Genturung pendiau orang asal tauka orang empu endang jarang ditemu bisi ba negeri-negeri besai. Ambika banding genturung pendiau orang Melayu ke dikira pengabis tuai nya ba Kuala Lumpur ke tebilang suah pansut ba berita nya Kampung Baru. Nyadi kenang pengarang sekali tu bisi bekaul enggau genturung pendiau bansa Iban ke bisi ba nengeri Kuching.
Genturung pendiau Iban ke pengabis tuai di bandaraya Kuching nya Genturung Pendiau Iban Tabuan Dayak. Nitihka fakta sejarah genturung tu diperimba raban bansa Iban urung taun 1874 iya nya maya perintah Rajah Brooke kelia. Kemaya hari tu genturung tu ulih dipeda betul-betul bepalan ba puak bandaraya Kuching.
Bala Iban ke terubah muai agang muai batang lalu ngaga genturung nya suba, mayuh datai ari pelilih menua Sebuyau enggau Banting (Sri Aman) lalu ditangkan enggau bansa Iban ari pelilih menua Betong enggau Saratok. Pemindah raban bala Iban tu urung taun 1960.
Nitihka Tuai genturung pendiau Iban Tabuan Dayak (Atas) Mr. Andrew Ngiri madahka sebedau genturung tu bisi kelia, raban bansa Iban ke datai ba Kuching mayuh berumah ba Bukit Mata Kuching, Bukit Pengandai iya nya alai opis perintah besai ba Simpang Tiga ke diatu. Udah ke berimba ba Tabuan Dayak, baru sida iya ngaga rumah panjai ba endur nya.
Lebuh genturung pendiau tu nyau majak dikemansangka, baru mayuh sida ke diau dia ngaga rumah kediri ke nyembuah nyentuk ke sehari tu. Kemaya hari tu ukai semina rumah nyembuah aja ke bisi digaga dia, tang nyengkaum apartment, lot rumah kedai, chapel sereta rumah teres komersil. Kelimpah ari nya mega, endur genturung tu endang ba tengah-tengah nengeri lalu iya semak enggau mayuh palan komersil, opis perintah, pasar sereta Padang Penyangkai Bilun Antarabansa Kuching (KIA).
Genturung Pendiau Iban Tabuan Dayak enti diperatika pan sama mansang nitihka singkang pemansang dunya kemaya hari tu, lalu iya enda baka maya genturung nya kelia taja pan udah sama nyingkang nitihka arus moden, Genturung Pendiau Iban Tabuan Dayak mega baka genturung pendiau bukai betunga enggau penanggul sosial enggau infrastruktur. Kemaya hari tu jalai penama ngagai Tabuan dayak bisi tiga buah iya nya ari Jalai Tun Jugah, Jalai Song enggau Jalai Tabuan Lalang enti dibanding enggau suba semina nengah Jalai Tun Jugah aja.
Ketegal orang mayuh udu nengah jalai muntang nya ari Jalai Song baka lori besai-besai ke mansa jalai ngangkut tanah kena nimbuk projek baru semak ditu ngujungka jalai balat rusak sereta batang paip pechah.
Kelimpah ari nya, sungai ba Tabuan Dayak mega balat bendar kamah. Uras pan majak rarat lalu betugung ba sungai nya. Majlis Bandaran Kuching Selatan nitihka berita kala madah deka ngaga panjuk jarin (trap net) tang udah nya lalu nadai kala didinga berita agi. Taja pia pengawa ngerumbak sungai nya bisi mega kala digaga dua taun tu ti udah tang iya nadai teputarka penanggul nya. Nitihka Mr. Andrew uras nya ke rarat ngagai sungai nya datai ari ili iya nya ari Nanga Tabuan dibai pasang masuk nya lalu betugung dia aja laban enda ulih rarat ke bukai.
Kelimpah ari nya mega, penanggul pengawa rama bukai taja pan enda mayuh, bisi mega nyadi. Tu nyengkaum penanggul pengawa rama ke bekaul enggau ngirup arak ba rebak nembiak. Tang bala nembiak ke ngirup tu mayuh orang luar ke tama ngagai genturung tu tauka bala orang mayuh ke nyuwa ba Tabuan Dayak. Orang ke datai nya ke suah agi ngaga penyalah, enti enda Tabuan Dayak tu bepengelikun mega.
Berapa taun tu ke udah, Tabuan Dayak udah nyadi palan pendiau ke balat disuwa orang luar kelebih agi ba sida ke datai ngagai ari menua pesisir ke ngiga pengawa. Kelimpah ari nya berapa taun tu ke udah bala nembiak universiti mega mayuh besuwaka rumah ba genturung nya.
Kena nyeliahka sebarang penusah bebadi jalai alun nyadi ba genturung nya, Mr. Andrew madahka siti papan tanda ke madah endur nya enggau siti da agi bump jalai deka digaga ngambika mensia mayuh ke tama ari Jalai Song deka bejimat agi lebuh mansa jalai nya.
Mr. Andrew mega ngarapka mega sebuah Balai Raya ulih digaga ba genturung nya. Suba endang bisi tang laban tanah alai balai nya udah diambi pulai orang ke ngempu tanah. Nya alai, datai ke sehari tu genturung tu lalu nadai ngembuan sebarang balai raya laban nadai orang ke deka nyali tauka nyual tanah endur nirika balai. Perintah endang besedia deka meri belanja dikena ngaga balai raya tang komuniti genturung tu mih beempuka tanggung pengawa ngiga tanah.
Naka ke diatu, Genturung Pendiau Iban Tabuan Dayak dibagi ngagai tiga bengkah. Tu nyengkaun Tabuan Dayak (Atas) ke betuaika Mr. Andrew Ngiri. Iya ngemataka urung 200 buah rumah/ruang bilik. Lalu kedua nya Tabuan Dayak (Paya) ke betuaika Mr.Peter Encharang. Iya ngintu urung 200 buah rumah/ruang bilik sereta ketiga nya Tabuan Dayak (Lalang) ti betuaika Mr. Iki Nibong ke ngemataka urung 40 buah rumah/ruang bilik.
Genturung Pendiau Iban ba nengeri patut ditan sereta dikemansangka setipak ubah pemansang menua ngambika iya nyadika chuan raban bansa Iban ke agi diau ba menua pesisir. Kelimpah ari nya mega iya dikena ngetanka budaya sereta adat asal Iban ngambika iya enda retai di panas, enda sebah di ujan.
(Diambi sereta dibali ari Borneo Post 6hb January 2011)
Tiada ulasan:
Catat Ulasan