Pengerami Gawai Kuih Bulan

Malam tu nya malam maya pupu raban bansa China ngintu pengerami Gawai Kuih Bulan. Gawai Kuih Bulan nya hari dikena ngintuka maya orang China mujur ngalahka bala penjajah Mongol ba pengujung Dinasti Yuan (1280 Sebedau Masihi - 1341 Masihi). 

Gawai Kuih Bulan diintu kena hari ke-15 bulan ke-8 ba kelinda China iya nya pengujung bulan August enggau pengujung bulan September.Iya selalu iya nyadi nyau deka semak maya ekuinoks musim luruh. Lebuh maya tu, bulan kembung sereta pegari terang ti ngasuhka iya nyadi maya ke chukup engkeman alai ngintu asil ketau maya musin panas. 

Gawai Kuih Bulan nya siti ari pengerami ke berat diintuka kelimpah ari Taun Baru China. Maya ti ngintu hari nya, bala begulu bebaika tanglung kelimpah ari kuih bulan nya empu. 

Kuih Bulan nya siti ari pemakai ti dinahka maya ke ngintu pengerami tu. Kuih bulan digaga ari pemakai ti manis ti bepuakka kachang mirah tauka champur igi kelatai tauka kuning telu masin. Nitihka jerita rayat orang China, Pengerami Gawai Kuih Bulan diintu dikena ngingatka rayat China ti udah ngelaban pemerintah Dinasti Yuan ke bebansa Mongol (1280-1368) lebuh abad ke 14. Perambu dikena nyerang bala Mongol enda ulih diatur laban sida maya nya suba enda tau dipeda begelumu begumpul bebala mayuh. Nya alai, ngenangka bansa Mongol enda makai Kuih Bulan dia Liu Bowen ari Wilayah Zhejiang, iya tu ke nyadi penyanding penemu Zhu Yuangzhang, tuai ke ngelaban perintah Mongol bulih jalai dikena ngelaban perintah beserimbai enggau pengerami Gawai Kuih Bulan. Jaku pesan nesau orang ngelaban Dinasti Mongol udah disadung nengah surat ti disimpan dalam Kuih Bulan. Pengawa nya ngemujurka sida ngalahka pemerintah Mongol. Iya tu tadi lalu minta pemendar nyadung beribu-ribu iti kuih bulan ngagai bala ke diau ba genturung pendiau di pasar sambil ngarapka maharaja Mongol nya gayu panjai umur. Dalam tetiap iti kuih bulan nya bisi ditulis – “Tembuka bala Mongol kena lima belas hari bulan lapan”. Lebuh maya malam pengerami nya bala ke ngelaban nya tadi mujur ngalahka perintah Mongol sereta numbuhka perintah Ming tauka Dinasti Ming (1368-1644) di baruh pegai perintah Maharaja Zhu. Kenyau ari sehari nya enti pengerami tu diintu ba tikas menua kuih bulan deka dinahka ngagai bala pengabang enggau temuai. 

Nyadi jerita senentang asal bansa China ngintu pengerami Gawai Kuih Bulan tu endang mayuh bengkah tang karang tu semina ngenataika siti ari mayuh bengkah jerita nya dikena bekunsi enggau raban pemacha. Tuju iya ditu ngambika kitai ke diau begulai dalam Satu Malaysia ngembuan penemu senentang pengerami ti diintu pupu raban bansa bukai.