2010 taun keterubah perintah besai Malaysia ngeletakka 16 hari bulan September kemisi dikena ngingatka penumbuh Serakup Malaysia. Ari taun 1963 dataika 2010 Serakup Malaysia udah beumur 47 taun. Enti dibandingka enggau umur mensia Malaysia tu dikira nyau deka setengah abad. Enggau umur ke ngelama nya tentu Malaysia enti baka mensia udah lama ngetup garam sereta ngembuan mayuh peneleba.
Menua Malaysia ari sukut fizikal endang dipeda mansang taja pan agi mayuh pekara ke bedau tentu ngemuaska ati mayuh lapis ringkat rayat. Ba hari ke baka tu endang patut bendar kitai rayat Malaysia ke talukka bansa sereta angkunka menua ninjau sereta nimpai sekeda pekara ti tau nyadi teladan kitai semua.
Pekara ti keterubah deka dikenang ditu nya senentang kaul entara pupu raban bansa. Enti ba Sabah enggau Sarawak kaul entara pupu raban bansa endang nadai nyadi penanggul. Komuniti ti bisi diau ba Sabah enggau Sarawak endang udah lama ngemeran kaul ti manah entara sida sempama baka asam gulai garam. Kitai patut beterima kasih ketegal pekara tu agi mengkang dikemeranka rayat Sabah enggau Sarawak.
Tang kaul entara pupu raban bansa ba Semenanjung jauh bendar enda tentu manah. Bala kitai ke ada dalam taun 1960an tauka sebedau nya tentu ingat senentang 13 May 1969 iya nya laya entara pupu raban bansa. Tu nunjukka kaul entara pupu raban bansa ba Semenanjung enda tentu manah. Enti diperatika sida udah bisi ati ngujika deka manah enggau pangan diri tang enda tentu ulih baka ke udah diteladan dichuanka rayat Sabah enggau Sarawak. 47 taun udah penumbuh Serakup Malaysia pekara tu ba Semenanjung agi bedau nunjukka bisi berubah manah indah enda baka sempama jaku dalam; api sigi padam, papung unggat masih berasap. Kitai agi ninga sereta macha ba surat kabar senentang dua tiga iku bala tuai sida agi bejaku jai, chabul mulut sereta besebutka pekara ti tau nyima ati pangan diri ari pupu raban bansa.
Kitai tentu agi ingat sekeda pekara tu baka betunu sereta ngerusakka palan alai sembiang, bejaku ngumbai orang nya orang penatai orang kampar, komen dua iku kepala pengajar senentang bansa bukai, betalatka nama petara ke tau dikena maya sembiang, betalatka Polisi Ekonomi Menua (NEP), bekelikuh senentang bebagika asil pengeraja menua sereta mayuh pekara bukai.
Semua pekara ti bekaul enggau isu raban pupu bansa tau disemaka baka pisa nganti muntas. Pekara tu balat amat dipeda nyadi ba Semenanjung lalu balat amat ngirauka ati rayat Malaysia. Mayuh bala nguji meri jaku tangkan jaku lalau lalu mai semua beserakup nyadi bansa Malaysia tang mayuh sida tu semina baka kepayang ngadaka dilah, mulut nyebut tang pala patung enda nyaut. Pekara tu nyadi laban utai ke disebut ukai ari ati ti tuchi, lurus sereta deka meda pemujur penyerakup entara pupu raban bansa. Enti utai tu majak nyadi tentu enda manah ngagai pemansang menua Malaysia jemah ila. Tuai-tuai parti politik kelebih agi ba Semenanjung balat amat ngeringka bansa diri sereta bejaika bansa bukai. Sida ukai semina deka dipeda pegari ba mua mata bansa diri empu tang mega bejaku pasal hal pengarap enggau baka ke nadai bisi orang bukai berimbai pendiau.
Malaysia tu menua ke diuan mayuh pupu raban bansa, ngembuan mayuh bengkah pengarap sereta mayuh bengkah budaya. Ketegal nya tentu mayuh isu enggau pekara ti patut dikerandau enggau beradat sereta bebasa entara bansa. Kitai enda ulih nyeliah diri ari berandauka pekara tu tang kitai rayat Malaysia patut sama ingatka pemesai reti bebasaka pangan diri lebuh bejuraika pekara tu nitihka chara orang ke udah mansang sereta betemadun. Bejaika pangan diri enggau enda bebasa semina tau ngujungka laya besai laban iya baka bomb ti tau meletup sebarang maya.
Perintah ngembuan tanggung pengawa ke berat dikena nagang pengawa ti balat ngemeratka pengarap enggau bansa diri empu tauka dikumbai racial enggau religious extremism. Enti perintah terit enggau adat tentu nadai siku rayat berani bejaku senentang isu pengarap tauka bansa sengapa kada. Naka kediatu perintah udah bebendar nguji nyekat ulah sekeda mensia mayuh. Enti perintah enda terit tentu pekara ke enda manah tau nyadi. Kitai rayat ke rinduka pengelikun endang semampai enda rindu meda pekara ti baka tu nyadi ba menua kitai.
Nya alai, perintah patut meransang pupu raban bansa diau berangkup enggau pangan diri. Tu pekara berat tang patut dikerejaka enti menua deka saum seati sereta mansang dalam pengawa ekonomi enggau pengawa bukai. Nya alai nama-nama pengawa digaga, penyerakup sereta pemereti ati entara pupu raban bansa endang patut diperatika sereta dikemeranka enggau manah.
Rayat Malaysia mesti munaska dua pekara tu iya nya penyeranta enggau penanggul ekonomi ti enda setimbang. Pekara tu endang dipeda sensitif tang uji kitai nanya diri; Manah tauka enda enti menua kitai agi bisi rayat Malaysia ke ditangkup penyeranta baikka ba bidang ekonomi tauka sosial? Kitai semua nemu pemesai reti munaska penyeranta. Kitai enggai rayat Malaysia umang merisa nadai ngembuan penatai pemisi ti patut, rumah alai diau, peluang belajar, kereban pengangkut, gari sereta pemakai ti chukup.
Kitai patut berasai sinu ati enti kitai tepedaka kaban kitai rayat Malaysia ke bukai agi tinggal pemansang ari sukut ekonomi tauka sosial baikka sida ke diau ba pesisir, rumah panjai tauka di nengeri. Penyeranta ngemediska mata ke meda sereta ngenusahka ati. Nya mih kebuah kitai patut nyukung polisi perintah ti deka munaska penyeranta enda ngira pupu raban bansa enggau menua. Nya alai kitai enda patut bekelikuhka jalai kitai mutarka penanggul nya tak kerejaka aja. Kitai patut sama besaup ngayau ngelaban pemerinsa.
Siti agi isu nya senentang chara kitai tau ngurangka seraka ekonomi entara semua bansa. Utai ke patut dikedekaka kitai nya semua bansa Malaysia ukai sebansa dua sama bela ngasaika pengeraja menua. Kitai semua tentu ngembuan juluk ati ngarapka semua bansa bisi tikas pengidup ke jelan pendiau, ngembuan penatai pemisi ke jelan penyampau sereta standard pengidup ke lantang. Kitai tentu enggai meda sekeda bansa ba Malaysia nya mansang sekeda nya enda. Tu tentu enda manah ngagai menua kitai ke diatu enggau ke jemah ila.
Perintah patut besemaya enggau pengabis ati ngangkatka semua bansa enda neju sereta ninggalka sekeda ari ngasaika pengelantang menua. Tu ku jaku English a simple common sense. Adat patut rentang sereta setimbang enda bechiping lebuh ngagihka pemansang. Penyarut tau nyadi enti agi bisi bansa agi meruan tinggal ari sukut pemansang; maya nya mih orang deka nyalahka sistem lalu nyangka tau ngaga pengawa ti tau ngenusahka menua tauka diri sida empu. Mayuh amat chunto pekara tu ti udah nyadi sejarah. Kitai patut bendar belajar ari sejarah ti baka tu.
Perintah dipegai mensia lalu mensia mega ngembuan pengelemah. Kitai sama patut ngaku hal tu. Pengelemah enggau penyalah ulih dikemetulka tang penanggul senentang penyeranta enggau agih pemansang sigi patut amat dikereja. Semua tuai pemegai menua ke manah tentu enggai meda rayat iya merinsa. Semua utai ke bekaul enggau Malaysia baka pemansang ekonomi, industri, menua pesisir enggau pelajar nya pekara teknikal ti ulih diputarka tang mutarka pengawa ti bekaul enggau bansa nya pekara ti chukup berat sereta mar dikereja.
Tu mih sekeda pekara ke diasaika patut dikunsika enggau semua rayat Malaysia ke talukka bansa Malaysia sereta angkunka menua Malaysia. Aku ngembuan besai pengarap ke kaul entara semua pupu raban bansa patut datai ari ati ti tuchi lalu iya balat beguna dikena kitai sama-sama ngemansangka Malaysia nyadi menua ti kaya, lantang sereta dipebasaka menua bukai. Kitai rayat Malaysia patut baka sempama jaku tuai, keli sama keli saum isi selubang ansang.
Tiada ulasan:
Catat Ulasan