5 hari bulan Disember tu genap dua taun udah pengada blog Tempalai Kenang. Taja pia penulis endang lama udah blogging kenyau ari taun 2008 tentang suah nyangkingka penemu diri ba blog tauka laman web orang bukai.
Enti ti timpai ke belakang, pengada blog tu suba endang bejuluk ati deka nyediaka kereban ke ulih dibacha bala Iban ke rindu ke pengawa macha kereban bacha dalam jaku Iban. Kitai sama bela nemu sereta ninga kelebih agi bala pengajar ke ngajar jaku Iban ba sekula suah bendar serebana madahka nadai chukup kereban ke ditulis dalam jaku Iban. Nya mih penulis enggau ati ti baruh nguji nyaup raban pengajar di sekula mutarka penanggul tu laban ngasaika diri suba lebuh ke nyadi pengajar kala mansa penanggul ti baka tu. Amat mih bisi sekeda pangan pengajar ke mai bala pengajar bukai ngambika lalu ngalihka artikel ke ditulis dalam jaku English enggau jaku Melayu ngagai jaku Iban, tang pengawa ngalihka jaku tu ukai pengawa ke mudah laban begunaka pengelandik tauka skill ngalihka jaku kelimpah ari ke bisi kala enggau kus ngalihka jaku.
Nitihka niat ati penulis, blog tu endang mega ditagaka tau nyeremin jalai ngena jaku Iban dalam menua Malaysia, kelebih agi ba negeri Sarawak. Nya alai sekeda isu, topik tauka pekara ke dikenataika ditu endang ngembuan tuju pengerindu diau begulai sejalai sereta bekunsi pendiau enggau mayuh pupu raban bansa di Malaysia.
Kedua, pengada blog tu suba mega dikena mandang ngagai bala mayuh jaku Iban ulih diangkat ngagat jaku surat tauka bahasa persuratan nitihka singkang pemansang dunya. Penulis enggau naka ulih ngenataika topik ti bisi bekaul enggau pemansang pupu raban bansa Malaysia setipak enggau juluk ati perintah ke besuluka jaku 1 Malaysia.
Ketiga, pengada blog tu mega dikena penulis bekunsika penemu senentang pekara ti bisi kaul adat enggau budaya Iban ngambika enda lenyau mabun laya nitihka aki ini ktai ke Serawai Mandai Betangga Tunggang. Raban bansa Iban dipelabaka enggai jaku Iban semina nyadi pesaka bala sida Titik Nasan Pantau Ajan Panjai Lengan, tuis sebayan di Bedega Lintang Takang.
Nya alai penulis blog tu nyempamaka blog tu baka orang Iban ke ngemeranka tajau laban iya tau nyadika tanda kitai agi bekaul rapit enggau aki ini kitai kelia lebuh ke bekenangka jerita lama, main asal tauka litericha bansa Iban.
Penulis blog tu ngambi peluang meri besai terima kasih ngagai raban bala pemacha blog tu ke endang meruan enggau penulis ngelamatu macha sereta meri komen tauka kritikan dalam ati senentang pekara ti ditulis ditu. Kebuah ke nyebut munyi nya laban endang udah budaya asal Iban jarang amat meri komen tauka mantah ari mua. Semua komen ke bisi disebut dalam ati diri diterima penulis enggau ati ti tuchi sereta terima kasih ngambika ulih nyadi peransang dikena ngemanahka blog tu dudi hari ila.
Terima kasih.
Tiada ulasan:
Catat Ulasan