PENGELANDIK JAKU DALAM TURAI PELAJAR BAHASA IBAN SEKULA SEKONDARI Tusun Kepenudi

JAKU PEMUKA

Pelajar Bahasa Iban sekula sekondari bepun ari pelajar ti dipejalaika ba sekula primari ngambika dikena nambah sereta nangkir pengelandik ngena jaku Iban ti betul. Nambahka nya pelajar Bahasa Iban mega belematika jalai jaku sereta pemanah iya dikena ba mayuh bengkah endur enggau maya.

Penerang tu ditulis ngambika ulih bekunsi penemu senentang teknik enggau strategi ti ulih dikena lebuh maya ngajar enggau belajarka Bahasa Iban di sekula sekondari. Dalam Turai Pelajar Bahasa Iban Sekula Sekondari, kelimpah ari jalai jaku, pengelandik jaku mgea nyadika pun asil pengawa ngajar enggau belajarka Bahasa Iban.

PENGELANDIK JAKU

Pengelandik jaku mungkur empat bengkah pengelandik, iya nya pengelandik mending, bejaku, macha enggau nulis. Dalam Turai Pelajar Bahasa Iban Sekula Sekondari, pengelandik jaku nya siti ari pugu pelajar.

Ngena jalai jaku ti betul nembiak ulih ngena pengelandik sida bejaku lebuh sida nampil orang bukai dalam interaksyen sosial. Dalam sekula sekondari, nembiak nguasa pengelandik bejaku berindik ari pengelandik ti udah dikembuan sida ba sekula primari.

Pengelandik Nulis

Pengelandik bejaku nya pengelandik ti keterubah dipelajar siku-siku mensia tang pengelandik nulis nya pengelandik ti datai dudi lalu suah bendar dipelajar kitai be sekula. Dalam jaku Iban, penemu nulis ngena jaku Iban keterubah iya dikena maya Raja Brooke nya kira-kira dalam taun 1853 lebuh jaku Iban berengkah diajar di sekula. Berengkah ari nya jaku Iban seraris enggau jaku bukai di dunya nyadi sebansa jaku tulis.

Tuju Ngajar Pengelandik Nulis

Pengelandik nulis diajar ngagai nembiak ngambika dikena:

1. negapka pekara ti udah dipelajarka nembiak,
2. ngingatka chara nyepil enggau ngena tanda bacha ti betul,
3. ngalihka aktiviti mending, bejaku enggau macha ngagai aktiviti nulis,
4. meratika pemansang nembiak lalu
5. meri peluang ngagai nembiak mantaika pengelandik sida.

Ba Turai Pelajar Bahasa Iban Sekula Sekondari, nembiak disadang nemu mantaika runding sida ngena chara betulis (TP, 2001). Reti nya nembiak ulih nengkebang karya kreatif enggau ukai kreatif sambil ngena jaku ti gramatis sereta enggau tingkat jaku ke engkeman.

Strategi Ngajar Pengelandik Nulis

Mayuh bendar bansa pengawa nulis ti tau digaga nembiak. Lis ti dirintai ditu bepun ari ke mudah ngagai ti mar. Tu nyengkaum:

1. nyepil leka jaku tauka rambai jaku
2. nembuka ayat
3. nulis ayat
4. nusun ayat awakka nyadi siti paragraf ti menyana
5. nembuka siti paragraf
6. nusun paragraf ngambika nyadi siti karang ti menyana
7. nyalin karang
8. nembuka cherita
9. nulis karang
10. ngedutka karang

Nambahka nya, mayuh bendar chara pengajar tau ngajar pengelandik nulis ngagai nembiak. Chara lama tau mega dikumbai traditional or product approach ngemeratka asil ari matih sida nulis ngena chara ti patut. Chara ti kedua nya chara proses tauka proses approach. Chara tu matih nembiak nulis siti karang tauka siti topik enggau suah agi dataika sida nyau nemu bendar nulis karang pasal sesebengkah topik. Taja pia, chara tu lunggat amat dikereja. Chara ti ketiga nya, nulis mayuh bansa karang nitihka genre tauka genre approach.

Lebuh ngajar pengelandik nulis kelebih agi nulis karang, nembiak patut dilatih nulis mayuh bansa karang. Karang tau dibagi ngagai dua iya nya beformat enggau enda beformat. Karang beformat nya baka nulis surat, ngaga ripot, nulis licha tauka jaku ba mua mayuh enggau karang berita. Karang enda beformat nya baka nulis jerpan, karang belalauka gambar, karang sempama, karang ngenang siti pekara tauka artikel, karang deskriptif enggau ti bukai.

Sebedau ngajar, perambu pengajar nya nyerangkung

1. mikirka topik ti deka diberi ngagai nembiak

2. pengelama sida nulis karang nya

3. tuju karang nya ditulis

4. nama chara nulis (traditional, process tauka genre approach)

5. pemanjai karang

6. tikas pemandai nembiak

7. audiens tauka orang ti macha karang nya

Suah bendar pengajar semina meri topik karang lalu ngasuh nembiak sida nulis. Tu suah ngujungka nembiak enda nemu nama utai ti deka ditulis. Nya alai, sepengudah meri nembiak topik karang, pengajar diperansang berandau sereta bejurai enggau nembiak pasal pekara ti deka ditulis. Nembiak mega tau dibagi ngagai raban lalu bejuraika topik diberi. Lebuh ti berandau dalam raban, peransang sida ngemetulka pengawa pangan. Pekara ti patut diperatika pengajar enggau nembiak nya baka ti dirintai ba baruh tu.

1. format karang ti betul

2. sepil enggau tanda bacha ti betul

3. jalai jaku baka jaku penyambung, penanda jaku, tusun ayat etb.

4. kemas sereta ulih dibacha

5. jaku ti engkeman baka tingkat jaku, narit ati pemacha etb.

6. isi ti bebatang sereta dikerembai, disukung enggau chunto ti patut

7. siti paragraf ngundan siti batang pekara

8. pengaya jaku ti lebat sereta dalam

9. tusun karang: jaku pemuka ti naritka ati, tusun idea ti logik, simpul penemu ti engkeman sereta pemanjai ti chukup

10. tulin, enda niru ari orang tauka bup

Pengawa Tambah

Enda semua orang ulih nyadi penyanyi taja pan dilatih belagu enggau chukup, baka nya mega enggau nulis. Nadai semua orang ulih nyadi penulis lalu deka nyadi penulis ti tebilang. Taja pia tu ukai ke dalih pengajar lalu enda ngajar sereta meransang nembiak nyadi penulis. Kelimpah ari bansa karang ti suah diajar ba kelas, pengajar tau mega nambah iya enggau karang bansa bukai baka ti dirintai ditu.

Karang Penerang

1. Esei(expository writing)

2. Kenang Pengarang

3. Ripot

4. Surat

5. Review

6. Artikel Surat Kabar

7. Majalah

Karang Popular

1. Iklan

2. Poster

3. Flyer/Brosur

4. Leka Lagu

Pengawa bukai ti ulih dikereja nembiak baka tu:

1. Pengawa beraban baka nyambung cherita

2. Ngerandau orang bukai

3. Nulis pasal cherita lama: apai indai, kaban belayan

4. Ngaga pansik: menua, pasar

5. Majalah Kelas

6. Surat Kabar Kelas

7. Meda TV

8. Nulis lirik ngagai gambar Katun

9. Surat Komplen

Ngenajamka pengelandik nulis nya ukai pekara ti lempung laban iya begunaka jam enggau latih ti chukup sereta penggeka siku-siku nya nulis. Lebuh ti ngajar pengelandik nulis, pikirka mega rampa pelajar ti deka diajar ngagai bala nembiak lalu asil ti deka diperati ari pengawa nya.

Jaku Penutup

Pugu pelajar Bahasa Iban sigi bepun ari nembiak. Nya alai semua pengelandik jaku ti deka diajar ngagai nembiak endang iya patut befokus ngagai nembiak ngambika sida bisi pengarapka diri empu ulih ngena jaku Iban enggau menuku. Rapat ngajar ti befokuska nembiak mega setipak enggau pemansang pelajar kemaya hari tu ti ngemeratka belajar ngena chara masteri. Nembiak diberi mayuh peluang maju nitihka pengulih diri.

Kelimpah ari nya mega, pengajar endang diperansang ngena mayuh bengkah teknik ngajar sereta bekenaka mayuh bengkah kereban ti bisi disediaka di sekula. Nambahka nya, pekara bukai ti patut diperatika nya pengelandik bekenaka jaku ti engkeman nitihka konteks ti bebida-bida. Nya alai aktiviti ti bekenaka jaku ti menuku ulih dipejalaika dalam kelas enti pengajar ngajar belalauka tema.

Penyanding Penemu

Abdullah Hassan (1989), Pembelajaran Dan Pengajaran Bahasa Malaysia, Dewan Bahasa dan Pustaka.

Azwan Wan Chik (1986), Mengajar Bahasa Malaysia Jilid 1: Perkaedahan, Dewan Bahasa dan Pustaka.

Haji Hassan bin Muhammad Ali (1986), Masalah Mengajar Bacaan Intesif dan Ekstensif dalam Mengajar Bahasa Malaysia Jilid 1: Perkaedahan diedit oleh Awan Wan Chik, Dewan Bahasa dan Pustaka.

Byrne, Donn (1992), Teaching Oral English, Longman.

Compendium: A Handbook For ELT Teachers Vol. 1/89, Kementerian Pendidikan Malaysia.

Kamarudin Hj. Husin, Siti Hajar Hj. Abdul Aziz (1997), Penguasaan Kemahiran Menulis, Kumpulan Budiman Sdn. Bhd.

Marohaini Yusoff (1999), Strategi Pengajaran Bacaan dan Kefahaman, Dewan Bahasa dan Pustaka.