Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.
"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Jumaat, 31 Disember 2010

Juluk Ati 2011



Ninting ujung taun majoriti ari kitai lalu bepikirka sereta merambuka pekara ti deka digagaka kitai dalam taun baru. Dalam jaku English iya dikumbai resolution, enti dikalih ngagai jaku Melayu iya dikumbai resolusi tauka niat tauka tebilang agi dikumbai azam. Azam tu diinjau ari jaku Arab. Puas ga aku nguji ngiga leka jaku dikena ngalihka leka jaku resolution tauka azam dalam jaku Iban. Iya ke pengabis semak nya leka jaku niat.Tang sekali tu aku enda ngena leka jaku niat laban ba penemu aku leka jaku juluk ati mega enda tentu jauh limpang ari reti azam. Juluk ati nitihka orang ke landik dalam motivasyen tau dibagi ngagai juluk ati ba sukut diri, diri sebilik, pengawa enggau komuniti.

Nyadika sekali tu aku semina ngenataika juluk ati aku ari sukut komuniti. Niat ati aku ke deka nulung komuniti Iban. Juluk ati tu endang lama udah diperam semina ujung taun tu dibantai ngambika bisi jalai deka ngulihka enggau bebendar taun dudi.

Juluk ati tu bekaul enggau nengkebang siti blog ke bekaul enggau gempung jerita pandak dalam jaku Iban tauka dikumbai antologi jerpan Iban. Juluk ati aku nengkebangka blog tu endang dikena nyadika pemeri tauka sumbangan aku ngagai komuniti Iban kelebih agi sida ke siru ke jaku tu sereta mega ngagai bala pengajar enggau nembiak sekula ke endang ngambi mata pelajar Bahasa Iban ba sekula. Blog tu ila nitihka niat ati aku ukai semina belalauka litericha Iban dalam nama-nama cherita ke ulih dipekunsika aku ila. Aku ngambi chunto bansa Jepun, Korea, China enggau Peranchis ke ngembuan ulah ke chakah mali sereta ngalihka teks tauka jerita dalam jaku bansa diri.

Aku ngarapka juluk ati aku tu ulih dijapai dalam taun baru tu. Aku mega arapka pengada blog tu ila ulih nambahka kereban bacha kelebih agi jerita dalam jaku Iban ngambika bisi dibacha bala orang ke rindu bebacha jerita dalam jaku Iban sereta enggau bala pengajar enggau nembiak di sekula. Enggau nya aku ngambi peluang tu meri Selamat Taun Baru, ngarapka kitai semua lantang dalam semua pengawa, gayu-guru gerai nyamai.
Posted by at
Labels:

2 ulasan:

  1. Tanpa Nama31 Disember 2010 pada 9:25 PTG

    Selamat nyambut Taun Baru 2011 ke nuan, menyadi! Ngajihka kita sebilik gayu guru gerai nyamai sepemanjai taun 2011 tu.

    BalasPadam
  2. bubuplastic15 Januari 2015 pada 6:06 PG

    uchutedung,

    terima kasih laban ti udah meri aku penemu mimit ba kalih jaku "resolution" dalam jaku Iban kena aku sharing mimit hari minggu tu ila. Selamat Taun Baru 2015 kaban.

    BalasPadam

Langgan: Catat Ulasan (Atom)