BEDAU lama ti udah, perintah bisi naburka berita madahka deka mantaika siti tuduh penemu ti drastik dalam sistem pelajar ba Malaysia iya nya deka ningkilka tauka ngetuka peresa Ujian Pencapaian Sekolah Rendah (UPSR) enggau Penilaian Menengah Rendah (PMR). Taja pan agi bisi bala mensia mayuh ke bekelikuh enggau tuduh penemu tu ari sukut pro enggau kontra tang perintah tentu bisi chara iya empu dikena neruska sereta bejadika penemu tu.
Besenutuk enggau bala ke endang bisi pengerindu enggau pengawa belajar endang nyata amai beslubang penemu ngumbai tukuh sereta gaya sistem pelajar kitai balat amat ngemeratka peresa. Nya alai lebuh perintah mantaika tuduh penemu deka ngetuka peresa UPSR enggau PMR dia mayuh bala ngumbai nya jalai ke konkrit dikena mutarka penanggul ti balat ngemeratka peresa.
Taja pia isu ngetuka peresa UPSR enggau PMR semina sebagi ari mayuh macham isu ke ditapi dalam sistem pelajar di Malaysia. Entara isu ke bedau tembu diputarka nya isu beg berat ke diserebanaka bala anak-anak kitai dima tauka disandik sida ke sekolah.
Udah mayuh tuduh penemu dibantai sereta dipejalaika taja pan bisi nya agi setengah jalai tang endang udah chukup maya alai perintah ngiga chara ti drastik agi (sebaka enggau ngetuka UPSR enggau PMR) iya nya ngetuka sekula ari ngena bup teks ba sekula.
Bisi sekeda penemu apai indai ke madah bebaika bup teks ke sekula meri penanggul ke besai ngagai pemerat beg ti dibai bala nembiak. Laban nitihka perati bala apai indai tu, mayuh amat bup teks ti dibai ke sekula jarang diguna pengajar nyadika penyanding penemu lebuh ke ngajar.
Bala pengajar balat agi rindu ngena bup penyanding tauka buku rujukan ti dibeli ari kedai ketegal iya nyediaka penerang ti ngelansa, padat sereta meri fokus ngagai peresa. Besenutuk enggau nya mega, bup latih ti bisi dijual di kedai seruran agi diguna laban iya balat ngelimatka awak pengajar enggau bala nembiak ari ke dipejal nyalin latih ba papan tulis.
Kemaya hari tu kitai nguji meransang nembiak sekula ngiga sereta matau nama-nama aja penerang ke bisi ba dunya nyata enggau dunya siber (Internet). Nya alai pengawa ti begunaka bup teks udah dikira nadai tentu relevan agi. Pengajar udah diberi Turai enggau Kerembai Turai Pelajar sereta dilatih enggau chukup ngambika enda tekuing ari segi batang isi enggau skop pekara ti diajar.
Konsep matau penemu nengah chara 'open-source' engka tenggelam pia aja enti bala pengajar agi begunaka bup teks lebuh ngajar. Kelimpah ari nya mega, pemansang penemu kemaya hari tu balat amat laju baka peluru leka senapang ti ngujungka penemu enggau pekara ti bisi ayan dalam bup teks tau nyadi 'obselete' dalam timpuh dua tiga taun aja.
Nya alai enti perintah agi bisi ati deka nguna bup teks, Opis Menteri Pelajar patut enggau lengkas mantaika konsep "e-textbook" ke meransang bala pengajar enggau nembiak milih internet nyadika penyanding penemu sesebengkah mata pelajar.
Nama guna ngabiska duit bejuta ringgit ninting taun dikena nyedia sereta ngaturka bup teks taja pan iya jarang amai dikena ba sekula. Dipelabaka manah agi enti duit agih nya tadi disadung ngagai mayuh chabang pelajar bukai ba menua tu baka pemansang profesionalisme pengajar enggau program penempa ulah enggau sahsiah nembiak ke majak belinsur enda manah kemaya hari tu.
Tiada ulasan:
Catat Ulasan