Isu senentang pengamah sungai endang suah amat nyadika buah mulut kelebih agi ngagai sida ke endang sayau ke rampa menua. Sungai tu pun penatai pemisi ngagai mensia mayuh sereta meri asil ngagai pemansang ekonomi menua kelebih agi ari sukut industri dagang temuai.
Enti sungai kamah, iya ukai semina nekulka industri dagang temuai menua tang iya mega meri empas ti negatif ngagai mensia mayuh. Ba menua pesisir, mayuh bala mensia ngaga sungai nya nyadika endur begigaka ikan. Kelimpah ari nya bisi mega sekeda nya ngaga projek nupi ikan dalam sangkar. Bala pekebun mega ngarapka ai sungai nyadi ai irup sida sereta dikena sida manjah pun sayur tauka utai ti ditanamka sida. Ngagai orang ke diau ba tebing sungai lalu bedau datai ai paip, sungai nya mih alai sida betesah, mandi sereta dikena berapi.
Kimpin sayau ke sungai udah lama amat dipejalaika tang lalu nadai ngenataika empas ti positif seratus-peratus laban pengamah sungai majak nyadi. Nya alai kitai ke angkun sereta sayau ke menua patut berundingka chara dikena kitai mutarka penanggul tu. Pelabaka tentu bisi chara bukai dikena nyaga pemeresi sungai.
Keterubah, perintah di baruh Opis Menteri Pelajar patut ngemesaika skop pelajar senentang nyaga sungai ngambika nembiak ba sekula ngembuan pengerindu sereta sayau ngagai sungai. Nembiak kemaya hari tu enda tentu nemu pemesai guna sungai kelebih agi bala ke enda bepanggai ba sungai nyadika pun penatai pemisi sida.
Kedua, undang-undang dikena neritka adat patut dipejalaika dikena ngukum bala orang ti salah ketegal ngamahka sungai. Undang-undang taja pan bisi enti enda dipejalaika enda ngajar bala mensia senentang pemesai reti sungai.
Ketiga, Opis Rampa Menua tauka Jabatan Alam Sekitar enggau Opis Parit enggau Entali Ai enda tau enda nambahka akitiviti nginau sereta ngemataka sungai ngambika kualiti sungai ulih dijaga enggau manah. Pengawa ti ngelakka sungai enda dijaga enggau dikemata tau bendar ngasuh kes ngamahka sungai majak nyadi.
Keempat, atur ti terit patut dipejalaika ngagai sida ke diau enda beradat ba sesebengkah genturung pendiau. Kebuah pia, laban sida tu udah ditemu suah amat bebuaika uras sereta bira ba sungai sebarang maya. Sida ke diau enda beradat tu udah mayuh ditemu diau ba tebing sungai. Sungai ke semak rumah sida tu mih ti nyadika palan alai bebuaika uras.
Kelima, kimpin sayau ke sungai patut dikerembaika nengah arus media massa nyengkaum penerang senentang empas ti negatif ari ulah ti bebuaika mayuh macham barang bukai ke dalam sungai. Perintah enggau gerempung ukai perintah (NGO) patut enda leju bejalaika kimpin dikena nerang, ngelalau sereta nangkan mensia mayuh senentang pemesai guna sungai dalam pengidup mensia. Kelimpah ari nya ukum ti setipak enggau pemerat patut diletak ngagai sapa-sapa orang ti ditangkap ketegal ngamahka sungai. Kimpin tu begunaka puku enggau pengeliat ati indah enda baka sempama tuai; bandir tapang enda ulih ditingkuh enggau lungga.
Nesal dudi nadai reti enti sungai udu amat kamah laban nembiak ke dudi jemah ila tentu nadai teulihka ai ti beresi dikena sida. Tu tau ngujungka penyakit majak mayuh sereta berampit ngagai mensia. Nya alai kitai semua enda patut leju nguji enggau naka ulih nyaga pemeresi sungai baka sempama jaku dalam biar patah sayap betungkat patung.
Tiada ulasan:
Catat Ulasan