Sekula Ukai Endur Mutarka Penanggul Rama

-->

Kemaya hari tu nembiak ba sekula balat bendar diasuh belajarka mayuh bengkah pekara dunya. Enti dibandingka enggau aki ini tauka apai indai sida suba mata pelajar ke dipelajar enda tentu mayuh semina pekara ti dikira berat ba perintah enggau opis pelajar maya nya suba. Tang kemaya hari tu, tiap tiap iku nembiak sekula baka ba sekula primari bisi belajar nyau pukul rata sepuluh iti subjek nyengkaum iya ke diperesa enggau iya ke enda.

Iya ke diperesa nya subjek ke diungkup dikena meri info tauka penerang enggau lalau pendiau sesingkang enggau pemansang sida. Mayuh amat subjek ti baka tu bedau tentu ulih narak nembiak nyadi rayat ti manah, angkunka menua sereta nadai ngenataika penanggul lebuh sida besai ila. Dikena narak sereta ngambuh nembiak nyadi rayat menua ti ngembuan pengelurus ati, dia perintah udah nyediaka subjek baka Pendidikan Agama Islam enggau Pendidikan Moral.

Dua iti subjek tu nyadika subjek ti diperesa ba tikas Sijil Pelajaran Malaysia (SPM). Ninting taun lebuh pemutus peresa SPM udah pansut dia mayuh amat nembiak bulih A ba kedua-dua subjek tu. Taja pan baka nya, iya bedau tentu nyamin nembiak nya tadi nyadi orang ti manah, lurus ati sereta enda ngereja pekara ti jai baka gian dadah, makai suap enggau penyalah bukai. Kebuah pia laban mayuh nembiak tu tadi semina ngapal pelajar ti diberi pengajar sida ngambika ulih pas peresa aja.

Mayuh ari nembiak tu tadi nadai tentu berunding ngena akal sereta ngamal pekara ti udah dipelajarka sida enti udah tembu besekula. Ba menua barat, subjek baka subjek pengarap tauka agama endang enda diajar ba sekula laban nya endang tanggung pengawa apai indai ba rumah. Tang ba menua kitai pekara tu dilempaika ba bau bala pengajar enggau sekula. Apai indai balat amat ngarapka sekula ulih mantu sida ngambuh anak sida nyadi rayat ke beguna sereta ngembuan ulah ti manah.

Taja pia ninting hari bisi aja pekara ke enda manah nyadi baka ambika chunto penusah bebadi ba jalai raya. Pekara tu balat amat ngenusahka perintah enggau orang ke kena rampit penusah tu baka sida sebilik. Nya alai ketegal nya dulu suba perintah bisi merambu deka nengkebang siti subjek ke dikumbai Pendidikan Keselamatan Jalan Raya lalu deka diajar ngagai nembiak sekula ngambika penusah bebadi ba jalai raya ulih dikurangka tauka dipunaska sekali. Tang pekara tu enda nyadi digaga nyadi siti subjek tang semina dipasukka ba dalam subjek Bahasa Melayu.

Siti agi subjek ti dikearapka ulih ngambuh sereta narak nembiak angkunka menua nya subjek ti dikumbai Pendidikan Sivik dan Kenegaraan. Dulu suba dalam taun 60an enggau 70an, mata pelajar Sivik tu endang dipelajarka bala nembiak sekula. Lebuh kurikulum pelajar diubah ngagai Kurikulum Bersepadu Sekolah Rendah (KBSR) enggau Kurikulum Bersepadu Sekolah Menengah (KBSM) dia subjek Sivik tu diketuka.

Subjek Sivik tu berengkah diajar baru dalam taun 2000 lebuh opis menteri pelajar meratika mayuh amat bala nembiak udah kurang bendar mandangka pengangkun diri sida ngagai menua. Pengawa bejaika reta tengkira rama tauka dikumbai vandalisma mayuh amat nyadi. Pengerusak tu nyadi penanggul laban perintah udah ngeluarka belanja ti besai dikena sida ngaga sereta nyediaka reta tengkira rama ti ulih dikena semua rayat. Taja pia pemujur subjek tu ngambuh nembiak nyadi rayat ti betanggung pengawa sereta angkunka menua bedau tentu ulih diperatika enggau nyenggala.

Kelimpah ari subjek ke udah disebut tadi bisi agi siti subjek deka diajar ba sekula jemah ila. Subjek tu deka diajar ketegal pekara baka bebuaika anak sereta pengawa beleman sebedau jadi belaki bini majak nyadi ba nembiak rebak baru kemaya hari tu. Kelimpah ari nya mega kes nembiak kena bajau orang ke tuai enggau orang ke dikelalaka sida mega majak nyadi.

Enggau isu ti baka tu, dia perintah begulai enggau Gerempung Ukai Perintah (NGO) nguji deka nengkebang siti subjek ngambika diajar ngagai nembiak sekula. Subjek tu ila deka dikumbai Pendidikan Kesihatan Reproduktif dan Sosial (PKRS). Sekali agi mensia mayuh begulai enggau perintah ngelempaika penanggul rama tauka penanggul sosial tu ngagai sekula enggau bala pengajar.

Pengawa bala pengajar kemaya hari tu endang udah chukup mayuh tang lebuh ke diasuh ngajar subjek baru baka tu sida baka ikan enti ke ulu tama bubu enti ke ili tama ensenga, sereba salah laban enggai enda nurut mih jaku perintah. Sekula iya ke bendar ukai palan mutarka penanggul rama. Apai indai patut ngembuan tanggung pengawa nentuka anak sida menyana ulah enggau pendiau. Pekara nentuka ulah ti manah bepun ari rumah. Penusah ti baka tu patut diputarka baka sempama narit lambar buk dalam tepung, lambar buk pan enda putus, lalu tepung pan enda temera.