku Cantonese.

Pengawa ke mandangka diri ringat tu bepun ari perambu perintah China ti deka ngubah semua program ba stesyen televisyen Guangzhou ngena jaku rasmi iya nya jaku Mandarin. Berita enggau perambu tu balat amat ngirauka ati bala china ari dialek Cantonese.

Nitihka berita ti ditampung The Sun ari surat kabar Hong Kong ke alai jaku Cantonese tu balat amat dikena perintah enggau pelajar bisi madahka penyampau sida ke mandangka pengasai ati nya 10,000 iku. Dipelabaka perintah sida endang nadai nyangka bala ke begelumu tu nyau sebuah atap. Bala sida tu lebuh ke mandang pengasai ati diberitaka maya nya belagu sereta mantaika speech dalam jaku Cantonese.

Surat kabar china ti tebilang, The Global Times ti di baruh pegai komunis madahka sida ke mandangka diri ringat nya begelumu enggau likun sereta nadai mai penyarut. Sida mambarka diri sepengudah beberapa jam ke begelumu.

Siku ari orang ke bisi enggau mantaika asai ati diri madahka iya endang siku orang ke nyukung budaya mayuh bansa tauka dikumbai multiculturalism lalu nyakal perambu perintah ti deka ngangkatka jaku Putonghua (Mandarin) nengah chara perintah.

Beijing endang lama udah ngangkatka jaku Mandarin dikena ngempungka beribu-ribu iti dialek enggau jaku minoriti ke bisi dikena bejaku ba menua China. Surat kabar china enggau laman internet bisi ngeripot pasal kompeni ti ngukum bala pekereja sida ke bejaku ngena jaku Cantonese lebuh maya sida bekereja.

Sebuah portal china iya nya Sina.Com mantaika berita madahka portal tu endang nyukung jaku Cantonese dikena bala china. “Enti kitai enda ngena jaku tu tentu bendar kitai ngemaluka peturun aki ini kitai empu.”

Taja pia, perintah Guangzhou endang nyakal penemu sida ke madahka perintah bisi ati deka nagang jaku Cantonese ari dikena bala china. Ba penemu sida ke endang penyukung jaku Cantonese tu tentu sida ngumbai penemu enggau runding perintah Guangzhou tu bisi undang di selepak kayu; bisi gerama di selepak gerugu.