KUALA LUMPUR dipilih nyadi tuai rumah keterubah ba Asia dalam Aum Penulis Blog Media Sosial kena 30/7/10.
Objektif aum tu dikena ngingatka raban komuniti blog ba Asia ngambika sida balat agi ngayan tanggung pengawa ke positif lebuh ngaturka laman blog diri empu.
Aum nya mujur ngelumu raban penulis blog enggau bala profesional ari menua bukai dikena sida bekungsi peneleba enggau runding senentang tuju sereta pekara ke ulih digaga blog dalam mayuh macham aspek.
Profesor Pemasaran ari California State University Amerika Syarikat (AS), Beng Soo Ong madahka pengguna enggau pengeluar mayuh macham produk patut merati sereta ngena blog enggau manah.
Pekara tu patut diperatika enggau silik laban 48 peratus ari pengguna di AS ngena mayuh macham dalih senentang sesebengkah produk tauka jenama ba Internet sebedau sida bebelika barang nya nitihka padah Profesor Beng.
Tuai Pemesai Eksekutif AirAsia, Datuk Tony Fernandes ke mega bisi enggau nyadi pengelicha madahka 80 peratus ari penatai pemisi ari ke bejualka tiket syarikat penerebai bilun nya dibeli nengah laman web.
"Bepun ari lapan taun suba syarikat AirAsia tu udah mai 20,000 penumpang lalu diatu AirAsia udah ngerikodka 27 juta penumpang. Aku berasai amat berutang budi ngagai Internet ketegal pemujur tu," pia ku iya nampungka licha iya.
Penulis blog ari Malaysia, Ahmad Nazuwan Amran, 27, ke ngembuan laman blog www.beautifulnara.com madahka penulis blog patut meretika pekara ti dikedekaka bala pemacha kelimpah ari ke ngembuan gaya nulis kediri empu.
"Pekara tu beguna enti deka nambahka penyampau pemacha. Aku rindu nulis isu-isu artis enggau pemerindang ngena tema Aram Begosip Sechara Bebasa.
"Nama sesebengkah blog mega patut naritka ati pemacha baka blog aku ke ngena nama beautiful nara. Pemacha seruran nyangka blog aku tu pasal siku indu ke bajik sereta seksi," ku iya.
Nitihka penulis laman blog gayahidup sosial dan parti, Joyce Wong, blog enda ulih ngelaban tanggung pengawa ke dikereja media lama tauka tradisional.
Ku iya, media lama ngembuan kelas kediri empu lalu balat agi diasaika bala pemacha.
Tang nitihka penemu Profesor Madya Michael Netzley ari Singapore, Internet nya siti medium ke beguna ngagai mensia mayuh dikena sida ngenataika protes tauka mandangka diri enda puas ati. Chunto ke diberi iya nya baka lebuh protes ba Internet senentang utai ke dikayamka Presiden Barack Obama maya iya agi mit suba ti ngujungka ayam nya dipindah ke bukai.
"Nitihka perati aku Internet di Malaysia dikena enggau manah enti dibanding enggau di Singapore. Mensia mayuh ba Malaysia balat agi ekspresif," ku iya.
Penulis blog Filipina, Oliver Bloggie Robillo bekungsi peneleba iya senentang pengawa bepilih ba Filipina bedau lama ke udah. Nitihka iya maya nya media chelak enggau elektronik bisi betanya ngagai penulis blog dikena sida ngulihka berita. Kelimpah ari nya iya mega madahka nulis ba laman blog ulih disempulangka enggau gambar-gambar. Chara tu balat agi efektif kelebih agi lebuh ngelakuka barang pemakai.
Nitihka penulis blog ari India, Amir Varma, madahka blog berengkah popular di India lebuh tragedi tsunami 2004. Maya nya suba laman blog munggah mayuh macham gambar enggau jampat.
"Faktor ruang ti besekat ba surat kabar kelimpah ari iya ke dikeluarka hari siti ngasuh laman blog popular agi ari surat kabar," ku Amir.
Pengarang berita The Star, Nikki Cheong ngarapka laman blog ulih ngerapitka kaul enggau media lama baka surat kabar ngambika nguntung raban pemacha.
"Pengarang berita enggau media sosial patut sama-sama nyingkang setipak enggau pemansang jemah ila ketegal kedua-dua bidang tu endang bisi kaul ti rapat enggau pangan diri. . Media sosial suah bekenangka isu ti diripotka media chelak," ku iya. Nya alai ku iya berita ke ngumbai media chelak deka kurang agi diguna jemah ila nya fakta ke enda tentu nemban.
Datin Paduka Marina Mahathir ke ngembuan blog ti dikumbai Rantings madahka orang ti nulis ba laman blog patut landik bekelikuh sereta ngenataika penemu diri.
"Blog ukai semina meri fokus ngagai isu politik aja," ku iya.
Lawyer Foong Cheng Leong ngingatka semua taja pan orang ulih nulis nama-nama aja ba blog, tang semua mesti nitihka atur. Iya bisi meri chunto senentang bala pekereja ke besalahgunaka blog. Sida tu ku iya ngenataika ba laman blog sida empu asai enda puas ati sida ngagai tuai sida iya.
Semua raban panel dalam aum nya selubang penemu madahka lebuh ti nulis blog mesti nitihka atur reti nya enda tau nulis utai sengapa kada.
Enti kitai enggai orang datai jari tauka nganu kitai ngena mulut baka nya mih enggau ba blog. Tentu nadai bisi orang rindu dianu sengapa nengah blog.
Nya alai raban komuniti blog sekayu dunya patut ngaga blog nyadika palan alai bejuraika pekara ti positif lalu ukai alai sida mantaika asai ati ke enda puas tauka pekara ti negatif.
Tiada ulasan:
Catat Ulasan