Kitai nyau udah datai ba minggu kedua dalam taun 2011. Kati kini juluk ati, niat, resolusyen tauka azam ke udah diperambuka kitai lebuh hari keterubah dalam taun baru agi dikeingatka dalam runding kitai? Tauka udah majak enda dikeingatka agi. Endang baka selama lebuh pun taun kitai sigi gagit sereta besemangat amat deka ngaga sesebengkah pengawa beserimbai enggau taun baru.
Sekeda niat ke suah amat diperambuka kitai nya nyengkaum badu nginsap, badu enggau orang ngirup arak, nambah mayuh agi jam begulai enggau diri sebilik, enda rua bebelanja, mayar utang, belajar enggau bebendar, ngembuan pengeliat sereta tan ati, balat agi mandangka pengasih, ngurangka pemerat tubuh sereta mayuh agi ke bukai.
Ngaga resolusyen tauka naga sesebengkah pekara ke tuju nyadi nya endang pekara ke manah. Taja pia tetiap pengawa ke ditaga nya patut disempulangka enggau pengeliat ati ngambika pekara nya ulih dijapai.
Nya alai enti udah bisi niat udah ditaga kitai patut bebendar ngemujurka iya ngambika ulih dijapai. Kitai dikeingatka enda tau mudah putus pengarap kelebih agi kitai benung napi juluk ati kitai enggau penuh penanggul. Nya alai sulu jaku agi idup agi ngelaban nya patut bendar nyadika slogan lebuh kitai ngarapka pemujur niat kitai nya. Ulah ke nangguhka pengawa tauka ulah ke enda bebendar tau ngujungka niat enda tejapai tauka lubah teulihka niat ati kitai nya.
Tiap-tiap penekul patut ngeringka agi semengat kitai ngulihka juluk ati kitai nya, munyi ku orang anang begaut ngangkatka menira burak. Agi idup agi ngelaban dataika kitai teulihka juluk ati kitai nya. Kelimpah ari nya kitai enda patut mudah baka sempama angat-angat tai manuk aja, sehari tu bendar amat tang pagi-ila lusa kitai nyau lembau. Nya aram mih kitai sama-sama ngingatkka pangan diri senentang juluk tauka niat ati kitai dalam taun baru tu. Arapka mujur.
Tiada ulasan:
Catat Ulasan