PENGELANDIK JAKU DALAM TURAI PELAJAR BAHASA IBAN SEKULA SEKONDARI Tusun Kedua

1.0 JAKU PEMUKA

Pelajar Bahasa Iban sekula sekondari bepun ari pelajar ti dipejalaika ba sekula primari ngambika dikena nambah sereta nangkir pengelandik ngena jaku Iban ti betul. Nambahka nya pelajar Bahasa Iban mega belematika jalai jaku sereta pemanah iya dikena ba mayuh bengkah endur enggau maya.

1.2 PENGELANDIK JAKU

Pengelandik jaku mungkur empat bengkah pengelandik, iya nya pengelandik mending, bejaku, macha enggau nulis. Dalam Turai Pelajar Bahasa Iban Sekula Sekondari, pengelandik jaku nya siti ari pugu pelajar.

Ngena jalai jaku ti betul nembiak ulih ngena pengelandik sida bejaku lebuh sida nampil orang bukai dalam interaksyen sosial. Dalam sekula sekondari, nembiak nguasa pengelandik bejaku berindik ari pengelandik ti udah dikembuan sida ba sekula primari.

3.0 Pengelandik Bejaku

Dalam pengelandik bejaku, nembiak diasuh bejaku awakka sida ulih mansutka runding diri ngena pengengkah jaku ti patut enggau betul. Reti nya pengelandik tu ngenajamka pengelandik nembiak bekenaka jaku ti betul sereta standard lebuh berandau, becherita sereta lebuh mantaika pikir enggau asai ati diri.

Nambahka nya mega, nembiak ulih nanya ngena chara ti betul sereta terang lalu enda lebih-lebih. Pengelandik bejaku dikena nerenakka peneleba bejaku alus, nemu bebasa sereta beradat lebuh sida berandau enggau pangan diri, pengajar, apai indai, diri sebilik enggau orang bukai. Dalam Turai Pelajar Bahasa Iban, nembiak dikearapka nemu ngepunka randau, ngerembaika randau sambil ngemerankan kaul interpersonal enggau orang bukai.

3.1 Tuju Ngajar Pengelandik Bejaku

Nya alai nembiak patut nemu pekara ti deka disebut, chara iya disebut enggau bakani idea nya ulih dikerembaika ngagai orang bukai. Bryne enggau Yule (1983) madahka tuju orang bejaku nya dikena lebuh berinteraksi enggau pangan (interactional) sereta lebuh ngereja sesebengkah pengawa (transactional). Dalam Turai Pelajar, fokus pengelandik bejaku bisi bekaul enggau pengawa ke mantaika asai ati diri enggau buah pikir lebuh ti berinteraksyen enggau orang bukai, pia mega lebuh ngulihka barang enggau pengawa ari orang bukai. Aktiviti ti dikena nembiak bejaku nya baka berandau enggau pangan, besaraka penemu enggau lebuh berunding(negotiating) ke sesebengkah pekara.

3.2 Strategi Ngajar Pengelandik Bejaku

Bejaku bebida ari jaku ti ditulis laban lebuh bejaku, jalai jaku ti dikena nya enda tentu betul, suah agi ngena jaku aktif sereta ayat ti pandak. Tang tu ukai lisin dikena pengajar ngemendar nembiak bejaku ngena tusun jaku sereta leka jaku ti enda betul.

Nya alai lebuh ti bejaku, nembiak patut diajar bekomunikasyen ngena jaku ti engkeman nitihka konteks maya berandau baka maya bekelala enggau orang, lebuh mansutka asai ati lalu lebuh bekunsika peneleba. Kelimpah ari nya mega, sida patut diajar mantaika runding diri enggau berurun. Suah bendar kitai ninga jaku ti empegal tauka empelah, jaku ti bebalut laban orang ke bejaku kurang bepengelandik dalam nusun tauka ngerintaika jaku ti deka dibantai ngagai orang bukai.

Nangkanka nya mega, nembiak patut bendar diajar ngenataika peminta ngena chara ti patut lalu nemu nimbal peminta orang bukai ngena jaku ti engkeman sereta bisi ngayanka gaya perangai ti ngenyenangka ati orang ti enggau berandau. Dalam konteks aum, tauka bejuraika sesebengkah pekara, nembiak mesti bisi pengelandik bejaku baka nemu nerangka sesebengkah pengawa enggau terang. Bisi maya kitai ninga di radio sekeda peninga ti enda nemu madahka berita tauka nesau orang bukai ngena jaku ti betul. Tu ngayanka sida nya kurang pengelandik bejaku. Enti sida bisi diajar, tentu bendar sida enda ngaga penyilap ti ulih didinga orang mayuh.

Kelimpah ari konteks di sekula tauka di rumah, nembiak mega diajar berandau ngelanggur sebengkah-sebengkah pengawa lalu maya nya mega sida disadang ulih ngerembaika idea sida ngagai orang bukai. Chunto aktiviti baka aum kelab, seminar tauka forum ulih dikena ngelatihka nembiak ngenajamkan pengelandik bejaku sida ba mua mayuh. Ambika banding, lebuh baum, sida disadang ulih bejuraika ke pekara enggau orang bukai dikena sida ngulihka pemutus penemu. Penerang ti diberi endang patut disempulang enggau chunto dikena nyukung sesebengkah pekara.

Lebuh bejaku mega, nilai-nilai tauka ajar manah ulih diselitka kitai ngagai nembiak. Sida patut diajar bejaku ngena chara ti alus lebuh nyukung tauka mantah penemu orang bukai, ngena jaku panggil ti patut nitihka pangkat orang ke enggau sida berandau. Dalam kerembai Turai Pelajar, sekeda rambai jaku alus bisi dirintai nyadika malin bala pengajar.

Berunding nya siti agi pengawa ti ulih ngenajamka pengelandik nembiak bejaku. Ba pekara tu, berunding ukai mai reti bepikir dalam runding tang ngena penemu bejaku. Lebuh maya aktiviti tu dipejalaika, nembiak diadang ulih berunding dalam raban enggau chara tebuka sereta penuh pengarap ke diri empu. Sida dikarapka ulih mansut tuduh penemu sereta madahka runding diri. Aktiviti tu ulih diatur dalam situasi formal tauka enda formal. Ambika banding, nembiak ulih mantaika isi penemu sida ngena chara bekelikuh. Nya alai pengelandik madahka diri besetuju tauka nyakal penemu ngena tegal enggau sukung penemu ti betul patut dilatih ngagai nembiak ngambika lebuh sida mantai penemu diri, penemu ti dibantai nya enda nyima ati orang ti ninga.

Tingkat ti pengabis tinggi dalam pengelandik bejaku iya nya diperatika ari chara nembiak ngaga timbang penemu ngena gaya ti positif, rasional sereta nemu besambi-sambi. Sida mega dikarapka ulih ngaga pemutus runding ti ulih diterima kedua-dua piak. Aktiviti ti besaraka pekara ti nyadi kemaya hari tu manah bendar nyadika chunto dikena matih nembiak mantaika penemu sida.

Sekeda aktiviti ti ulih dikena ngenajamkan pengelandik bejaku nya baka:

1. Bejaku ba mua mayuh
2. Dialog
3. Randau ruai
4. Bekelulu
5. Becherita
6. Nerangka proses
7. Bekelikuh/ besara penemu

Penerang tu ditulis ngambika ulih bekunsi penemu senentang teknik enggau strategi ti ulih dikena lebuh maya ngajar enggau belajarka Bahasa Iban di sekula sekondari. Dalam Turai Pelajar Bahasa Iban Sekula Sekondari, kelimpah ari jalai jaku, pengelandik jaku mega nyadika pun asil pengawa ngajar enggau belajarka Bahasa Iban.