Ngaku pengelemah diri empu nya siti pengawa ke amat manah digaga kitai kelebih agi enti pengelemah nya bisi kaul enggau orang bukai. Taja pia ngakuka pengelemah diri ba mua mayuh begunaka semengat ti kering laban suah agi kitai enda tentu rindu mandangka pengelemah diri ba mua mayuh. Suah agi mega orang ke enda tentu deka ngakuka pengelemah diri nya orang ke bepangkat besai kelebih agi orang ke bisi kaul politik laban iya tau mai empas ke negatif ngagai diri empu.
Kenang pengarang sekali tu bisi kaul enggau pengawa ke ngakuka pengelemah diri. Sekali tu orang ke madahka diri nya ukai sebarang orang tang orang ke kala merintah menua iya nya menteri besai ke dulu suba, Tun Dr Mahathir Mohamad. Iya madahka siti ari utai ke enda mujur dikerejaka iya lebuh ke merintah Malaysia dalam timpuh 22 taun nyadi mentri besai nya bekaul enggau ngemaju sereta ngemansangka Kampung Baru ba Kuala Lumpur.
Tu dibantaika iya ba laman blog Chedet iya kemari (10 January 2011). Iya madahka lebuh perintah udah naburka berita deka ngemansangka Kampung Baru, dia pekara senentang orang ke empu tanah enggau rega tanah nyadi penanggul.
Mayuh orang ke empu menua udah pindah ke bukai ketegal udah teulihka pengidup ti lantang . Nya alai sida ngasaika Kampung Baru nya ke diuan sida ngelama tu ukai endur ke manah agi alai diau. Kelimpah ari nya mega, mayuh orang ke empu tanah udah parai tauka udah enda tentu temu tuku endur diau.
Iya madahka orang empu tanah ke bisi nya nyau minta duit pampas ke besai ngagai reta pesaka sida. Tu ku iya tau ngujungka ungkus ngemansangka Kampung Baru nya tinggi.
Iya mega ngujungka orang Melayu enda ulih ngepunka dagang tauka ngembuan reta dagang dia. Orang bansa bukai nyangka ulih tang enti endur nya dijual ngagai sida, Kampung Baru ukai agi endur orang Melayu.
Dikena ngetanka orang Melayu diau ba Kampung Baru, siti atur ke ditujuka ngagai pemansang tauka developer nya sida ukai semina diasuh mayar rega tanah nya tang mega nyediaka orang ke ba genturung nya rumah kedai. Tu mega ku iya tau nyungkakka ungkus pemansang.
Pemaju bansa Melayu enda ulih nangkap projek tu lalu sida ke bansa bukai mega enda tentu rindu nangkap projek tu laban penatai pemisi sereta daya pemeli orang Melayu baruh. Nya alai ku Dr Mahathir, indah dataika sehari tu agi mayuh orang melayu enda tebelika rumah tauka kedai ke endang diungkupka sida. Nya alai iya arapka perintah ulih ngaga baru Kampung Baru tu ngambika temuai enda meda penyeranta orang Melayu ba menua diri empu.
Penyanding Penemu:
The Star, 11 January 2011
Tiada ulasan:
Catat Ulasan