PENGELANDIK JAKU DALAM TURAI PELAJAR BAHASA IBAN SEKULA SEKONDARI Tusun Kesatu

1.0 JAKU PEMUKA

Pelajar Bahasa Iban sekula sekondari bepun ari pelajar ti dipejalaika ba sekula primari ngambika dikena nambah sereta nangkir pengelandik ngena jaku Iban ti betul. Nambahka nya pelajar Bahasa Iban mega belematika jalai jaku sereta pemanah iya dikena ba mayuh bengkah endur enggau maya.

Penerang tu ditulis ngambika ulih bekunsi penemu senentang teknik enggau strategi ti ulih dikena lebuh maya ngajar enggau belajarka Bahasa Iban di sekula sekondari. Dalam Turai Pelajar Bahasa Iban Sekula Sekondari, kelimpah ari jalai jaku, pengelandik jaku mega nyadika pun asil pengawa ngajar enggau belajarka Bahasa Iban.

1.2 PENGELANDIK JAKU

Pengelandik jaku mungkur empat bengkah pengelandik, iya nya pengelandik mending, bejaku, macha enggau nulis. Dalam Turai Pelajar Bahasa Iban Sekula Sekondari, pengelandik jaku nya siti ari pugu pelajar.

Ngena jalai jaku ti betul nembiak ulih ngena pengelandik sida bejaku lebuh sida nampil orang bukai dalam interaksyen sosial. Dalam sekula sekondari, nembiak nguasa pengelandik bejaku berindik ari pengelandik ti udah dikembuan sida ba sekula primari.

2.0 Pengelandik Mending

Nitihka Turai Pelajar Bahasa Iban Sekula Sekondari (2001), pengelandik mending nya dikena ngansah pemintar nembiak mending enggau silik. Kelimpah ari nya, sida mega mereti lalu landik nyerenih tauka milih sereta mida isi pekara ti beguna.

Widdowson(1978) dalam Bryne (1992) madahka orang ti mending nya patut nemu ngena jaku ti engkeman lebuh iya tauka sida bekomunikasyen enggau orang bukai. Jaku nya disukung Galvin(1985) dalam Bryne (1992). Nitihka Galvin orang mending ketegal ke mayuh kebuah. Orang mending lebuh maya sida berinteraksyen sosial enggau orang bukai lalu dikena sida betukarka penerang. Reti nya tiap-tip kali kitai tentu bisi kebuah ti menuku.

2.1 Maya Mending

Di sekula, nembiak ngena pengelandik mending sida lebuh ningaka licha ari pengajar tauka lebuh bisi begempuru tauka assembly. Maya tauka situasyen bukai orang ngena pengelandik mending nya lebuh ningaka jaku gerah ari radio, mendingka berita radio tauka televisyen sereta lebuh meda wayang. Kitai mega suah ngena pengelandik mending lebuh ninga lagu, berandau ngena telefon sereta lebuh ningaka jaku ba mua mayuh. Dalam Turai Pelajar Bahasa Iban, pengelandik mending sama bela enggau pengelandik bukai sereta patut bendar diajar ngambika nembiak nemu mendingka pekara enggau silik lebuh sida udah besai jemah ila. 

2.2 Penanggul Ngajar Pengelandik Mending

Taja pia mayuh mega penanggul lebuh pengajar deka ngajar pengelandik mending (Bryne,1992). Suah bendar orang ti mending nya nadai daya nagang penyampat orang ti bejaku. Kelimpah ari nya pekara ti didinga suah bendar enda ulih diulang. Bisi mega nembiak nya empu ke nadai chukup pengaya jaku. Sida tu enda tentu meretika pekara ti disebutka orang ti bejaku. Ketegal nya suah bendar sida salah peragam utai ti didinga sida laban sida enda nemu utai ti dikejakuka orang nya. Sekeda nembiak nadai ulih ngenatika pekara ti didinga lalu ngujungka sida mansutka pekara ti salah lebuh ti ditanya pasal pekara ti didinga sida nya. Tu mega bisi kaul enggau chara nembiak nya belajar. Suah bendar nembiak ke bansa tu nadai bisi pengarap ke diri empu ulih meretika pekara ti dipendingka iya.

2.3 Strategi Ngajar Pengelandik Mending

Nya alai pengajar patut neleba nembiak mending mayuh leman pekara. Tu nyengkaum utai ti bisi besangkut-paut enggau pengidup besehari-sehari tauka nitihka dalam Turai Pelajar nya Hakikat Dunia Sebenar(PPK). Kitai mega ngajar nembiak pengelandik mending ngambika sida nemu chara mending ti betul lalu bisi pengarap tauka confidence lebuh diasuh mendingka sesebengkah pekara.

Lebuh ngajar pengelandik mending, bisi beberapa bengkah elemen ti bekaul enggau pengelandik nya. Tu nyengkaum pekara baka:

1. orang ti bejaku

2. ngagai sapa iya bejaku

3. dini endur iya bejaku

4. rentak sebut

5. pengelebat jaku ti dikena

6. penginggar iya bejaku

7. peragam utai ti deka nyadi

Ambika banding, orang ti bejaku nya doktor lalu orang ti ninga nya pesakit tentu bendar pekara ti didinga dalam situasyen nya lain ari ba sekula lebuh kepala pengajar dalam aktiviti begempuru ngelalau nembiak iya ngasuh sida belajar bebendar. Nya alai konteks maya pengawa mending nya dipejalaika patut betukar ari siti situasyen ngagai situasyen ke bukai dikena neleba nembiak mendingka mayuh leman pekara ti nyadi ba mayuh bengkah endur. Enggau peneleba ti bansa tu sida ulih nyangka utai ti deka nyadi sereta nemu mida fakta tauka pekara ti amat enggau penemu diri.

Nama pekara ti patut diperundingka lebuh kitai deka ngajar pengelandik mending ngagai nembiak kitai? Mayuh pengajar betanya enggau pangan diri sekalika pengelandik tu ulih digabung tauka dipegulaika enggau pengelandik bukai. Nama konteks situasiyen ti patut diajar ngagai nembiak? Ni pengelama kitai ngajar pengelandik mending dalam seminggu? Katika pengawa tu diuji tauka enda? Tu sekeda pekara ti suah ditanya bala pengajar. Saut ngagai tanya tu ulih diperundingka kitai mayuh lebuh bisi aum pengajar Bahasa Iban. Ambika banding, naka ke diatu nadai bisi malin ti madahka pengelama kitai patut ngajar pengelandik mending. Taja pia, pengelandik tu suah bendar diumba enggau pengelandik bejaku. Enti pengawa mending diatur nyadika peresa pengajar patut berundingka penyuah iya diuji ngagai nembiak. 

Pengajar mega patut meratika kereban ti dikena lebuh ngajar pengelandik tu. Kelimpah ari bup teks, pengajar endang diperansang ngerikodka teks mending sida sebedau diajar ngagai nembiak. Peratika mega penggemar teks ti dikena sereta aktiviti ti deka dipejalaika enggau chara pengawa nya diatur. Ambika banding, enti sema teks nya dibacha, orang tauka pengajar ti macha teks nya patut diberi peluang belatih dulu intonasyen enggau chara nyebut leka jaku dalam teks nya.

Lebuh ngajar, pengajar patut mantu nembiak enggau naka ulih. Sida mega diperansang mantu pangan diri lebuh mendingka sebengkah-sebengkah pekara. Reti nya pengawa mending tau diatur ngena chara bepasang tauka beraban. Tu ulih ngerinduka ati nembiak belajar. Sebedau nembiak mending sesebengkah pekara sida tau diasuh merati sereta berandauka gambar, meda tauka ngaga lis barang, nyaut sekeda tanya, tauka berandau ke pekara ti deka didinga sida. Udahnya baru ngasuh sida mendingka teks.

Lebuh mending, nembiak ukai semina mending ngapa tauka duduk dunga-dunga nadai pengawa. Enti sida nadai diberi pengawa, mayuh nembiak ngumbai pengawa nya masauka jam aja. Sida berengkah berandau enggau pangan diri, tinduk tauka ngagai pengawa bukai. Nya alai dirintaika sekeda pengawa ti ulih digaga nembiak lebuh sida mendingka teks. Tu nyengkaum nandaka gambar, nipakka gambar enggau pekara ti didinga, nusun gambar, nembuka charta, ngiga penerang ti betul tauka salah, ngisi tempat puang, aktiviti sebut tulis enggau ngiga batang pekara ari teks ti didinga.

Udah nembiak ngabiska aktiviti nya, pengajar begulai enggau bala nembiak berandauka saut ngagai tanya dalam pengawa nya tadi. Pengawa tambah ti ulih digaga udah nya nyengkaum:

1. nembuka charta tauka kar

2. nambahka lis barang

3. nusun batang pekara, gambar etb.

4. nulis karang kedut

5. bekelulu

6. nulis simpul penemu

Betampung ...