Perintah endang besedia ngaturka kimpin jalai raya ninting taun enggau pengerami besai baka Hari Raya, Taun Baru Cina, Gawai Dayak enggau pengerami ke bukai. Taja pia, pemujur kimpin enda ulih dijapai enti ulah mensia mayuh ke nengah jalai raya nadai berubah. Tempalai kenang sekali tu nguji ngenangka pasal kimpin jalai rayake suah amat diatur ba Sarawak lebuh penatai tiap-tiap pengerami.
Program bekaul enggau kimpin jalai raya ti diintu ninting taun kelebih agi maya pengerami sigi enda mujur enti sema raban orang mayuh enggai ngubah ulah diri lebuh deriba. Nya alai program meri penerang bekaul enggau pengelikun ba jalai alun patut dipajakka.
Raban polis patut meri penerang ngagai orang mayuh senentang pemesai tuju nyaga pengelikun ba jalai alun ngambika sida iya ngembuan tanggung pengawa ke manah sereta bebasaka pangan diri. Orang mayuh patut diterangka enggau silik senentang pemesai tuju nitihka atur ba jalai alun ngambi ulih ngurangka kes belantak ba menua tu.
Kelimpah ari nya mega raban polis patut bejalaika pengawa nyerekang penyalah raban orang mayuh ke mai entuka kelalu laju, enda nitihka atur jalai alun, ngelih ba garis begembar sereta penyalah ke bukai mega.
Nitihka statistik menua Sarawak, kenyau ari sebelas bulan keterubah ba taun 2010 sepenyampau 15,759 kes penusah belantak iya nya, tiga persin niki ari taun ke sebedaunya. Kes belantak nya nabanka 310 iku nyawa enti dibandingka 282 iku ba taun sebedaunya. Berindik ari nya, mensia mayuh patut dilalau ngemeranka pengelikun ba jalai alun.
Tiada ulasan:
Catat Ulasan