Ninting taun mayuh artis Dayak baru bisi didinga ngerikodka lagu lalu tu nunjukka pengerembai ke manah ba pengawa ngemansangka lagu-lagu Iban, Bidayuh enggau Orang Ulu.Besenutuk enggau nya mega kemaya hari tu mayuh bansa bukai baka Melayu tauka Cina rindu belagu sereta mendingka lagu-lagu Dayak.
Nitihka Chermin Gerempung Artis enggau Pemusik Dayak (DAMA) madahka taun 2008 aungerah DAMA bisi diatur laban meri basa, beterima kasih sereta meri kelala ngagai raban artis Dayak baikka sida nya orang lama tauka baru ba industri musik Dayak.
Penemu enggau runding tu datai ari siku pemesai ke berani megai tanggung pengawa ngerembang pejalai dunya pemerindang artis Dayak, iya nya Dato Sri Celestine Ujang. Diatu iya udah dituduh nyadi Penyanding Penemu ngagai gerempung DAMA.
Iya besai bendar pengarapka semua artis, pemusik sereta peminat musik Dayak deka terus nyukung gerempung sereta industri musik Dayak tu ngambika ulih nyingkang ngagai renggat ke tinggi agi. Iya mega minta artis Dayak masuk nyadi kaban gerempung DAMA ngambika ulih sama-sama niri sereta negapka industri musik Dayak.
Kelimpah ari nya mega Chermin gerempung tu mega madahka pengawa DAMA ngeringka industri musik Dayak baka tu patut diteruska jemah ila ngambika tau nyadika peransang ngagai komposer enggau penyanyi ngambika sida terus ngeluarka lagu ke bekualiti.
Taja pan kemaya hari tu bemacham-macham tiun lagu ke bisi didinga baka tiun pop, hip hop enggau Indi, lagu Dayak mega sama-sama ngaga nyingkang mansang baka lagu bansa bukai ba dunya pemerindang.
Mayuh lagu Dayak diatu muntang digiga baka ba laman web youtube.com kelimpah ari industri musik Dayak kebendar udah lama bisi ba dunya pemerindang iya nya kenyau ari urung taun 1950 kelia ke belabuh ngaga lagu tiun ‘keroncong’ enggau ‘asli’.
Entara raban artis lama Iban ke sigi tebilang kelia iya nya baka niang Michael Jemat, Wilfred Vincent Ragam, Esther Bayang, Pauline Linang, Richmond Alan Morshidi, Christopher Kerry enggau mayuh sekeda penyanyi lama kelia ke bukai.
Enti deka dibanding enggau kelia, diatu artis-artis Dayak rindu agi deka mai lagu ngena tiun dangdut, joget enggau balada. Bisi mega raban pemusik ke udah nguji mai ubah ngena tiun Hindi ba lagu Iban.
Enti diperatika sechara kasar industri musik Dayak agi jauh tinggal taja pan pemayuh artis baru ke ngerikodka lagu nyau baka kulat ke tumbuh udah ujan.
Lagu Dayak semina tebilang ba Sarawak aja taja pan nyauka 50 taun tu udah bisi ba menua. Pengawa ke deka majak ngemansangka lagu-lagu Dayak datai ba renggat nasional enda kala enda diangkatka taja pan kemaya hari tu lagu Dayak diberi peluang mantaika industri musik Dayak ditabur nengah Musik Aktif ba arus Astro 108 ti diputar setengah jam ulih RTM tiap hari Minggu.
Nitihka Chermin DAMA, gerempung tu benung berunding enggau TV3 ngambika ulih mantaika industri musik Dayak ba sekeda program sida iya.
DAMA tu ukai semina alai ngempung artis menua tu tang iya mega nyadi palan ke betul alai meri kelala sereta terima kasih ke sukung penyanyi enggau komposer lagu ke ngeringka musik Dayak ngelama tu. Industri musik Dayak sigi udah lama bepalan ba menua tu tang iya begunaka ubah ngambika iya terus diterima orang mayuh.
DAMA bisi udah merambu deka ngatur malam Anugerah Musik Dayak (AMD) bulan Oktober tu ila. Tu entara pemerat pengawa DAMA meri basa ngagai artis Dayak ke udah mujur ba dunya pemerindang. Baka mega anugerah ke kala diatur ba taun 2008 tu suba, sekali tu iya diatur lain mimit laban bisi ubah ke patut ngagai industri musik Dayak. Taun tu DAMA deka mantaika 10 kategori enggau 23 buah mangkuk anugerah. Malam anugerah tu besai reti sereta ‘beperestij’ alai mayuh artis ba Malaysia enggau Indonesia sama deka diambi ngabang datai ngeramika industri musik tu.
Bedau tentu lama tu tadi, chermin DAMA enggau bala komiti iya bisi nemuai ngagai Anugerah Industri Musik (AIM) ke-17 ke diatur ba Putra World Trade Centre (PWTC) Kuala Lumpur, lalu ari atur pengawa nya mayuh utai ke udah dipelajarka sida iya baka jalai deka ngatur siti-siti industri musik enggau chara ke manah.
Bala artis Dayak udah dikeingatka ngasuh nganjung pom calon sida iya sebedau timpuh tutup 31 Julai tu tadi. Semua pom nya deka ditapis sereta deka diaduka dalam bulan Ogos enggau September sebedau malam AMD ba bulan Oktober.
Taja pia bala artis patut masuk nyadi kaban DAMA dulu sebedau sida ulih bepekit maya AMD tu. Pom masuk nyadi kaban tau diambi ari opis DAMA ba Kuching, ba komiti sereta pengari kami ba Sibu, Bintulu enggau Miri tauka diambi terus ari laman web DAMA iya nya ba www.dama.my.
Penyanding penemu:
Berita Iban, Utusan Borneo
Tiada ulasan:
Catat Ulasan