Ngarang bup dalam jaku Iban

Ulih tauka enda bala penulis Iban nulis sereta ngarang bup dalam jaku Iban? Enti disaut ari sukut positif tentu ulih laban kemaya hari tu mayuh ga udah penulis Iban bisi udah nguji nulis dalam mayuh macham media baka ba majalah, bup teks sekula enggau ba internet. Tang enti disaut ari sukut negatif tentu enda ulih laban bisi mih kebuah.

Kebuah pekara tu dikenang laban apin lama ti udah bisi pengari Iban bisi bejaku meransang bala ke gawa perintah enggau sida ke bisi ngembuan penemu sereta pengelandik ba jaku Iban dilalau begempung ngemansutka bup dalam jaku Iban. Kaban Kunsil Nengeri Tamin Joseph Mauh Ikeh madahka, pekara nya enda ulih dipeda lempung enti enda bansa Iban empu tauka nadai orang bukai ulih ngereja pengawa nya.

Iya bisi pengarapka sida ke bisi pengelandik ba jaku Iban ulih nempa bup dalam jaku Iban ke lebih agi senentang pengarap enggau leka main asal kitai bansa. Nitihka ku iya, mayuh bengkah bup ba jaku Iban ulih digaga, baka bup ensera, jaku silup, leka main enggau ke bukai. Semua bup tu ku iya, mai mayuh penguntung ke lebih agi ngagai bansa Iban, ngambika ulih nyadika tengau enggau lalau nembiak ke maya hari tu. Mauh madahka, ketebal agi bala nembiak kemaya hari tu ngembuan penemu ti rapas senentang pengarap lama bansa Iban.

Kelimpah ari nya, iya mega andal amat ati ngagai bala pengajar ke ngajar jaku Iban baika ba sekula primari tauka sekondari laban sida enggau naka ulih begunaka bup baka nya enggau badas lebuh maya ngajar nembiak sekula.

Nyadi enti diperatika ari sukut negatif, pekara betuliska bup dalam jaku Iban tu endang bisi. Kesatu, nulis tu begunaka awakka ti chukup dikena nembuka sesebengkah pekara ti deka ditulis. Orang ke ngembuan pengerindu ti sereta sanggup muai hari aja ulih ngemujurka juluk ati tu.

Kedua, pekara ke deka ditulis nya endang mayuh tang kekadang bala penulis enda nemu ni bagi ke deka ditulis. Kitai ke ngasuh orang nulis sigi nyamai mih laban mulut aja ti bejaku. Tang orang ke nulis begunaka untak ti kreatif dikena nengkebang pekara ti deka ditulis. Nya alai enti enda chukup katan, penulis tau tak ngetu setengah jalai lebuh idea udah nadai agi pansut.

Ketiga, nulis sigi mudah bagi sida ke endang suah nulis sereta ngembuan pengerindu tu. Tang utai ke nyadika penanggul nya lebuh dikeluarka bup tu. Sapa mih mensia ke sanggup nyelak bup tu. Ungkus nyelak kemaya hari tu endang mar laban keretas enggau dawat ke dikena nya mar. Kelimpah ari nya kitai nadai lisin dagang dikena ngeluarka bup. Enti kitai ngena kompeni orang tentu kitai bekunsi untung enggau sida iya. Kebuah ti ketiga tu mih balat amat nekul pemansang orang ke deka nulis dalam jaku Iban.

Keempat, enti sema bup tu dijual pan rega iya tetap besai laban dikira ari kos nyelak sereta ngeluarka bup tu. Kelimpah ari nya mega penyampau bup dichelak nentuka ungkus rega bup tu. Enti bup tu dijual ngena rega ti mar tentu bala nembiak sekula enda ulih meli iya.

Kepenudi iya, sapa mih deka mantu penulis tu nyual sereta ngelakuka bup tu ila. Saut sekeda bala kitai tentu mudah baka anjung aja ngagai kitai bup lalu minta sida nulung kitai nyual iya. Bala penulis empu pan ulih mih nyual iya tauka bala orang ke deka mantu ngelakuka bup nya. Tang iya ke suah nyadika penanggul nya rega bup ke enda sama entara siti kedai ngagai siti kedai tauka entara orang ngagai siku orang ke bukai. Kadang-kadang sida ke bejual tu untung agi ari ke nulis bup.

Nya alai sebedau kitai ulih meransang raban penulis tentuka dulu gerempung ke endang amat-amat ulih mantu bala penulis nyelak sereta ngeluarka bup ti deka dituliska sida.