-->
Orang suah amat ngembuan runding ke ngumbai orang ke mujur nya orang ke ngembuan pengidup ke kaya. Sida tu suah ngumbai duit ringgit enggau pemujur nya sebaka reti – bisi duit kitai mujur, nadai duit kitai enda mujur. Ketegal penemu nya mayuh amat orang nyau bepas was deka nyadi orang ke beduit. Kelimpah ari duit ringgit, pekara bukai ke suah nyadi ukur pemujur mensia nya baka pengawa ti dipegai, setipikit ti dikembuanka diri, nama enggau rekod. Tang ari semua tu duit ringgit nya suah amat dikena nyukat pemujur siku-siku orang.
Duit ringgit enda ulih nyadi pengukur pemujur pengidup siku-siku. Mayuh orang ke kaya raja enda tentu mujur nempa pengidup ti manah sereta mulia ba diri iya empu. Ukai semina nya, mayuh orang kaya mujur ngumpul reta tengkira ti mayuh ngena jalai ti salah. Mayuh mega individu ke mujur senaja milih gaya pengidup ti selama ari sukut reta tengkira.
Enti siku-siku kitai milih duit nyadika kayu penyukat pemujur dia kitai ke batang nya ngena penyukat ari luar. Duit ringgit enggau reta tengkira nya utai ti ari luar pengidup siku-siku.
Orang ke ngena orang bukai dikena manding diri iya empu baikka iya udah tau dikumbai mujur tauka enda. Iya mega mandingka diri iya empu enggau orang ke bisi duit. Enti duit iya sama pemayuh tauka mayuh agi ari orang bukai tentu iya ngumbai diri iya udah mujur. Pengawa ke nasih pemujur diri ngena duit ringgit sereta mandingka diri empu enggau orang bukai nya ukai chara manding ti betul sereta engkeman.
Orang ke mujur nya orang orang ke ulih ngaga tauka nempa sesebengkah pekara enggau naka pemanah kelebih agi ba aspek pengidup iya empu. Sida ngereja pekara belalauka pengelandik ketegal pengarap, pengawa, ruang bilik sereta komuniti iya empu.
Pemujur enda sama reti enggau nama, reta tengkira, midul emas tauka selambar keretas seteipikit. Enti semua tu nyadika penyukat dia iya dikumbai pemujur ke semina dipeda ari luar aja. Iya ke patut nya chara kitai mandingka diri kitai enggau diri kitai empu aja. Enti sema kitai ulih ngereja sesebengkah pengawa enggau manah dia kitai patut nyukat diri kitai nyadi orang ke mujur.
Pengawa ke nyukat pemujur nengah chara mandingka diri empu enggau orang bukai nya pengawa ke tau nyarutka runding sereta enda tentu realistik. Kitai ukai datai ari benih purih ke sama, sejarah pengidup kitai enda sebaka lalu situasyen kitai pan enda mega sama. Nyangka kitai balat agi benasit ari orang bukai nya alai kitai mujur. Tang mega nyangka sida udu agi benasit manah ari kitai nya alai kitai alah.
Enti kitai majak mandinmgka diri empu enggau orang bukai, kitai tentu ngemulaka diri empu. Kitai engka udah ngaga mayuh pekara enggau naka pemanah tang laban kitai ati manding diri empu enggau orang bukai ngujungka kitai ngumbai diri enda mujur. Enti kitai endang bisi pengelandik belagu, nama reti iya enti kitai ulih ngalahka orang ke endang nadai pengelandik belagu?
Ainon Muhammad & Abdullah Hassan, Mendorong diri sendiri, PTS Publication Sdn. Bhd.2005
Tiada ulasan:
Catat Ulasan