-->
Kaban Kunsil Nengeri Tamin, Joseph Mauh Ikeh ngelalau rayat kelebih agi ba menua pesisir ngembuan sereta ngubah runding diri ti ulih nyungkakka tikas pengidup diri empu. Ku iya, kena nempa pengidup ke mujur, kitai enda tau nadai perambu sereta ngaga pelin ke badas.
Ulah tu patut dikembuan kitai ngambika pengidup ruang bilik ulih diubah meruan agi. Nya alai, kitai anang malu betanyaka chara orang bukai ulih mansang ba pengidup sida.
Mauh madahka dikena napi pengidup kemaya hari tu, kitai anang enda nunda orang bukai ke udah mansang ngambika enda jauh tinggal ba belakang.
Nya alai, rayat kelebih agi ba menua pesisir, naka alah nyeliahka diri ari ulah ke tau ngasuh pemansang pengidup diri tasal. Mensia patut nempa ulah ke badas ba diri ngambi nyadika chunto ngagai orang bukai.
Lebih agi enti kitai nya tuai bilik. Bai ruang bilik kitai besemekih enggau orang bukai ngulihka pemansang. Ulah ngelusu pan ulih mega nyadika penanggul ba pengidup kitai.
Enti deka ngubah pengidup diri, kena mih pengelandik enggau runding ke badas maya ngereja pengawa.
Mauh madah, rayat menua pesisir enda patut takut nyerumba orang bukai berebutka awak ke endang udah disediaka perintah ngagai rayat.
Diatu dunya udah jauh berubah. Nya alai kitai mega patut berubah ngambika ulih ngembing diri empu, bala anak enggau diri sebilik mansang nyerumba ubah dunya.
Senutuk enggau nya mega, Menteri Muda Pengatur Pemansang Menua Pesisir, Datuk Gramong Juna mega ngelalau rayat menua tu kelebih agi ba menua pesisir ngambika ngembuan ulah deka ngubah runding diri kena napi pemansang singkang ubah dunya. Ku iya madah, pemansang kemaya hari tu nyeraka penemu enggau pengelandik ba diri empu.
Kitai ukai semina nemu betengahka pemansang ke diberi perintah menua tang mega patut ngembuan penemu kena ngulihka asil ari pemansang nya ti tau mai penguntung ngagai diri empu.
Nya alai ku iya, rayat patut ngubah chara idup enggau runding diri ngambika tikas pengidup ulih disungkak tinggi agi ari ke suba.
Ku iya, pemansang ke diberi perintah ba menua tu endang sigi mai pengelantang pengidup ngagai rayat. Taja pan baka nya, rayat enda ulih enda betengahka awak nya enggau manah.
Enti kitai nemu ngiga jalai ke tau ngulihka penguntung ari pemansang tu, pengidup ukai semina lantang tang mega kitai ulih besemekih enggau bansa bukai napi ubah dunya kemaya hari tu.
Kelimpah ari nya, kenu ku iya, rayat mega patut berasai temegah ati ngagai perintah menua tu laban enda leju meri pemansang baka ba pengawa pelajar, ngangkatka penatai pemisi, nyendiaka perengka guna mensia mayuh enggau pemansang ke bukai.
Taja pan baka nya, ku Gramong, pekara ke enda tau nadai ba rayat baka ba menua pesisir iya nya ulah deka begempung enggau pangan diri. Sida patut nyeliahka pekara ti tau mai pambar, charut tauka beserekang penemu entara diri sama diri. Kelimpah ari nya sida mega patut netanka penyerakup ngambika ulih idup lantang nyerumba pemansang diberi perintah.
Nya alai, ku Gramong, enti bisi penanggul nyadi ba rumah panjai tauka ba dini-dini endur, anang sekali-kali minta saup orang bukai laban nya semina ngasuh penusah ke nanggul nyadi agi. Enti bisi penusah tauka penanggul nyadi ba kita, kitai ngarapka pekara nya ulih diputar nengah jalai enggau atur ke patut.
Tiada ulasan:
Catat Ulasan